ول شاھاردىڭ كەز-كەلگەن جەرىنەن كوزگە كورىنەتىندەي ەتىپ سالىنعان. ستەللانىڭ بيىكتىگى 40 مەتر بولسا, ساعاتتىڭ ديامەترى 4 مەتر. ستەللا سامارقان كىرپىشى مەن مايوليك تاسىنان دايىندالعان. اتالعان «ساعات» ستەللاسى رەسەيدىڭ سانكت-پەتەربۋرگ قالاسىندا جاسالعان. الىپ ساعات ءتىلى نۇر-سۇلتان قالاسىنىڭ ۋاقىت ولشەمىمەن بىردەي ءجۇرىپ وتىرادى. ءاربىر ساعات سايىن قوڭىراۋ سوعىلىپ, زورايتقىش دىبىسپەن بەلگى بەرىلەدى.
مۇنداي الىپ ساعات الەم ەلدەرىنىڭ بەلدى قالالارىندا بار ەكەندىگى بەلگىلى. ماسەلەن, ماسكەۋدەگى كرەملدە, لوندونداعى بيگ-بەندە وسىنداي ساعاتتار ورنالاسقان. سونىمەن قاتار, مەككە قالاسىندا بيىك مۇنارالى ساعاتتار دا بار. تاريحي تارازدىڭ تاڭعاجايىپ كەشەنىنىڭ اۋماعىنان بوي كوتەرگەن «ساعات» ستەللاسى دا كەلۋشىلەردىڭ قىزىعۋشىلىعىن وياتىپ, تۋريستەر تارتۋعا ءوز ىقپالىن تيگىزەتىن بولادى. الىپ ساعات ءۇش بولىكتەن تۇرادى. «ساعات» قۇرىلىسىنىڭ نەگىزگى ىرگەتاسى تورت تۇعىرلى بيىك باعانالارمەن بەكىتىلگەن. نىسان ورتا عاسىرلىق شىعىس ۇلگىسىندە ارلەنگەن.
ايتا كەتۋ كەرەك, اتالعان ستەللا ورناتىلعان اۋماقتا بۇرىن جىر الىبى جامبىل جاباەۆتىڭ ەسكەرتكىشى تۇرعان بولاتىن. كەيىن اقىننىڭ الىپ ەسكەرتكىشى ءوڭىردىڭ باس عيماراتى وبلىس اكىمدىگىنىڭ الدىنداعى الاڭشاعا كوشىرىلدى. كەيىننەن بۇل ورىنعا قانداي ستەللا ورناتۋعا بولاتىندىعى قالا قۇرىلىسىنىڭ كەڭەسىندە تالقىلانىپ, سارالاندى. كەڭەس مۇشەلەرىنىڭ كوپشىلىگىنىڭ قولداۋىمەن اتالعان اۋماققا «ساعات» ستەللاسىن ورناتۋ تۋرالى شەشىم قابىلداندى. ونداعى ماقسات – تاراز ەكى مىڭ جىلدان استام تاريحى بار قالا دەسەك, كەشەندەگى «ساعات» ستەللاسى وتكەن مەن بۇگىننىڭ جانە بولاشاقتىڭ اراسىنداعى بەرىك دانەكەرى, عاسىرلار مەن داۋىرلەردىڭ ولشەمى ەكەندىگىن ايعاقتايدى.
جامبىل وبلىسى
