سول ۋاقىتتان بەرى جامبىل وبلىسى تاريحتىڭ تاعدىرلى كەزەڭدەرىندە دە ءوزىنىڭ بولمىسىن ساقتاپ قالدى. ال ەلىمىز تاۋەلسىزدىك العان جىلداردان بەرگى كەزەڭدە جامبىل وبلىسى ءوزىنىڭ جاڭا تاريحي دامۋ جولىنا ءتۇستى. مەملەكەت باسشىسى قاسىم-جومارت توقاەۆ بيىلعى جىلى جامبىل وبلىسىنا جۇمىس ساپارىمەن كەلگەندە, ءوڭىردىڭ دامۋ بارىسىنا وڭ باعاسىن بەرگەن بولاتىن. بۇل – ءوڭىر ءۇشىن جوعارى باعا.
ەلىمىز ەگەمەندىك العان جىلداردان باستاپ مەملەكەتتىڭ قولداۋىمەن وڭىردە ءوندىرىس دامىپ, اۋىل شارۋاشىلىعى سالاسى العا باستى. تاۋەلسىزدىكتىڭ 28 جىلىندا جامبىل وبلىسىندا 871 الەۋمەتتىك نىسان بوي كوتەرگەن. ونىڭ ىشىندە 245 ءبىلىم, 126 دەنساۋلىق ساقتاۋ, 500-گە تارتا سپورت نىساندارى ەل يگىلىگىنە بەرىلدى. سوڭعى 15 جىلدا وبلىس بيۋدجەتىنىڭ 12 ەسەگە ارتۋى دا مەملەكەتتىڭ قولداۋىنىڭ ناتيجەسىندە بولىپ وتىر. بۇگىندە جامبىل وبلىسىنىڭ اكىمى اسقار مىرزاحمەتوۆتىڭ باستاماسىمەن وڭىردە كوپتەگەن ىلكىمدى ىستەر قولعا الىنۋدا. اسىرەسە جەرگىلىكتى تۇرعىنداردىڭ الەۋمەتتىك جاعدايىن كوتەرۋ باستى نازاردا. بۇل رەتتە وبلىستا جۇزەگە اسىپ جاتقان «قاراپايىم زاتتار ەكونوميكاسىن» قارىشتى دامىتۋ باعىتىنداعى قاناتقاقتى جوباسى ۇكىمەت ۇيىنەن قولداۋ تاپتى. وبلىستىڭ ون اۋدانىنان ءبىر-ءبىر اۋىلدان تاڭدالىپ الىنىپ, ەل تۇرمىسىن تىكتەۋ باعىتىندا جۇمىستار جۇرگىزىلۋدە. سونىمەن قاتار جىل باسىنان بەرى 430 مىڭ شارشى مەتر تۇرعىن ءۇي پايدالانۋعا بەرىلدى. سونداي-اق كوپ بالالى وتباسىلارعا 142 پاتەر ساتىپ الۋعا رەسپۋبليكالىق بيۋدجەتتەن 1 ميلليارد 191,0 ميلليون تەڭگە قارجى قاراستىرىلىپ, قازىرگى تاڭدا مەملەكەتتىك ساتىپ الۋ جۇمىستارى جۇرگىزىلۋدە. بيىل كوپ بالالى وتباسىلار ءۇشىن تاراز قالاسىندا 8 جاتاقحانا سالىنۋدا. جىل سوڭىنا دەيىن 6 جاتاقحانا پايدالانۋعا بەرىلسە, قالعان 2 جاتاقحانا كەلەسى جىلى بەرىلەدى. بۇدان بولەك, تاراز قالاسىنىڭ ساۋلەتتىك كەلبەتىن ارتتىرۋ, اۋداندار مەن اۋىلداردى كوركەيتۋ, سول جەردەگى حالىقتىڭ تالاپ-تىلەگىن قاناعاتتاندىرۋ ماقساتىندا دا كوپتەگەن جۇيەلى جۇمىس اتقارىلۋدا. تاراز قالاسىنىڭ ورتالىعىنان سالىنىپ جاتقان «شاحريستان» كەشەنىنىڭ ءوزى كونە تارازدىڭ زاماناۋي كەلبەتىن جاساعان ايشىقتى ونەر دەۋگە بولادى. بيىل – جامبىل وبلىسىنىڭ 80 جىلدىعى. ايتۋلى كۇنگە وراي, وبلىس اكىمى اسقار مىرزاحمەتوۆتىڭ باستاماسىمەن ءوڭىر بويىنشا 80 نىساندى اشۋ جوسپارلانىپ وتىر. سونىمەن قاتار اۋليەاتا ءوڭىرىنىڭ تاريحىنان سىر شەرتەتىن تۇلعالار شىعارماشىلىعىن قامتىعان 80 تومدىق كىتاپ جارىق كوردى.
ەل ەرسىز بولمايدى. قازاقتىڭ رۋحانياتى مەن ونەرىنە ولشەۋسىز ۇلەس قوسقان, مەملەكەتتىڭ دامۋىنا ايرىقشا ەڭبەك سىڭىرگەن تۇلعالار دا جامبىل وبلىسىنان كوپتەپ شىقتى. قازاقتىڭ كورنەكتى جازۋشىسى, مەملەكەتتىك سىيلىقتىڭ لاۋرەاتى اكىم تارازي جامبىل وبلىسىنىڭ 80 جىلدىعىنا وراي, ءوزىنىڭ تۋعان جەرگە دەگەن ىستىق ىقىلاسىن جەتكىزدى. «تۋعان جەرىم, جامبىل ءوڭىرى مەنىڭ تاعدىرىمدا ايرىقشا ورىن الادى. ءاربىر جەتىستىگىنە قۋانىپ وتىرامىن. ءوزىم دە جامبىلعا ءجيى بارىپ تۇرامىن. تۋعان جەر, وسكەن ەل بارىنەن قىمبات», دەيدى جازۋشى. «جامبىل وبلىسى 80-گە تولىپ وتىر. بۇل ۇلكەن مەرەيتوي. ءبىزدىڭ ەلدە ەڭبەكقور, قاراپايىم حالىق تۇرادى. مەن اۋليەاتانى, سول جەردەگى حالىقتى جاقسى كورەمىن. قۇشاعىما سىيسا, ءبارىن دە قۇشاقتاعىم كەلەدى», دەيدى قازاقستاننىڭ حالىق ءارتىسى تۇڭعىشباي ءال-تارازي.
بۇگىندە جامبىل ءوڭىرى ورلەۋ كەزەڭىندە. قازىرگى كەزدە ايماقتا اتقارىلىپ جاتقان ناتيجەلى جۇمىستار سونىڭ ايعاعى. كۇن سايىن تاراز شاھارىنىڭ ساۋلەتى ارتىپ, اۋداندار مەن اۋىلداردىڭ ءباسى بيىكتەپ كەلەدى.
جامبىل وبلىسى
