ەلىمىزدە ءوزىنىڭ حال-قادەرىنە قاراي كاسىپ اشۋعا ۇمتىلۋشىلار سانى ارتىپ كەلەدى. سونىڭ ءبىرى ماڭعىستاۋ وبلىسىنىڭ قاراقيا اۋدانى, قۇرىق اۋىلىندا تۇساۋىن كەستى. «اishah_ shoes» اياق كيىم ءوندىرۋ شەبەرحاناسىنىڭ اشىلۋى – شاعىن اۋىلداعى ايتۋلى جاڭالىق بولدى. يگى شاراعا قاراقيا اۋداندىق كاسىپكەرلىك جانە ونەركاسىپ ءبولىمىنىڭ باسشىسى ءاليا جۇمابايقىزى, «اتامەكەن» كاسىپكەرلەر پالاتاسىنىڭ اۋداندىق فيليالىنىڭ ديرەكتورى امانات ماحمۇتوۆ پەن تۇرعىندار قاتىستى.
اينۇر توقباەۆا «Ersai» كومپانياسىنىڭ «ورتالىق ازيانىڭ ەۋرازيا قورى» جوباسىنان 1 ملن 300 مىڭ تەڭگە گرانت ۇتىپ العان بولاتىن. جاڭا ءىستى تۋىستارىمەن بىرىگىپ قولعا الىپ, وتباسىلىق كاسىپكە اينالدىردى. ءوڭىر تۇرعىندارىنىڭ قىزىعۋشىلىعىن تۋدىرعان وتاندىق ءونىمنىڭ اياسى كەڭەيىپ, شايىر اۋىلىنان دا اشىلدى. قازىر شەبەرحانا ەر ادامدارعا ارنالعان قىستىق اياق كيىمدەر توپتاماسىن تىگىپ, تۇتىنۋشىلارعا ۇسىنىپ وتىر. جالپى مۇندا اياق كيىمنىڭ 10 ءتۇرى تىگىلەدى. ايىنا 50 شاقتى اياق كيىم دايىنداۋعا قاۋقارلى.
– اياق كيىمدەر سيىر تەرىسىنەن, ىشكى جاعى قويدىڭ جۇنىنەن تىگىلگەن. اياقتى تەرلەتپەيدى, ىڭعايلى ءارى ساپالى. تاپسىرىستار قابىلدانىپ جاتىر. شيكىزاتتار شىمكەنت قالاسىنان, تۇركيا مەن وزبەكستاننان دا تاسىمالدانۋدا, – دەيدى اينۇر توقباەۆا.
اياق كيىمدەر باعاسى نارىقتان الدەقايدا تومەن, كوپشىلىككە قولجەتىمدى. ماسەلەن قىسقى ەتىكتەر 22 مىڭ تەڭگە بولسا, كروسسوۆكالار 18 مىڭ تەڭگەنى قۇرايدى. شەبەرحانا ءۇش ادامدى جۇمىسپەن قامتىپ وتىر. بۇل كاسىپتى اشۋ ءۇشىن وتباسى مۇشەلەرى نۇر-سۇلتاننان اياق كيىم تىگۋ ءادىسىن ارنايى ۇيرەنىپ كەلگەن. كاسىپتىڭ قىر-سىرىن بىلەتىن ماماندار قاجەتتىگى اڭعارىلادى. بيزنەس اياقتان نىق تۇرىپ, ەكپىندى اينالىم الىپ كەتسە, ايەلدەر اياق كيىمىن تىگىپ شىعارۋ دا جوسپاردا بار ەكەن.
– مۇنداي كاسىپ ءتۇرى اۋداندا بۇرىن بولعان ەمەس. ەرەكشە بيزنەس جوباعا قايتارىمسىز قاراجات بەرىلدى. ونەركاسىپ سالاسىنىڭ دامۋى وتاندىق ءونىمنىڭ سەرپىلىسىنە ۇلەس قوسادى, – دەيدى «اتامەكەن» كاسىپكەرلەر پالاتاسىنىڭ اۋداندىق فيليالىنىڭ ديرەكتورى امانات ماحمۇتوۆ.
اياق كيىم – حالىققا قاجەتتى ءونىم. ءيىسى دە, باعاسى دا «بۇرقىراپ تۇرعان» شەتەلدىك ونىمدەرگە ۇرىنباي, ياعني «الىستان اربالاماي, جاقىننان دوربالاعان» جاقسى-اۋ. وتاندىق كاسىپورىندار اياقتان نىق تۇرىپ, ساپالى ونىمدەرمەن ءوز سورەلەرىمىزدى سىقا تولتىرسا دەيسىڭ!
ماڭعىستاۋ وبلىسى
