قازاقستان رەسپۋبليكاسىنىڭ مالايزياداعى ۋاقىتشا سەنىمدى وكىلى دانيار سارەكەنوۆ دۇنيەجۇزىلىك يسلام ەكونوميكالىق فورۋمنىڭ (ديەف) باس حاتشىسى تان سري احماد فۋزي ابدۋل رازاكپەن كەزدەستى, دەپ حابارلادى قر ءسىم-ءنىڭ ءباسپاسوز قىزمەتى.
كەزدەسۋ بارىسىندا قازاقستان مەن فورۋم اراسىندا قالىپتاسقان ءتيىمدى ىنتىماقتاستىق اتاپ ءوتىلدى. تاراپتار عالامدىق ەكونوميكادا ازيا ەلدەرىنىڭ ءرولى ارتا تۇسكەنىن نازارعا الا وتىرىپ, الداعى ۋاقىتتاعى قارىم-قاتىناستاردىڭ پەرسپەكتيۆالارىن تالقىلادى.
ديەف باس حاتشىسى قازاقستاندى فورۋمنىڭ سەنىمدى ارىپتەسى جانە بەلسەندى قاتىسۋشى رەتىندە اتاپ ءوتىپ, قازاقستاندىق تاراپتى 2013 جىلى 29-31 قازاندا لوندوندا وتەتىن «اۋىسپالى الەم: جاڭا قاتىناستار» اتتى 9-شى سەسسياسىنا قاتىسۋعا شاقىردى.
ا.فۋزي لوندون فورۋمىندا تاياۋ شىعىس, وڭتۇستىك پەن وڭتۇستىك-شىعىس ازيا جانە افريكا ەلدەرىنەن مەملەكەت جانە ۇكىمەت باسشىلارىنىڭ قاتىسۋى كۇتىلەتىنى تۋرالى ايتتى.
ديەف مۇسىلمان ەلدەرىنىڭ ىسكەرلىك ءارىپتەستىگىنىڭ الەۋەتىن دامىتۋعا ارنالعان ۇنقاتىسۋ الاڭى رەتىندە 2003 جىلى پۋتراجايادا (مالايزيا) وتكەن يسلام ىنتىماقتاستىعى ۇيىمى مەملەكەت باسشىلارىنىڭ 11-ءشى ءسامميتى بارىسىندا قۇرىلعان بولاتىن.
