دوڭگەلەك ۇستەل قازاقستان پرەزيدەنتىنىڭ كومەكشىسى ايدا بالاەۆا باسقاراتىن وتىنىشتەردى قاراۋدى باقىلاۋ ءبولىمىنىڭ باستاماسىمەن ۇيىمداستىرىلدى. پرەزيدەنت اكىمشىلىگىنىڭ قوعامدىق قابىلداۋىنا مۇمكىندىگى شەكتەۋلى جاندار تاراپىنان ولاردىڭ ءومىر ءسۇرۋ دەڭگەيىن جاقسارتۋ تۋرالى ءوتىنىش ءجيى تۇسەدى.
ازاماتتاردى قابىلداۋدىڭ جالپىرەسپۋبليكالىق كۇنىن وتكىزۋ بارىسىندا ايدا بالاەۆا ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرىنە مۇگەدەك جاندارعا الەۋمەتتىك قولداۋ كورسەتۋ ماسەلەلەرى بويىنشا دوڭگەلەك ۇستەل وتكىزۋ جونىندە تاپسىرما بەرگەن بولاتىن.
ەڭبەك جانە حالىقتى الەۋمەتتىك قورعاۋ مينيسترلىگى بارلىق نورماتيۆتىك اكتىلەر مەن باعدارلامالاردى تالداي كەلىپ, قوعام بەلسەندىلەرىنىڭ تالاپ-تىلەكتەرىن ەسكەرە وتىرىپ, نۇر-سۇلتان, الماتى, شىمكەنت قالالارىنداعى, سولتۇستىك قازاقستان, قاراعاندى, الماتى, پاۆلودار, اتىراۋ وبلىستارىنداعى فرونت-وفيسىندەگى جانە كوشپەلى قابىلداۋلار كەزىندەگى مۇمكىندىگى شەكتەۋلى جانداردىڭ شاعىمدارى مەن تىلەكتەرىنە وراي سەلەكتورلىق جيىن وتكىزدى.
قازاقستان پرەزيدەنتى اكىمشىلىگى وتىنىشتەردى قاراۋدى باقىلاۋ ءبولىمىنىڭ, ەڭبەك جانە حالىقتى الەۋمەتتىك قورعاۋ مينيسترلىگىنىڭ قاتىسۋىمەن اتالعان سالانى ۇيلەستىرەتىن قولدانىستاعى بارلىق ستراتەگيالىق قۇجاتتارعا رەۆيزيا جاسالدى. 2025 جىلعا دەيىن مۇگەدەك جانداردىڭ ءومىر ساپاسىن جاقسارتۋ بويىنشا ۇلتتىق جوسپار بازالىق قۇجات بولىپ تابىلادى.
وتىنىشتەردى قاراۋدى باقىلاۋ ءبولىمى ءوزىنىڭ بارلىق جۇمىس كەزەڭىندە مۇگەدەك جانداردان تۇسكەن ءاربىر شاعىمدى مۇقيات قاداعالاپ وتىرادى, سول سەبەپتى دە دوڭگەلەك ۇستەل وتكىزۋگە باستاماشى بولىپ قانا قويماي, وعان دايىندىق جۇمىسىنا جانە اتالعان سالادا مەملەكەتتىك ورگاندار جۇمىسىنىڭ تيىمدىلىگىنە تالداۋ جاساۋعا بەلسەنە قاتىستى.
ۇلتتىق جوسپاردى جۇزەگە اسىرۋ بويىنشا تەك قانا ەڭبەك جانە حالىقتى الەۋمەتتىك قورعاۋ مينيسترلىگى ەمەس, سونىمەن قاتار, ەڭ الدىمەن, بارلىق دەڭگەيدەگى اكىمدىكتەر دە جاۋاپ بەرۋى ءتيىس. ودان باسقا اتالعان جۇمىسقا بارلىق مۇددەلى مەملەكەتتىك ورگاندار جانە ۇكىمەتتىك ەمەس ۇيىمدار دا اتسالىسۋى كەرەك. ال جۇمىستىڭ ءاربىر كەزەڭىن باقىلاپ جانە دەر كەزىندە وعان تۇزەتۋ ەنگىزىلىپ, ازاماتتاردىڭ بارلىق دابىلىنا نازار اۋدارىلۋى قاجەت. وتىنىشتەردى قاراۋدى باقىلاۋ ءبولىمىنىڭ ۇيعارىمى وسىنداي.
پرەزيدەنتتىڭ كومەكشىسى ا.بالاەۆا وسى باعىتتاعى جۇيەلى جۇمىستى جولعا قويۋدىڭ ماڭىزدىلىعىن اتاپ كورسەتتى, اتاپ ايتقاندا, ۆەدومستۆوارالىق (مينيسترلىكتەر مەن اكىمدىكتەر اراسىنداعى) بىرلەسكەن قيمىلدىڭ تيىمدىلىگىنە جانە مەملەكەتتىك ورگاندار مەن ۇكىمەتتىك ەمەس ۇيىمدار اراسىنداعى كوممۋنيكاتسيالىق ارنالاردى جولعا قويۋدىڭ قاجەتتىلىگىنە باسىمدىق بەرىلدى.
وتىنىشتەردى قاراۋدى باقىلاۋ ءبولىمى باستاماشى بولعان دوڭگەلەك ۇستەل ديالوگتىڭ ارقاسىندا الەۋمەتتىك ماسەلەلەردى جۇيەلى دەڭگەيدە ابدەن شەشۋگە بولاتىندىعىن كورسەتتى.
