ايماقتار • 07 جەلتوقسان، 2019

جەزقازعاندا تاماقتان ۋلانعان وقۋشىلار جازىلىپ شىقتى

107 رەتكورسەتىلدى

جەزقازعان قالاسىنداعى №10 ورتا مەكتەپتىڭ بەس وقۋشىسى تاماقتان ۋلاندى دەگەن كۇدىكپەن اۋرۋحاناعا ءتۇستى. ابىروي بولعاندا، دارىگەرلەر دەر كەزىندە ولاردىڭ اسقازانىن تازالاپ، دەنساۋلىقتارىن قالپىنا كەلتىرە الدى. بۇگىنگى كۇندە بالالار ۇيلەرىنە امان-ەسەن قايتارىلعان.

قازىرگى ۋاقىتتا اتالعان مەكتەپتە قۇرامىنا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ ماماندارى ەنگەن ارنايى كوميسسيا جۇمىس ىستەپ جاتىر.

ال قالالىق اكىمدىكتىڭ قىزمەتكەرلەرى جاپپاي ۋلانۋ وقيعاسىنا مەكتەپ اسحاناسىن تىكەلەي كىنالاۋدىڭ ءالى ەرتە ەكەنىن ەسكەرتتى.

«مەكتەپ بويىنشا 99 وقۋشى ىستىق تاماقپەن قامتاماسىز ەتىلەدى. ۋلانىپ، اۋرۋحاناعا تۇسكەن بەس بالانىڭ ەكەۋى مەكتەپ اسحاناسىندا تاماقتانباعان»، دەگەن مالىمدەمە تاراتتى ولار.

ال بالالاردىڭ اتا-انالارى بۇل وقيعانىڭ اق-قاراسىن انىقتاپ، كىنالىلەرگە شارا قولدانۋدى تالاپ ەتىپ وتىر.

«كوميسيا ءالى جۇمىس ىستەپ جاتىر. وقيعانىڭ نە سەبەپتەن بولعانىن ەشكىم تاپ باسىپ ايتا المايدى. ەگەر ۋلانۋ وقيعاسى مەن اسحانا اراسىندا بايلانىس بولماسا، وندا نەگە بەس بىردەي بالا اۋرۋحاناعا تۇسەدى؟»، دەيدى بالالارىنىڭ بولاشاعىنا الاڭداعان ولار.

ەسكە سالساق، وسىدان ەكى كۇن بۇرىن جەزقازعان قالاسىنداعى باسقا ءبىر مەكتەپتىڭ سەگىز جاستاعى وقۋشىسى ۋلانىپ، كوپ ۇزاماي كوز جۇمعان بولاتىن.

 

 

قاراعاندى وبلىسى

 

سوڭعى جاڭالىقتار

ۇقساس جاڭالىقتار