داۋرەن ادىلبەكوۆ بيۋدجەت جانە كاسىپكەرلىك زاڭناماسىنىڭ ماسەلەلەرى بويىنشا پرەمەر-ءمينيستردىڭ اتىنا, سونداي-اق سوتتىڭ ارەكەتكە قابىلەتسىز جانە قامقورلىققا مۇقتاج دەپ تانىعان ادامدارى مەن قامقورلىقتاعى ادامداردىڭ زەينەتاقى تولەمدەرى مەن جاردەماقىلارىن ۇتىمدى پايدالانۋ ماسەلەلەرى بويىنشا ەڭبەك جانە الەۋمەتتىك قورعاۋ مينيسترىنە – ەكى دەپۋتاتتىق ساۋال جولدادى.
سەناتور سەرگەي ەرشوۆتىڭ ۇكىمەت باسشىسىنا جولداعان دەپۋتاتتىق ساۋالىندا ءبىلىم بەرۋدى تسيفرلاندىرۋ جانە «كۇندەلىك», ء«بىلىمال» اقپاراتتىق جۇيەلەرىن, «Bilimland.kz» ءبىلىم بەرۋ كونتەنتىن الۋعا ارنالعان ونلاين تۇعىرنامالارىن ەنگىزۋ ماسەلەلەرى قوزعالدى. سەناتور ءبىلىم بەرۋ اقپاراتتىق جۇيەسىنىڭ جۇمىس ىستەۋىنە اسەر ەتەتىن جىلدامدىقتىڭ تومەندىگى, بايلانىستىڭ ساپاسىزدىعى, مەكتەپتەردە ينفراقۇرىلىمنىڭ بولماۋى سياقتى بىرقاتار ماسەلەلەردى اتاپ ءوتتى. وسىنىڭ ءبارى پەداگوگتار مەن اتا-انالار اراسىندا شيەلەنىس تۋعىزادى. «بارلىق مەكتەپتەردى, سونىڭ ىشىندە اۋىلدىق مەكتەپتەردى كەڭجولاقتى ينتەرنەت جەلىسىمەن قامتۋ قاشانعا جوسپارلانۋدا؟ مەكتەپتەردى قوسۋ جوسپارى بار ما؟» دەدى دەپۋتات پرەمەر-مينيسترگە.
قارجى جانە بيۋدجەت كوميتەتىنىڭ توراعاسى ولگا پەرەپەچينا ءوز ساۋالىندا ورتا ءبىلىم بەرۋدى جاڭعىرتۋ ماسەلەلەرىن كوتەردى. سەناتور ەكى جىل بۇرىن قازاقستان مەن حالىقارالىق قايتا قۇرۋ جانە دامۋ بانكى اراسىنداعى قازاقستانداعى ورتا ءبىلىم بەرۋدى جاڭعىرتۋ جوباسىنا 75 ملن. دوللار سوماسىنا قارىز تۋرالى كەلىسىم راتيفيكاتسيالانعانىن ەسكە سالدى. الايدا, ونى ىسكە اسىرۋ جونىندە ءبىلىم جانە عىلىم مينيسترلىگىنىڭ جۇرگىزگەن جۇمىستارى تۋرالى ەسەبى وسى كۇنگە دەيىن جوق بولىپ وتىر. «تيىسىنشە, بۇل جوبانىڭ ەندىگى جەردە ماڭىزى جوق سياقتى اسەر قالدىرادى نەمەسە مينيسترلىك وسى جوبا بويىنشا جۇمىستى ۇيىمداستىرا المايدى», دەپ اتاپ ءوتتى سەناتور.
سەناتور ناريمان تورەعاليەۆ ءال-فارابي اتىنداعى قازۇۋ جانىنداعى جاتاقحانا مەن دارىگەرلىك ورتالىقتىڭ قۇرىلىسى بارىسىنداعى شارتتىڭ بۇزىلۋىنا باس پروكۋروردىڭ نازارىن اۋداردى. ول «ۆرەميا» گازەتىندەگى «پروەكتنو-سمەتنايا ميستيفيكاتسيا» ماقالادا جاريالانعان دەرەكتەردى كەلتىرىپ, ەلىمىزدىڭ ەڭ ءىرى جوعارى وقۋ ورنى جەتى جىل بۇرىن جوبالاردى ازىرلەگەنى ءۇشىن 6 ميلليون دوللار تولەگەنىن, بىراق ءالى كۇنگە دەيىن قۇرىلىستىڭ سالىنباعانى جازىلعانىن جەتكىزدى.
