جوبانىڭ نەگىزگى ماقساتى – جاڭا زامان ادەبيەتىنە كوپشىلىكتىڭ قىزىعۋشىلىعىن ارتتىرۋ ءارى جاستاردىڭ شىعارماشىلىعىنىڭ شىڭدالۋىنا جول اشۋ.
بايقاۋعا جاس اقىن-جازۋشىلار تاراپىنان قىزىعۋشىلىقتىڭ ارتىپ كەلە جاتقانىن جىل سايىن تالاپكەرلەردىڭ كوبەيۋىنەن دە بايقاۋعا بولاتىنداي. مىسالى, 2015 جىلى 120 جۇمىس تاپسىرىلسا, بيىل 170 شىعارما ۇسىنىلىپتى. ۇزدىك شىعارمالار «جىلدىڭ ۇزدىك پروزاسى», «جىلدىڭ ۇزدىك پوەزياسى», «جىلدىڭ ۇزدىك دراماتۋرگياسى», «جىلدىڭ ۇزدىك بالالارعا ارنالعان شىعارماسى» جانە جاستار جىلىنا ارنايى جۇلدە – « ۇلى دالانىڭ جاسامپاز ۇرپاعى» اتالىمدارى بويىنشا انىقتالعان.
ماراپاتتاۋ راسىمىندە ءسوز العان تۇڭعىش پرەزيدەنت –ەلباسى قورىنىڭ اتقارۋشى ديرەكتورى اسەت يسەكەشەۆ قازىلار القاسىنىڭ قۇرامىندا ەلىمىزگە بەلگىلى مادەني قايراتكەرلەرى, جازۋشىلار مەن جۋرناليستەر بولعانىن, ولار شىعارمالاردى باعالاۋ بارىسىندا بىرنەشە كريتەريگە سۇيەنگەنىن ايتىپ ءوتتى. «ەلباسى نۇرسۇلتان نازارباەۆ «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» ماقالالارىندا رۋحانياتقا كوپ كوڭىل ءبولدى. بۇگىندە ەلىمىزدە دارىندى جاستارعا قولداۋ مىقتى. ەلباسى قورى قاشاندا شىعارماشىل جاستارعا قولداۋ ءبىلدىرىپ, ءتۇرلى بايقاۋلار وتكىزۋدە. الداعى ۋاقىتتا دا بۇل جۇمىستى جالعاستىرادى. قازاق كوركەم ءسوز ونەرىنىڭ شەبەرلەرى كوبەيە بەرسىن» دەدى ءا.يسەكەشەۆ.
سونىمەن ۇزدىك شىعارمالاردىڭ اۆتورلارىن ءا.يسەكەشەۆ باستاپ, پارلامەنت دەپۋتاتتارى, قوعام, مادەنيەت جانە ونەر قايراتكەرلەرى ماراپاتتادى.
«التىن توبىلعى» بايقاۋىنىڭ قورىتىندىسى بويىنشا «جىلدىڭ ۇزدىك پروزاسى» اتالىمىندا دوسحان جىلقىباي, قانات ابىلقايىر قاتارلى جاس جازۋشىلار توپ جاردى. «جىلدىڭ بالالارعا ارنالعان ۇزدىك شىعارماسى» بويىنشا ميراس اسان, اسىلان تىلەگەنوۆ جانە مارات سەيىلحانوۆتار جۇلدەگە يە بولدى. جوعارىدا اتى اتالعان جەڭىمپازداردىڭ ارقايسىسى 1 ميلليون تەڭگەنىڭ سەرتيفيكاتتارىن الدى. جۇلدە قورى 2 ميلليون تەڭگەلىك «جىلدىڭ ۇزدىك پوەزياسى» جانە «جىلدىڭ ۇزدىك دراماسى» اتالىمدارىنىڭ سەرتيفيكاتتارىن بەكزات سمادياروۆ پەن ارشىن نۇرباقىت يەلەندى. ال جاستار جىلىنا ارنايى تاعايىندالعان « ۇلى دالانىڭ جاسامپاز ۇرپاعى» اتالىمىنىڭ بايگەسىن نۇرتاس تۇرعانبەك جەڭىپ الدى. وعان 3 ميلليون تەڭگەنىڭ سەرتيفيكاتى تاپسىرىلدى.
