ماسەلەن, قىزىلشاعا قارسى ۆاكتسينا شىققان 1960-جىلدارعا دەيىن الەمدە اتالعان اۋرۋمەن جىلىنا 2,6 ميلليون ادام كوز جۇماتىن بولعان. بۇكىل الەمدىك دەنساۋلىق ساقتاۋ ۇيىمىنىڭ مالىمەتىنە سايكەس, 2000-2017 جىلدار ارالىعىندا اتالعان ينفەكتسيالىق اۋرۋدان قايتىس بولۋ دەرەگى 80 پايىزعا ازايعان. وكىنىشكە قاراي, سوڭعى جىلدارى ۆاكتسيناتسيالاۋعا قارسى قوزعالىس سالدارىنان كەيبىر ازاماتتار ەكپە الۋدان ءۇزىلدى-كەسىلدى باس تارتىپ, كىشكەنتاي سابيلەرىنە ەكپە جاساتپاي وتىر. ولاردىڭ كوپشىلىگى الەۋمەتتىك جەلىدەن دالەلدەنبەگەن جانە سەنىمسىز اقپارات كوزدەرىنەن وقىعان, كورگەن مالىمەتتەرگە سۇيەنىپ, ەكپەدەن باس تارتۋدا.
امەريكالىقدجوردج ۆاشينگتون, دجون حوپكينس جانە مەريلەند ۋنيۆەرسيتەتتەرىنىڭ ءبىر توپ عالىمى الەۋمەتتىك جەلىلەردەگى, ونىڭ ىشىندە Facebook جەلىسىندەگى ەكپەدەن باس تارتۋدى ناسيحاتتاۋ جارنامالارىنىڭ ارتىندا قانداي كومپانيالار تۇرعانىن انىقتاعان. ناتيجەسىندە بۇنداي اقپاراتتاردىڭ تارالۋىنا بەلگىلى ءبىر كومپانيالار قارجىلاي دەمەۋشىلىك كورسەتكەن. جەلى وكىلى ەكپەگە قاتىستى جالعان اقپاراتتاردى باقىلاۋعا العانىن مالىمدەگەن. سوندىقتان وسى ماسەلەگە كەلگەندە مۇقيات بولىپ, دۇنيەجۇزىلىك دەنساۋلىق ساقتاۋ ۇيىمىنىڭ اقپاراتتارىنا عانا قۇلاق اسقان ءجون.
قازاقستان ۇلتتىق ەگۋ كۇنتىزبەسىنە سايكەس, وبلىس اۋماعىندا جالپى تۇرعىنداردى جوسپارلى ەكپەلەرمەن قامتۋ — 95 پايىز. الايدا ء ارتۇرلى سەبەپتەرگە بايلانىستى ەكپەدەن باستارتىپ وتىرعان اتا-انالار دا بار. 2009 جىلدان باستاپ 2000-عا جۋىق بالا اتا-انالارىنىڭ قارسىلىعىنان ەكپە الماعان. بۇل اتا-انالار الەۋمەتتىك جەلىلەردەگى ەش دالەلى جوق الىپ-قاشپا اقپاراتتارعا سەنىپ, بالالارىنىڭ دەنساۋلىعىنا ۇلكەن قاۋىپ-قاتەر ءتوندىرىپ وتىر. مىسالى, قازىرگى تاڭدا جالپى الەمدە جانە رەسپۋبليكامىزدا, ونىڭ ىشىندە وبلىس اۋماعىندا قىزىلشا ينفەكتسياسى بويىنشا كۇردەلى ەپيدەميولوگيالىق جاعداي ساقتالىپ وتىر.
2019 جىلدىڭ 1 قاڭتارىنان باستاپ قىزىلشامەن 377 ادام اۋىرسا, ونىڭ ىشىندە 160 بالا بار. اۋىرعانداردىڭ 50 پايىزدان استامى ەكپە الماعان. قىزىلشا — ادامنان ادامعا اۋا تامشىلارى ارقىلى تەز تارايتىن, اسىرەسە سابيلەرگە قاۋىپتى ەمى جوق ينفەكتسيا. ونىڭ الدىن الۋ تەك ۆاكتسينانىڭ كومەگىمەن عانا جۇزەگە اسادى. سوندىقتان, تۇرعىندارعا ايتارىم, ەكپەدەن قورقۋدىڭ ەش نەگىزى جوق. وبلىس اۋماعىندا قىزىلشاعا قارسى بارلىق قاجەتتى تەكسەرۋلەردەن وتكەن, ساپاسى كۋالاندىرىلعان ءۇندىستاندا وندىرىلگەن ۆاكتسينا قولدانىلادى. جالپى ۆاكتسيناتسيادان باس تارتپاۋعا شاقىرامىن. «اۋىرىپ ەم ىزدەگەنشە, اۋىرمايتىن جول ىزدە» دەگەن ءسوزدى ەسىمىزگە الايىق. ۆاكتسيناتسيا اقىسىز, سەرتيفيكاتتالعان. ەگۋ جۇرگىزۋدىڭ بارلىق ساتىلارى دەپارتامەنتتىڭ قاتاڭ باقىلاۋىندا جانە ەكپە جاسايتىن مامانداردىڭ جاۋاپكەرشىلىگى ارنايى نورماتيۆتىك قۇجاتتارمەن بەلگىلەنگەن.
مۇحتار سەرباەۆ,
اقتوبە وبلىسىنىڭ تاۋارلار مەن كورسەتىلەتىن
قىزمەتتەردىڭ ساپاسى مەن قاۋىپسىزدىگىن باقىلاۋ
دەپارتامەنتى باسشىسىنىڭ ورىنباسارى
