ايماقتار • 10 جەلتوقسان، 2019

كەڭەستە جاستار ماسەلەسى تالقىلاندى

18 رەتكورسەتىلدى

وبلىستىق قازاقستان حالقى اسسامبلەياسىنىڭ ۇيىمداستىرۋىمەن دوستىق ۇيىندە قوعامدىق كەلىسىم كەڭەسىنىڭ كەزەكتى وتىرىسى بولىپ ءوتتى. وعان وبلىستىق اۋىلشارۋاشىلىق باسقارماسىنىڭ باسشىسى قامباربەك مۇباراكوۆ، وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى گاۋحار قالماقوۆا، قالا جانە اۋدانداردان كەلگەن كەلىسىم كەڭەسىنىڭ وكىلدەرى قاتىستى.

«قوعامدىق كەلىسىم» كمم ديرەكتورىنىڭ ورىنباسارى، وبلىستىق قوعامدىق كەلىسىم كەڭەسىنىڭ توراعاسى اسىلبەك جۇماباەۆ «ديپلوممەن – اۋىلعا» باعدارلاماسى مەن جاستار پراكتيكاسىن جەتىلدىرۋ ماسەلەلەرى جايلى قىسقاشا ايتىپ ءوتتى.   

«ديپلوممەن – اۋىلعا» باعدارلاماسىنىڭ ورىندالۋى جايلى وبلىستىق اۋىلشارۋاشىلىق باسقارماسىنىڭ باسشىسى قامباربەك مۇباراكوۆ حابارلاما جاسادى. ەلباسى باستاماسىمەن جۇزەگە اسىرىلىپ كەلە جاتقان الەۋ­مەتتىك باعدارلاما   جاستارىمىزدىڭ ماماندىقتارىنا ساي جۇمىسقا ورنالاسۋىنا، سونداي-اق اۋىلدا  جاس ماماندار قاتارىن تولىقتىرۋعا مۇم­كىندىك بەرگەندىگىن تىلگە تيەك ەتتى.

2019 جىلعا 323 مامانعا ءبىر جولعى كوتەرمە جاردەماقى تولەۋگە 61،6 ملن تەڭگە، تۇرعىن ءۇي نەسيەسىنە 503 مامانعا 1،9 ملرد تەڭگە ءبولىندى. جالپى جىلدان-جىلعا قاتىسۋشىلار قاتارى ارتىپ كەلە جاتقان جوبانى جۇزەگە اسىرۋ اياسىندا بەرىلەتىن بيۋدجەتتىك نەسيە كولەمى بويىنشا بيىل ءبىزدىڭ وبلىس رەسپۋبليكادا الدىڭعى قاتاردا تۇر.

ەلباسى بيىل «جاستار جىلى» اياسىندا اتالعان جوباعا ەنگىزىلەتىن ماماندىقتاردىڭ ءتىزىمىن كەڭەيتۋ جانە ماماندارعا تولەنەتىن كوتەرمە جاردەماقى مولشەرىن 70-تەن 100 ايلىق ەسەپتىك كورسەتكىشكە دەيىن ارتتىرۋدى تاپسىرعان بولاتىن. وسىعان بايلانىستى، ۇلتتىق ەكونوميكا مينيسترلىگىنە 2020-2022 جىلدارى 2 971 مامانعا كوتەرمە جاردەماقى بەرۋ جونىندە ەنگىزىلگەن ۇسىنىسقا سايكەس قوسىمشا  249،9 ملن تەڭگە ءبولىندى.

سونىمەن قاتار 2020 جىلى 566 ماماندى تۇرعىن ءۇي نەسيەسىمەن قامتاماسىز ەتۋ ءۇشىن رەسپۋبليكالىق بيۋدجەتتەن 2 250،7 ملن تەڭگە قارجى ءبولىندى، دەدى باسقارما باسشىسى.

وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى گاۋحار قالماقوۆا جاستار تاجىريبەسىن جەتىلدىرۋ بويىنشا اتقارىلعان شارالارعا توقتالىپ ءوتتى. «ەڭبەك» مەملەكەتتىك باعدارلاماسى اياسىنداعى شارالارعا جىل باسىنان 29649 ادام قاتىستىرىلدى. ونىڭ ىشىندە، اۋىل تۇرعىندارىنىڭ ۇلەسى 57 پايىز بولىپ وتىر. كاسىپكەرلىك باستامالاردى دامىتۋعا 10،5 ملرد تەڭگە قارجى بولىنگەن. ناتيجەسىندە 948 ادام شاعىن نەسيە الىپ، قوسىمشا 843 جاڭا جۇمىس ورنىن اشتى. جاڭا بيزنەس يدەيالاردى ىسكە اسىرۋعا ارنالعان مەملەكەتتىك گرانتتى يەلەنگەن 2662 تۇرعىن ءوز كاسىپتەرىن باستادى.   

«ەڭبەك بيرجاسى» ەلەكتروندىق پورتالىن پايدالانۋ ءۇشىن حالىق جانە جۇمىس بەرۋشىلەر اراسىندا  بوس جۇمىس ورىندارىن ۇسىنۋ جونىندە تۇسىندىرمە جۇمىستارى كەڭىنەن جۇرگىزىلۋدە. بيىل 13109 ادامنىڭ 64 پايىزى جۇمىسپەن قامتۋ ورتالىقتارى، قالعانى  وسى ەلەكتروندىق پورتال ارقىلى جۇمىسپەن قامتىلدى.  

جاستار تاجىريبەسىنەن وتكەن مامانداردىڭ تۇراقتى جۇمىسپەن قامتىلۋ دەڭگەيىن كوتەرۋگە «ەڭبەك» باعدارلاماسىنا جاڭادان ەنگىزىلەتىن 2 جوبا مۇمكىندىك بەرەدى. «العاشقى جۇمىس ورنى» جوباسى شەڭبەرىندە مامان 2 جىلعا دەيىن جۇمىسپەن قامتىلىپ، العاشقى جىلدىڭ ەڭبەك اقىسى بيۋدجەتتەن سۋبسيديالانادى. ال، «ۇرپاقتار بايلانىسى» جوباسى بويىنشا باعدارلاماعا قاتىسۋشى زەينەتكەرلىك جاسقا جەتكەن قىزمەتكەر-تالىمگەردىڭ قاسىنا 18 ايعا تۇراقتى جۇمىسقا ورنالاسادى.  ءارى قاراي تالىمگەردىڭ ورنىن جاس مامان باسادى.

وتىرىس اياسىندا كەڭەس مۇشەلەرى جاستاردى اۋىلشارۋاشىلىق سالاسىنا تارتۋ، تاجىريبەدەن وتەتىن مامانعا بىلىكتى تالىمگەردى بەكىتۋ جايلى پىكىرلەرىن ءبىلدىردى.

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار