گاەتانو دونيتسەتتيدىڭ ەڭ تانىمال تۋىندىلارىنىڭ ءبىرى «دون پاسكۋالە» وپەراسىن 1955 جىلدان كەيىن قازاق ساحناسىندا يتالياندىق رەجيسسەر, ستسەنوگراف, كوستيۋمدەر بويىنشا ديزاينەر ماتتەو ماتستسونە ساحنالاپ وتىر.
وسى ارادا وقىرمان ءۇشىن دە, كورەرمەنگە دە قىزىقتى دەرەكتەردى ايتا كەتۋگە بولادى. «دون پاسكۋالە» دونيتسەتتيدىڭ ەڭ سوڭعى وپەراسى دەپ ەسەپتەلىنەدى. شىندىعىنا كەلسەك, گاەتانو دونيتسەتتي اتالمىش وپەرادان كەيىن دە ءۇش بىردەي وپەرا جازعان. الايدا, ول قويىلىمداردىڭ بارلىعى دا قازىر ساحنادا جوق. سوندىقتان دا «دون پاسكۋالە» دونيتسەتتيدىڭ سوڭعى شىعارماسى دەپ ەسەپتەلىنەدى. «دون پاسكۋالە» تانىمالدىلىعى جاعىنان – دونيتسەتتيدىڭ «ماحاببات سۋسىنى» مەن «ليۋچي دي لاممەرمۋر» تۋىندىلارىنان كەيىنگى ورىندا تۇر.
بۇگىنگى تاڭدا «دون پاسكۋالە» الەمدەگى ەڭ تانىمال يتالياندىق جيىرما وپەرانىڭ بىرەۋى جانە جىل سايىن 150 ەلدىڭ تەاترىندا قويىلادى.
«دون پاسكۋالە» ماعان الماتى قالاسىمەن جانە ونىڭ تاماشا تەاترىمەن تانىسۋعا مۇمكىندىك تۋعىزدى. مەنىڭ بۇرىن دا قازاقستانعا جولىم تۇسكەن بولاتىن. ال الماتى جانە ول وسىنداعى بۇكىل ۇلتتىڭ مادەني استاناسى ەكەندىگى جايلى ءجيى ەستۋشى ەدىم. قازىر الماتىنىڭ نەگە ولاي ەسەپتەلىنەتىنىن بىلەمىن دە, تۇسىنەمىن دە... مەن عاجايىپ تالانتتاردىڭ, كوسموپوليت ادامداردىڭ ورتاسىنا تاپ بولدىم. جانە بۇلار وزدەرىنىڭ مادەني بولمىسى مەن ەجەلدەن كەلە جاتقان داستۇرلەرىن دە ساقتاپ قالعان. بۇل تەاترداعى جۇمىسىم مەن ءۇشىن ناعىز اسا تارتىمدى تاجىريبە بولدى. ماسەلەن, بۇل جەردە سۋرەتشى ءوزىن ەركىندىكپەن تولىققاندى كورسەتە الادى. جانە ول ءوزىن ەستيتىنىن بىلەدى جانە تۇسىنەدى», دەيدى يتالياندىق رەجيسسەر, ستسەنوگراف, كوستيۋمدەر بويىنشا ديزاينەر ماتتەو ماتستسونە.
تالانتتى يتالياندىق رەجيسسەردىڭ ارتىقشىلىعى سوندا, ول ساحنالىق كوستيۋمدەردىڭ قىر-سىرىن مەڭگەرگەن مامان عانا ەمەس, اكتەرلىك شەبەرلىك بويىنشا مىقتى ۇستاز. ال بۇل ءبىزدىڭ قازاقتىڭ وپەرا انشىلەرىنە يتاليان تىلىندە ساحناعا شىققان ء«ۇش ءبولىمدى دراما-بۋففانى» ناشىنە كەلتىرىپ ورىنداۋعا عانا ەمەس, اكتەرلىق تۇرعىدا دا شەبەرلىكتەرىن شىڭداي تۇسۋگە سەپتەسىپ وتىر.
