«الماتى وبلىسىنداعى ۇشاق اپاتى بارلىق قازاقستاندىقتار ءۇشىن اسا قايعىلى حابار بولدى. وكىنىشكە وراي, ادامدار قازا تاپتى, زارداپ شەككەندەر كوپ» دەدى ا. مامين.
ۇكىمەت باسشىسى قازا تاپقانداردىڭ تۋعان-تۋىستارى مەن جاقىندارىنا كوڭىل ايتتى, ال زارداپ شەككەندەرگە تەزىرەك ساۋىعۋدى تىلەدى.
مەملەكەت باسشىسى قاسىم-جومارت توقاەۆتىڭ تاپسىرماسى بويىنشا قۇرىلعان ۇكىمەتتىك كوميسسيا جۇمىسىنىڭ الدىن الا ناتيجەلەرى تۋرالى پرەمەر-ءمينيستردىڭ ورىنباسارى ر. سكليار, سوتقا دەيىنگى تەرگەۋ امالدارى جانە وقيعا ورنىندا جۇرگىزىلىپ جاتقان جۇمىستار تۋرالى ىشكى ىستەر ءمينيسترى ە. تۇرعىمباەۆ, زارداپ شەككەندەردىڭ جاعدايى تۋرالى دەنساۋلىق ساقتاۋ ءمينيسترى ە. ءبىرتانوۆ باياندادى.
ا.ج. 27 جەلتوقساندا تاڭعى ساعات 07:21-دە «Bek Air» اۋە كومپانياسىنىڭ №Z2100 رەيسى, «الماتى – نۇر-سۇلتان» باعىتى بويىنشا ۇشىپ شىققان Fokker-100 ۇشاعى اۋەگە كوتەرىلۋ كەزىندە تومەن قۇلديلاپ, بەتون قورشاۋدى بۇزىپ وتكەن. الماتى قالاسىنىڭ قازاەروناۆيگاتسيا بايانداماسى بويىنشا, ساعات 07:22-دە ۇشاقتىڭ اۋەگە كوتەرىلۋى كەزىندە ديسپەتچەرلەر ۇشقىنداردى بايقاعان. رادار ەكرانىنان ۇشاق بەلگىسى جوعالىپ كەتكەن. دابىل قاعىلعان.
ساعات 08:04-تە الماتى قالاسىنىڭ توتەنشە جاعدايلار دەپارتامەنتى ۇشۋ جولاعىنان 1,8 شاقىرىم قاشىقتىقتاعى الماتى وبلىسى تالعار اۋدانى گۇلدالا اۋىلىنىڭ شەتىندە اشىق اۋماقتا Fokker-100 ۇشاعىنىڭ قۇلاعانىن انىقتادى.
ۇشاق الماتىدان ۇشقان كەزدە اۋە كەمەسىنىڭ بورتىندا 98 ادام بولعان, ونىڭ ىشىندە 9-ى – بالا جانە 5-ەۋى – ەكيپاج مۇشەلەرى.
ساعات 15:00-دەگى جاعداي بويىنشا وقيعا سالدارىنان بارلىعى 12 ادام قازا تاپقان, الماتى قالاسىنىڭ ءتۇرلى مەديتسينالىق مەكەمەلەرىنە 53 ادام جەتكىزىلگەن, ونىڭ ىشىندە 8 ادامنىڭ جاعدايى اسا اۋىر دەپ باعالانۋدا.
نۇر-سۇلتان قالاسىنان سانيتارلىق اۆياتسيا بورتىمەن جەتەكشى رەسپۋبليكالىق مەديتسينالىق ورتالىقتاردىڭ ماماندارى ۇشىپ باردى, ونىڭ ىشىندە ۇلتتىق نەيروحيرۋرگيا ورتالىعىنىڭ جانە تراۆماتولوگيا جانە ورتوپەديا عزي ماماندارى بار.
الماتى قالاسى مەن الماتى وبلىسىنىڭ مەديتسينالىق ۇيىمدارى قاجەتتى مەديتسينالىق كومەكتى كورسەتىپ جاتىر, ءدارى-دارمەكپەن جانە قاجەتتى قانمەن تولىق قامتاماسىز ەتىلگەن. زارداپ شەككەندەرمەن جانە قازا تاپقانداردىڭ وتباسىلارىمەن پسيحولوگتار جۇمىس ىستەۋدە.
«مەملەكەت باسشىسىنىڭ تاپسىرماسىمەن ۇشاق اپاتىنان قازا تاپقانداردىڭ وتباسىلارىنا 4 ملن تەڭگەدەن قاراجات بولىنەدى. سونىمەن قاتار بارلىق زارداپ شەككەندەرگە قاجەتتى قارجىلاي كومەك كورسەتىلەدى» دەدى ا. مامين.
پرەمەر-مينيستر ىشكى ىستەر مينيسترلىگىنە «Bek Air» اۋە كومپانياسىنىڭ ۇشاعىنىڭ قۇلاۋىنا بايلانىستى تولىق سوتقا دەيىنگى تەرگەۋ جۇمىستارىن جۇرگىزۋدى, دەنساۋلىق ساقتاۋ مينيسترلىگىنە زارداپ شەككەندەردىڭ تەزىرەك ساۋىعىپ شىعۋى ءۇشىن بارلىق شارالاردى قابىلداۋدى تاپسىردى.
«اپات سەبەپتەرىن تەرگەۋ جونىندەگى ۇكىمەتتىك كوميسسيا 2020 جىلدىڭ 10 قاڭتارىنا قاراي ءوز جۇمىستارىنىڭ الدىن الا قورىتىندىلارىن ۇسىنۋى ءتيىس» دەپ ناقتىلادى ا. مامين.
