مەملەكەت باسشىسى نۇرسۇلتان نازارباەۆ قازاقستان رەسپۋبليكاسىنىڭ باس پروكۋرورى اسحات داۋىلباەۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
باس پروكۋرور ءبىرىنشى جارتىجىلدىقتىڭ قورىتىندىلارى بويىنشا ەلدەگى زاڭدىلىقتىڭ جاي-كۇيى مەن قۇقىقتىق ءتارتىپ تۋرالى حاباردار ەتتى, سونداي-اق مەملەكەت باسشىسىنىڭ تاپسىرمالارىنىڭ ورىندالۋ بارىسى جونىندە باياندادى.
نۇرسۇلتان نازارباەۆ ەلدەگى كريمينوگەندىك احۋالدى جاقسارتۋ جونىندەگى جۇمىستى ودان ءارى جانداندىرۋعا, سونداي-اق قۇقىق قورعاۋ ورگاندارى قىزمەتىنىڭ تيىمدىلىگىن ارتتىرۋعا نازار اۋداردى.
باس پروكۋرور التى ايدىڭ قورىتىندىسى بويىنشا اشىلماعان قىلمىستىڭ ازايعانى تۋرالى ءمالىم ەتتى. بۇل رەتتە ول بارلىق قىلمىستى تىركەۋ ناقتى كورىنىستى ءبىلىپ وتىرۋعا جانە اناعۇرلىم پروبلەمالى ۋچاسكەنى انىقتاپ, ۋاقتىلى الدىن الۋ شارالارىن قابىلداۋعا مۇمكىندىك تۋعىزاتىنىن اتاپ ءوتتى.
– ءبىرىنشى جارتىجىلدىقتا ءبىز 177 مىڭ قىلمىستى, سونىڭ ءىشىندە توناۋ, ۇساق بۇزاقىلىق ءتارىزدى قىلمىس تۇرلەرىن تىركەدىك. ونىڭ ءبارى ەسەپكە الىنىپ, ولار بويىنشا تەكسەرىس جۇرگىزىلەدى. قازىرگى ۋاقىتتا اۋىر جانە اسا اۋىر قىلمىس 16 پايىزعا ازايعانى, ادام ءولىمى, قاراقشىلىق پەن توناۋشىلىق سانى دا ازايا باستاعانى اتاپ وتىلۋدە, – دەدى ا.داۋىلباەۆ.
بۇعان قوسا, ا.داۋىلباەۆ ازاماتتاردىڭ ەڭبەك قۇقىقتارىن, جەتىم بالالار قۇقىقتارىن قورعاۋ سالالارىنداعى زاڭدىلىقتىڭ جاي-كۇيى, ۇيىمداسقان قىلمىسقا, ءدىني ەكسترەميزم مەن تەرروريزمگە قارسى ءىس-قيمىل جونىندە جۇرگىزىلگەن جۇمىستار, سىبايلاس جەمقورلىق پەن بيۋدجەت قاراجاتىن ۇرلاۋ فاكتىلەرى بويىنشا وزەكتى قىلمىستىق ىستەردىڭ تەرگەلۋ بارىسى تۋرالى حاباردار ەتتى.
كەزدەسۋ قورىتىندىسىندا مەملەكەت باسشىسى زاڭدىلىق پەن قۇقىقتىق ءتارتىپتى قامتاماسىز ەتۋ جونىندەگى جۇمىستى جالعاستىرۋدى, سونداي-اق ازاماتتاردىڭ, شاعىن جانە ورتا بيزنەس وكىلدەرىنىڭ قۇقىقتارىن, مەملەكەت پەن قوعام مۇددەلەرىن قورعاۋدى كۇشەيتۋدى تاپسىردى.
