ايماقتار • 19 جەلتوقسان، 2019

جامبىل وبلىسىندا «ارقان» ءموبيلدى كەشەنى قولدانىسقا ەنگىزىلۋدە

82 رەت كورسەتىلدى

«باتىس ەۋروپا-باتىس قىتاي» رەسپۋبليكالىق ماڭىزى بار تاسجولىنىڭ جامبىل اۋدانى اۋماعىندا «ارقان» اۆتوماتتاندىرىلعان ءموبيلدى كەشەنىن تانىستىرۋ شاراسى ءوتتى.

بۇل ەلىمىز بويىنشا جامبىل وڭىرىندە قولعا الىنىپ وتىرعان جوبا. اتالعان شاراعا جامبىل وبلىستىق پوليتسيا دەپارتامەنتىنىڭ باستىعى، پوليتسيا پولكوۆنيگى ارمان ورازاليەۆ جانە دەپارتامەنتتىڭ جەكە قۇرامى قاتىستى. «وڭىرىمىزدە جول-كولىك وقيعالارىنىڭ الدىن الۋدا پوليتسيا دەپارتامەنتىمەن بىرقاتار ءىس-شارالار  اتقارىلۋدا. وسى ماقساتتا جامبىل وبلىسى اكىمىنىڭ قولداۋىمەن رەسپۋبليكالىق ماڭىزى بار اۆتوجولداردا قىزمەت كورسەتەتىن پاترۋلدىك پوليتسيا كولىكتەرىنە ون بىرلىك «ارقان» ءموبيلدى كەشەنىن ورناتىپ، قولدانىسقا بەرۋدى جوسپارلاپ وتىرمىز. ءموبيلدى كەشەن وبلىستىڭ جول-كولىك وقيعاسى كوپ ورىن الاتىن اۋماقتارىندا قىزمەت كورسەتەتىن بولادى. سونداي-اق اۆتوماتتاندىرىلعان رەجيمدە پوليتسيا قىزمەتكەرلەرىنىڭ قاتىسۋىنسىز باقىلاۋ جۇرگىزەدى. ايتا كەتەرلىك جايت، اتالعان قۇرىلعى رەسپۋبليكا بويىنشا ءبىزدىڭ وبلىستا العاش رەت قولدانىسقا ەنگىزىلۋدە. كەشەندى قولدانىسقا ەنگىزۋ ارقىلى ءبىز جولداعى اپاتتىلىق دەڭگەيىن تومەندەتۋگە قول جەتكىزەمىز دەگەن ويدامىز»، دەگەن ارمان ورازاليەۆ اتالعان قۇرىلعىنىڭ مۇمكىندىكتەرىن جان-جاقتى تانىستىردى.

پوليتسيا پولكوۆنيگى «ارقان» ءموبيلدى كەشەنى جولدىڭ باقىلاناتىن ايماعى ارقىلى وتەتىن بارلىق كولىكتەردىڭ نومىرلىك بەلگىلەرىن، ءتۇسى مەن ماركاسىن تانۋعا، بەلگىلەنگەن جىلدامدىقتى ارتتىرۋ دەرەكتەرىن تىركەۋگە قابىلەتتى ەكەنىن اتاپ ءوتتى. سونىمەن قاتار بۇل قۇرىلعىنىڭ كومەگىمەن ايىپپۇل تۋرالى اقپاراتتار دەرەكتەردى وڭدەۋ ورتالىعىنا جانە باس پروكۋراتۋرانىڭ اكىمشىلىك وندىرىستەرىنىڭ بىرىڭعاي تىزىلىمىنە اۆتوماتتى تۇردە جىبەرىلەدى ەكەن. «پوليتسيا قىزمەتكەرىنىڭ جۇرگىزۋشىمەن قارىم-قاتىناسىن بولدىرماي، سىبايلاس جەمقورلىقتىڭ جولىن كەسۋگە مۇمكىندىك بەرەدى. بۇدان بولەك، كولىك قۇرالىنىڭ تانىلعان نومىرلىك بەلگىسى بويىنشا پوليتسيانىڭ ىزدەستىرۋىندە نەمەسە جۇرگىزۋشىنىڭ بۇرىن جاساعان اكىمشىلىك قۇقىق بۇزۋشىلىعى ءۇشىن بورىشكەرلەر تىزىمىندە بولۋى اۆتوماتتى تۇردە تەكسەرىلەدى. بۇل جاعدايدا ءموبيلدى كەشەندەگى پوليتسيا ينسپەكتورى زاڭعا سايكەس قۇقىق بۇزۋشىعا قاتىستى جەدەل ارەكەت ەتۋ شارالارىن قابىلداي الادى»، دەدى ارمان ورازاليەۆ.

«ارقان» ءموبيلدى كەشەنى اعىمداعى جىلدىڭ 20 جەلتوقسانىنان باستاپ ءبىر اي كولەمىندە تەستتىك رەجيمدە جۇمىس ىستەيتىن بولادى. كورسەتىلگەن مەرزىمدە جول-كولىك وقيعالارىنىڭ دەرەگى تومەندەپ، وڭ ناتيجەگە قول جەتكىزگەن جاعدايدا ءموبيلدى قۇرىلعىنىڭ سانىن ارتتىرۋ جوسپارلانىپ وتىر.

سوڭعى جاڭالىقتار

ۇقساس جاڭالىقتار