وسى رەتتە قازان جانە جەلتوقسان ايلارىنىڭ ارالىعىندا شىعىس قازاقستان وبلىسىنىڭ جولدارىنداعى قوزعالىس 72 رەت شەكتەلگەن بولاتىن. جولداردىڭ جابىلۋىنىڭ جيىلىگى بويىنشا ەل وڭىرلەرى اراسىنداعى ەكىنشى ورىن اقمولا وبلىسىنا تيەسىلى. مۇندا جولدارداعى قوزعالىسقا 49 رەت شەكتەۋ قويىلىپتى.
جولدار كوبىنە جولداعى جاعدايدى كورۋگە كەدەرگى كەلتىرەتىن, جول-كولىك وقيعالارىنىڭ تۋىنداۋىنا قاۋىپ توندىرەتىن تۇمان, بوران, جابىسقاق قار, جاڭبىر, اۋا تەمپەراتۋراسىنىڭ تومەندەۋى سياقتى اۋا رايىنىڭ قولايسىز جاعدايلارى سالدارىنان جابىلادى.
قاراشادا شىعىس قازاقستان وبلىسىندا اۋا تەمپەراتۋراسىنىڭ -34 گرادۋسقا دەيىن تومەندەۋى سالدارىنان جولشىلار تاسجولداردى 15 رەت جابۋعا ءماجبۇر بولدى. وڭىردە 12 جىلىتۋ پۋنكتىنىڭ جۇمىس ىستەيتىندىگىن ايتا كەتۋ كەرەك. قازاقستاندا مۇنداي پۋنكتەردىڭ جالپى سانى 124 بىرلىكتى قۇرايدى. بۇدان بولەك, بيىل جولشىلار كوكتايعاققا قارسى جولدارعا شاشىلاتىن قۇمنىڭ 60 مىڭ, تۇزدىڭ 13 مىڭ تەكشە مەترىن دايىنداعان. اۋا رايى قولايسىز كەزدە «قازاقاۆتوجول» جشس جولداردى ءوزىنىڭ ءجىتى باقىلاۋىنا الادى. كاسىپورىن جول تەحنيكاسىنىڭ 1067 بىرلىگىمەن جابدىقتالعان.
قازاقستاندا بارلىعى قىسقى كۇتىپ ۇستاۋ شارالارىمەن اۆتوموبيل جولدارىنىڭ 25 مىڭ شاقىرىمى قامتىلسا, ونىڭ 21,1 مىڭ شاقىرىمى «قازاقاۆتوجول» جشس-ءنىڭ, 3,4 مىڭ شاقىرىمى قايتا قۇرۋ نىساندارىنداعى مەردىگەرلىك ۇيىمداردىڭ جانە 422 شاقىرىمى كۇردەلى جوندەۋدىڭ اۋىسپالى نىساندارىنىڭ قاراماعىندا.
ەسكە سالايىق, جالپى پايدالانىمداعى جولدارداعى قوزعالىستىڭ شەكتەلۋى مەن جابىلۋىنا «QazAvtoJol» ۇك» اق, قر ءىىم توتەنشە جاعدايلار جانە اكىمشىلىك پوليتسيا كوميتەتتەرى جاۋاپتى.
