ايماقتار • 12 جەلتوقسان، 2019

الماتى وبلىسىندا سۋبسيديا الماعان شارۋا 3 جىلدان بەرى ادىلدىك ىزدەپ ءجۇر

74 رەتكورسەتىلدى

«Egemen Qazaqstan» گازەتىنىڭ الماتى وبلىسىنداعى تىلشىلەر قوسىنىنا پانفيلوۆ اۋدانىنداعى «شۇكەيىت اتا» شارۋا قوجالىعىنىڭ جەتەكشىسى مۇحتار اقىنوۆ تاعى شاعىمداندى.

شارۋا بۇعان دەيىن دە اسىل تۇقىمدى مال ساتىپ الۋعا بەرىلەتىن سۋبسيدياعا قول جەتكىزبەگەنىن ايتىپ كەلگەن ەدى. ول تۋرالى گازەتكە تولىق جازعان بولاتىنبىز. وسى 2016 جىلدان بەرى شەشىمىن تاپپاي كەلە جاتقان وتەماقى داۋى جاقىندا عانا مەملەكەت باسشىسى قاسىم-جومارت توقاەۆتىڭ اتىنا حات جولداعاننان كەيىن وبلىس اكىمى اماندىق باتالوۆتىڭ قۇلاعىنا جەتىپتى.

- وبلىس اكىمىنىڭ قابىلداۋىنا 3 جىلعا جۋىق جازىلىپ، سۇرانىپ ءجۇرىپ، كىرە المادىم. جاقىندا پرەزيدەنتتىڭ اتىنا اشىق حات جازعاسىن، قابىلدادى. باتالوۆ مىرزاعا بولعان جاعدايدى ايتتىم. اكىم ورىنباسارى سەرىكجان بەسكەمپىروۆ پەن اۋىل شارۋاشىلىعى باسقارماسىنىڭ باسشىسى ماقسۇت جاپاروۆقا ماسەلەنىڭ قايدان شىققانىن انىقتاپ، كىنالى ادامدى تاۋىپ، سۋبسيديا تولەۋدىڭ جولىن قاراستىرۋدى تاپسىردى. اكىم قابىلداۋىنان كەيىن تاعى ءبىر كۇن تالدىقورعاندا قالىپ، ءىستىڭ سوڭىن كۇتتىم. بىراق تاپسىرما العان شەندىلەر جاقىن كۇندەرى ناتيجەسىن حابارلايتىنىن ايتىپ، شىعارىپ سالدى. وكىنىشكە قاراي، ءالى ناقتى جاۋاپ جوق. جىل بولسا اياقتالدى، دەمەك بيىل دا سۋبسيديا تولەنبەيتىنى انىق. شەندىلەر جاۋاپ بەرمەي وتىر. امالىم تاۋسىلعاسىن «Egemen Qazaqstan» گازەتىنە شاعىمدانۋعا تاعى ءماجبۇر بولدىم، - دەيدى «شۇكەيىت اتا» شارۋا قوجالىعىنىڭ جەتەكشىسى مۇحتار اقىنوۆ.

وقىرمانعا تۇسىنىكتى بولۋ ءۇشىن وقيعاعا تاعى دا از-كەم توقتالا كەتسەك: جەكە شارۋا 2015 جىلى «التىن اسىق» مەملەكەتتىك باعدارلاماسىنا قۇجات وتكىزىپ، 6 ملن تەڭگە نەسيە الادى. بۇل قارجىعا 230 باس اسىل تۇقىمدى قوي مەن قوشقار ساتىپ اكەلەدى.

- 2015 جىلى  «التىن اسىق» باعدارلاماسى بويىنشا 6 ملن تەڭگە نەسيە الدىم. باعدارلاما شارتى بويىنشا تولەنەتىن 14 پروتسەنتتىڭ 10 پروتسەنتىن مەملەكەت سۋبسيديالاۋى كەرەك. ول 6 ملن تەڭگەگە وڭتۇستىك قازاقستان وبلىسىنان 230 باس «ورداباسى» اتتى اسىل تۇقىمدى قوي ساتىپ الدىم. 2016 جىلى قازان ايىندا العان نەسيەمنىڭ سىياقىسىمەن نەگىزگى بورىش بەرەشەگى، ياعني 1 ملن 200 مىڭ تەڭگەنى بانككە قۇيدىم. وبلىستىق اۋىل شارۋاشىلىعى باسقارماسى نەسيەنى باعدارلاما بويىنشا سۋبسيديالاۋى ءتيىس بولاتىن. بىراق ماعان 2016 جىلى قايتارىلۋى ءتيىس سۋبسيديا، جالپى  600 مىڭ تەڭگە تولەنبەدى، - دەيدى مۇحتار اقىنوۆ.

2016 جىلدىڭ ەسەبىنە ەنىپ تۇرعان شارۋانى جىلدىڭ سوڭىندا سۋبسيديا تولەۋدى جۇزەگە اسىراتىن وبلىستىق اۋىل شارۋاشىلىعى باسقارماسىنىڭ ماماندارى «ازىرگە قارجى جوق. كەيىنگى تىزىمگە قوسامىز» دەگەن قۇرعاق ۋادەمەن شىعارىپ سالادى. وسىلاي باستالعان سۋبسيديا سەرگەلدەڭى ءالى جالعاسىپ وتىرعان كورىنەدى. وتكەن 3 جىل ىشىندە شارۋا بانككە 5 ملن تەڭگەدەن استام اقشا تولەپ، نەسيەسىن وتەگەن ەكەن. ال مەملەكەت قايتارۋى ءتيىس سۋبسيديا سوماسى 1 ملن 800 مىڭ تەڭگە شاماسىندا.

توقەتەرى، شارۋا بۇل ماسەلە بويىنشا ءتيىستى ورگاندارمەن سوتتاسقان دا ەكەن، ادىلدىك تاپپاپتى. ەندى پرەزيدەنت قاسىم-جومارت توقاەۆتىڭ اتىنا جولداعان حاتىنان كەيىن وبلىس اكىمىنىڭ قابىلداۋىنا قول جەتكىزگەنىنە قۋانعان ول ادىلەت ورناپ، ەڭبەگى اقتالاتىنىنا سەنىمدى. الايدا شارۋانى بۇل ماسەلەنى وبلىستىڭ اۋىل شارۋاشىلىعىنا جاۋاپتى شەنەۋنىكتەردىڭ قالاي شەشەتىنى ازىرگە بەلگىسىز قالىپ وتىرعانى دا الاڭداتادى.

سوڭعى جاڭالىقتار

دزيۋدو: بۇگىن جۇلدە بۇيىرمادى

كۇرەس • 24 قاڭتار، 2020

پرەزيدەنت اكىمدەرمەن كەڭەس وتكىزدى

پرەزيدەنت • 24 قاڭتار، 2020

ۇقساس جاڭالىقتار