قورداي اۋىلىنداعى باقىلاۋ-وتكىزۋ پۋنكتتەرىنە بارعاننان كەيىن ءماجىلىس جانە قىرعىزستان جوگوركۋ كەنەشى دەپۋتاتتارىنىڭ بىرلەسكەن وتىرىسى ءوتتى.
ءىس-شارانى اشقان ءماجىلىس توراعاسىنىڭ ورىنباسارى ۆلاديمير بوجكو قارالىپ وتىرعان ماسەلەنىڭ الەۋمەتتىك-ەكونوميكالىق باعىتىنىڭ ماڭىزدىلىعىن اتاپ ءوتىپ, ەلىمىزدىڭ جانە كورشى قىرعىزستان ازاماتتارىنىڭ ەسكەرتۋلەرىنە نازار اۋداردى. اتاپ ايتقاندا, ولار شەكارا وتكىزۋ پۋنكتتەرىندە, اسىرەسە جاز مەزگىلىندە, ءالى كۇنگە دەيىن كەزدەسەتىن ۇزاق كەزەككە شاعىمدانۋدا. كەدەندىك راسىمدەۋدىڭ جانە شەكارانى باقىلاۋدىڭ باياۋ جۇرگىزىلۋى, جەمقورلىق, كونتراباندا جانە ينفراقۇرىلىمنىڭ تاپشىلىعى فاكتىلەرى دە بار.
وتىرىس بارىسىندا ۇلتتىق قاۋىپسىزدىك كوميتەتى توراعاسىنىڭ ورىنباسارى-شەكارا قىزمەتى ديرەكتورى دارحان ءدىلمانوۆ, يندۋستريا جانە ينفراقۇرىلىمدىق دامۋ, قارجى مينيسترلىكتەرىنىڭ, سونداي-اق جامبىل وبلىسى اكىمدىگىنىڭ جانە قىرعىز تاراپىنىڭ مەملەكەتتىك ورگاندارىنىڭ وكىلدەرى بايانداما جاسادى.
كەزدەسۋدە ەكى ەل دەپۋتاتتارى شەكارالىق ىنتىماقتاستىقتى دامىتۋ تۋرالى زاڭنامانى جەتىلدىرۋ ماسەلەلەرىن تالقىلادى.
وتىرىستى قورىتىندىلاي كەلە, ءماجىلىس ۆيتسە-سپيكەرى ۆ.بوجكو مەملەكەت باسشىسى قاسىم-جومارت توقاەۆتىڭ ۇستىمىزدەگى جىلدىڭ 27 قاراشاسىندا قىرعىزستانعا جاساعان مەملەكەتتىك ساپارىنىڭ ناتيجەلەرىن ەسكەرە وتىرىپ, قىرعىز تاراپىمەن بىرلەسكەن ءىس-قيمىل جاساۋ قاجەتتىگىن اتاپ ءوتتى.
شۋ وزەنى ارقىلى وتەتىن قازاقستاننىڭ «قاراسۋ» – قىرعىز رەسپۋبليكاسىنىڭ «اق تىلەك» وتكىزۋ بەكەتتەرىنىڭ اراسىنداعى جاڭا كوپىر قۇرىلىسى تۋرالى ۇكىمەتارالىق كەلىسىمدى جۇزەگە اسىرۋ, سونداي-اق «بەساعاش-اۆتوجول» (قازاقستان) جانە «كيچي-كاپكا – اۆتوجول» (قىرعىزستان) وتكىزۋ پۋنكتتەرىنىڭ جۇمىسىن جانداندىرۋ, سونداي-اق «كەگەن-اۆتوجول» (قازاقستان) مەن «قارقىرا-اۆتوجول» (قىرعىزستان) وتكىزۋ پۋنكتتەرىنىڭ جۇمىس ۋاقىتىن ۇلعايتۋ ەرەكشە ماڭىزدى بولىپ تابىلادى.
وتىرىس بارىسىندا ءماجىلىس ۆيتسە-سپيكەرى شەكارا وتكىزۋ پۋنكتتەرىنىڭ تيىمدىلىگىن ارتتىرۋ جانە شەكارادان ءوتۋ كەزىندە ەكى ەلدىڭ ازاماتتارى ءۇشىن قولايلى جاعداي جاساۋ ماقساتىندا وسىنداي كەزدەسۋلەردى جالعاستىرۋدى ۇسىندى. سونداي-اق پروبلەمالىق ماسەلەلەردى شەشۋدى تۇراقتى تۇردە پارلامەنتتىك باقىلاۋدا ۇستاۋ قاجەتتىگىن ايتتى.
ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتى ۇيىمداستىرعان شارا وتكىزۋ پۋنكتتەرىنە بارۋ تۋرالى بىرلەسكەن كەلىسىم اياسىندا قىرعىزستان جوگوركۋ كەنەشى دەپۋتاتتارىنىڭ قاتىسۋىمەن ءوتتى.
