عيمارات قۇرىلىسىنا ينۆەستور – «Kazyna-SR» جشس 450 ميلليون تەڭگە قارجى قۇيعان. ونى مەردىگەر «Silk-Road Corporation» جشس 2017 جىلى قولعا الىپ, بيىل اياقتاپ وتىر. «Kazyna-SR» جشس ديرەكتورى سايرا ماتايباەۆانىڭ ايتۋىنشا, بۇل جەكەمەنشىك ءبىلىم ورداسى جاراتىلىستانۋ-ماتەماتيكالىق باعىتىندا جۇمىس ىستەيتىن بولادى. وقۋشىلاردى اعىلشىن ءتىلى جانە كاسىپكەرلىككە ماشىقتاندىرادى. جاس ۇرپاققا ساپالى ءبىلىم مەن سانالى تəربيە بەرۋدە مۇعالىمدەردىڭ ءبىلىمدى دە بىلىكتى بولۋىمەن بىرگە, مەكتەپتىڭ ماتەريالدىق-تەحنيكالىق جاراقتاندىرىلۋى مەن وزىق وقۋ قۇرالدارىمەن جەتكىلىكتى قامتاماسىز ەتىلۋىنە زور ءمان بەرىلىپ وتىر. مەكتەپ كابينەتتەرى زاماناۋي تەحنولوگيامەن جابدىقتالىپ, ينتەراكتيۆتى تاقتا ورناتىلعان. ءبىلىم وشاعىندا 25 سىنىپ بار.
جاڭا ءبىلىم ورداسىنىڭ اشىلۋ سالتاناتىنا وبلىس اكىمى ەرمەك مارجىقپاەۆ قاتىسىپ, ءسوز سويلەدى.
– بۇگىن بارشامىز تاريحي وقيعانىڭ كۋاسى بولىپ وتىرمىز. حالقىنىڭ سانى كوبەيىپ كەلە جاتقان قوسشى اۋىلىنىڭ تۇرعىندارى ءۇشىن جاڭا مەكتەپ-ليتسەيى ۇلكەن سىي بولدى. مەملەكەت باسشىسى قاسىم-جومارت توقاەۆ ءوزىنىڭ جولداۋىندا الەۋمەتتىك سالاعا, ونىڭ ىشىندە ءبىلىم بەرۋ, مەديتسينا جانە حالىقتىڭ ءال-اۋقاتىن ارتتىرۋعا كوڭىل ءبولۋدى تاپسىرعان بولاتىن. بۇل – ءبىلىم ورداسى تسەلينوگراد اۋداندىق ءماسليحاتىنىڭ دەپۋتاتى, جەكە كاسىپكەر سايرا ماتايباەۆانىڭ پرەزيدەنت جولداۋىنداعى مىندەتتەردى جۇزەگە اسىرۋعا قوسىپ وتىرعان باعالى باستاماسى, – دەدى اكىم.
بۇل اۋداندا سىرتتان كوشىپ كەلۋشىلەردىڭ كوپ بولۋى سەبەپتى بۇرىنعى ءبىلىم وشاقتارى تارشىلىق ەتۋدە. اعىمداعى جىلدىڭ كوكتەمىندە وڭىرگە جۇمىس ساپارىمەن كەلگەن مەملەكەت باسشىسى قاسىم-جومارت توقاەۆ وسى ماسەلەنى شەشۋ تۋرالى تاپسىرما بەرگەن بولاتىن. بۇل ماسەلە وبلىستا بىرتىندەپ شەشىلىپ كەلەدى. ماسەلەن, بيىلعى وقۋ جىلىندا بۋراباي اۋدانىندا 700 ورىندىق مەكتەپ پايدالانۋعا بەرىلسە, كوكشەتاۋ قالاسىندا 4 مەكتەپكە قوسىمشا عيمارات سالىنۋدا. قازىرگى تاڭدا تسەلينوگراد اۋدانىنىڭ قوياندى, قوسشى جانە قاجىمۇقان اۋىلدارىندا بارلىعى 2700 وقۋشىعا ارنالعان ءۇش مەكتەپتىڭ قۇرىلىسى جۇرگىزىلۋدە. بۇدان بولەك, سەمەنوۆكا (120 ورىندىق) جانە شۇبار (300 ورىندىق) اۋىلدارىندا ەكى مەكتەپتىڭ جوبالىق-سمەتالىق قۇجاتتارى ازىرلەنۋدە. ال 2020-2021 جىلدارى قوسشى كەنتىندە اربىرەۋى 1200 وقۋشىعا ارنالعان تاعى ەكى مەكتەپ سالۋ جوسپارلانعان.
سالتاناتتى شارا بارىسىندا ءوڭىر باسشىسى ەرمەك مارجىقپاەۆ پەن جەكە كاسىپكەر سايرا ماتايباەۆا جاڭا مەكتەپتىڭ لەنتاسىن قيدى. اق تۇيەنىڭ قارنى جارىلعان شاراعا ءوز كەزەگىندە اۋدان تۇرعىندارى اتىنان ءسوز سويلەگەن تسەلينوگراد اۋدانىنداعى «رودينا» اگروفيرماسى» جشس-ءنىڭ باس ديرەكتورى, قازاقستاننىڭ ەڭبەك ەرى يۆان ساۋەر يگى ءىستى قولعا العان كاسىپكەرگە ريزاشىلىق سەزىمىن ءبىلدىردى.
تۋعان جەر پەرزەنتتەرى ەل ەڭسەسىن كوتەرەر وسىنداي عيبراتتى شارالاردى قولعا الىپ, ءوز ۇلەستەرىن قوسۋى جان سۇيسىنتەدى.
اقمولا وبلىسى,
تسەلينوگراد اۋدانى
