كەزدەسۋدە «قازاق بالىق شارۋاشىلىعى» زتب اتقارۋشى ديرەكتورىنىڭ مىندەتىن اتقارۋشى سەرىك تەمىرحانوۆ بالىق وسىرۋمەن اينالىساتىن كاسىپكەرلەر مەن فەرمەرلەردىڭ نەگىزگى ماسەلەلەرىنە نازار اۋداردى. ولاردىڭ قاتارىندا بالىق ونىمدەرى اينالىمىنىڭ ەسەپكە الىنباعان كولەمىنىڭ اۋقىمى, شيكىزات تاپشىلىعى, سۋدا ءوسىرۋدى دامىتۋ دەڭگەيىنىڭ تومەندىگى, ەكسپورت اياسىنىڭ تارلىعى, عىلىمي-زەرتتەۋ ينستيتۋتتارىنىڭ سالاداعى وزەكتى ماسەلەلەردەن الشاقتىقتىعى بار.
س.تەمىرحانوۆ اۋىل شارۋاشىلىعى مينيسترلىگى تاراپىنان سالانى اكىمشىلەندىرۋدىڭ جەتىسپەۋشىلىگىنە نازار اۋداردى, ونىڭ ايتۋىنشا, «ەلىمىزدىڭ اۋىل شارۋاشىلىعى يندۋسترياسىنداعى بالىق شارۋاشىلىعىنىڭ ءرولى تۋرالى تۇسىنىك ءالسىز بولىپ وتىر».
سالا وكىلدەرىنىڭ باعالاۋى بويىنشا, بالىق ونىمدەرى اينالىمىنىڭ 70 پايىزى زاڭدى بازاردان سىرت قالىپ, «كولەڭكەلى سەكتوردان» ورىن العان. س.تەمىرحانوۆ بالىق پەن بالىق ونىمدەرىن شارۋاشىلىقتاردان دۇكەن سورەلەرىنە دەيىن قاداعالاۋ جۇيەسىن ەنگىزۋ جاعدايدى جاقسارتا الار ەدى دەپ ەسەپتەيدى.
سەنات توراعاسى د.نازارباەۆا جۇمىس كەزدەسۋلەرىنىڭ قورىتىندىسى بويىنشا اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنە اۋىل شارۋاشىلىعى ونىمدەرىن وندىرۋشىلەردىڭ وكىلدەرى كوتەرگەن وزەكتى ماسەلەلەردى زەردەلەۋدى جانە ولاردى 2020 جىلعا جوسپارلانعان پارلامەنتتىك تىڭداۋلاردا تالقىلاۋعا دايىنداۋدى تاپسىردى.
