الماتى اۋدانىنىڭ تۇرعىندارى تۇرعىن ءۇي باعدارلامالارى قاتىسۋ بويىنشا بىرقاتار ماسەلەلەردى كوتەردى. 2019 جىلدىڭ قورىتىندىسى بويىنشا ەلوردا تۇرعىندارىنا 3,5 مىڭ قولجەتىمدى باسپانا بەرىلدى.
«تۇرعىنداردى قولجەتىمدى باسپانامەن قامتاماسىز ەتۋ - ءبىز ءۇشىن باستى مىندەتتەردىڭ ءبىرى. جۇمىستى بىرنەشە باعىت بويىنشا جۇرگىزىپ جاتىرمىز. ءبىرىنشى باعىت تۇرعىن ءۇي الۋ ءۇشىن جەڭىلدىكپەن نەسيە بەرۋدى جانە جالعا بەرىلەتىن تۇرعىن ءۇيدى قامتيدى. 2,5 مىڭ ادامعا پاتەر بەرىلدى. بۇل پاتەرلەر حالىقتىڭ الەۋمەتتىك ءالسىز توپتارىنا, ياعني جەتىم بالالارعا, تولىق ەمەس وتباسىلارعا, ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلارعا, ۇلى وتان سوعىسى مۇگەدەكتەرى مەن قاتىسۋشىلارىنا, كوپ بالالى وتباسىلارعا بەرىلدى.
ەكىنشى باعىت بويىنشا جۇمىس ىستەيتىن جاستارعا 1050 جالعا بەرىلەتىن پاتەر (5 جىلدىق مەرزىمگە) بەرىلدى. بۇل باعدارلامانى كەلەسى جىلى دا جالعاستىرامىز.
ءۇشىنشى باعىت بويىنشا «باقىتتى وتباسى» باعدارلاماسى اياسىندا 700-گە جۋىق نەسيە بەرىلدى. ءتورتىنشى باعىت بويىنشا 1 ملن.تەڭگەلىك تۇرعىن ءۇي سەرتيفيكاتتارى بەرىلدى.
سونىمەن قاتار وتباسىلاردى ەلوردادان وڭىرلەرگە كوشىرۋ باعدارلامالار دا بار. مەملەكەت باسشىسى كەلەسى جىلدان باستاپ قولجەتىمدى تۇرعىن ءۇي قۇرىلىسىنىڭ كولەمىن 3 ەسەگە ارتتىرۋدى تاپسىردى. ايتا كەتۋ قاجەت, جالعا بەرىلگەن تۇرعىن ءۇيدى 5 جىلدان كەيىن بوساتۋ قاجەت ەتىلمەيدى. بۇل ءسىزدىڭ ءۇيىڭىز, بالالارىڭىزعا قالادى», دەدى قالا اكىمى التاي كولگىنوۆ.
سونىمەن قاتار اپاتتى جانە ەسكى ۇيلەردىڭ تۇرعىندارىن كوشىرۋ جۇمىستارى جالعاسىپ جاتىر. مىسالى, 70 ادام 1952 جىلى سالىنعان باراك ۇلگىسىندەگى اپاتتىق ۇيدەن جاڭا ۇيلەرگە كوشىرىلدى. مۇناي بازالارىنا جاقىن ورنالاسقان 39 رازەزدە (بايقوڭىر اۋدانى) 27 ءۇيدىڭ جيىرما تۇرعىنى پاتەر الدى. بارلىق تۇرعىن ءۇي باعىتتارى بويىنشا جۇمىستار جۇيەلى نەگىزدە جۇرگىزىلىپ جاتىر.
قالا اكىمى التاي كولگىنوۆ قالانىڭ بارلىق ءتورت اۋدانىنىڭ تۇرعىندارىمەن كەزدەستى. «اشىق ميكروفون» فورماتىنداعى كەزدەسۋلەر تۇراقتى نەگىزدە وتەدى. جالپى 600-دەن استام سۇراق قويىلدى, ءار ماسەلە جۇمىسقا الىندى.
