قابىلداۋعا كەلگەن تاراز قالاسىنىڭ تۇرعىنى, زەينەتكەر نازىم نۇرباەۆا ءوزى تۇراتىن زاۆودسكايا كوشەسىنىڭ 2-بۇرىلىسىن جارىقتاندىرۋ ماسەلەسىن كوتەردى. بۇل ورايدا جامبىل وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى نۇرلان الدامجاروۆ اتالعان كوشەنىڭ كەلەسى جىلى تولىعىمەن جارىقتاندىرىلاتىنىن جەتكىزدى. ءوز سوزىندە اسقار مىرزاحمەتوۆ تۇگەندەۋ بارىسىندا قالا بويىنشا 700-دەن استام كوشە-بۇرىلىستاردىڭ انىقتالعانىن, جالپى شاھارداعى 1500 كوشەگە زەردەلەۋ ۇيىمداستىرىپ, تولىعىمەن جارىقتاندىرۋ شارالارىن ۋاقىت سوزباي ورىنداۋدىڭ ماڭىزدىلىعىنا توقتالدى.
ول ءۇشىن تاراز قالاسىنىڭ اكىمى ايتقازى قارالاباەۆقا ناقتى مىندەتتەر جۇكتەپ, ەڭ اۋەلى تۇرعىنداردىڭ اسا الاڭداۋشىلىعىن تۋعىزىپ وتىرعان وسىنداي ءتۇيىندى تۇيتكىلدەردى وڭىنان تارقاتۋعا كۇش سالۋ كەرەكتىگىن ەسكەرتتى. بۇل باعىتتاعى جۇمىستاردى وڭتايلاندىرۋ ارقىلى از ۋاقىتتا اتقارۋدىڭ جولدارىن قاراستىرۋ كەرەكتىگىن ايتتى.
ال, قالدىكۇل دوسجانوۆا قالاداعى «قاراتاۋ» شاعىن اۋدانىنداعى №32 كوپقاباتتى تۇرعىن ءۇيدىڭ كۇردەلى جوندەۋدەن قاشان وتەتىنىن سۇرادى. اكىم كەلەسى جىلى شاھارداعى 80 ءۇي جاڭعىرتۋدان وتەتىنىن تىلگە تيەك ەتىپ, اتالعان تۇرعىن ءۇي دە سول تىزىمدە بار ەكەنىن ايتتى. اتالعان كوپقاباتتى تۇرعىن ءۇي ماڭىنداعى اعىن سۋ جۇيەسىنىڭ ماسەلەسىنە دە ايرىقشا كوڭىل بولگەن وبلىس اكىمى قالاداعى بارلىق سۋ جۇيەلەرىنىڭ تازالىعىن بارلاۋ كەرەكتىگىن تاپسىردى. سونداي-اق, قابىلداۋعا كەلگەن كوپبالالى انا شاكەن احمەتجانوۆا ءوزىنىڭ 2010 جىلدان بەرى تۇرعىن ءۇي كەزەگىندە تۇرعانىن ايتتى. بۇگىندە اتالعان تىزىمدە ول 33-بولىپ تۇر ەكەن. ناتيجەسىندە كوپبالالى انا اعىمداعى جىلدىڭ سوڭىنا دەيىن بىرقاتار تارازدىقتارمەن بىرگە قونىس تويىن تويلايتىن بولدى. وعان جۋىق ارادا ارەندالىق نەگىزدەگى پاتەر كىلتى تابىستالادى.
قابىلداۋعا جازىلعان وزگە تۇرعىندار مەكتەپ وقۋشىلارىنىڭ تاسىمالى, جۇمىسقا ورنالاسۋ سەكىلدى ماسەلەلەردى كوتەردى. ول بويىنشا اكىم ءتيىستى باسشىلارعا ناقتى حاتتامالىق تاپسىرمالار جۇكتەدى. ال, تالانت نۇرعوجاەۆتىڭ تاجىك-اۋعان شەكاراسىندا قۇربان بولعان بەس جاۋىنگەرگە ەسكەرتكىش ورناتۋ ۇسىنىسى دا قولداۋعا يە بولدى. اسقار مىرزاحمەتوۆ اتالعان شەكارادا اسكەري بورىشىن وتەگەن 700-دەن استام جامبىلدىقتىڭ بار ەكەنىن ەسكەرىپ, اتالعان ۇسىنىس ەسكەرۋسىز قالمايتىنىن, ەسكەرتكىشتى «جەڭىس» ساياباعىنان اشۋ جۇمىستارى جۇرگىزىلەتىن جەتكىزدى.
جامبىل وبلىسى
