قىزىلوردا قالاسى, جاڭاقورعان, سىرداريا, قارماقشى, ارال جانە قازالى اۋداندارىنان تالاپكەرلەر قاتىسقان بايقاۋدىڭ اشىلۋ سالتاناتىندا اۋدان اكىمىنىڭ ورىنباسارى ءالىمجان جارىلقاعانوۆ انشىلەرگە ساتتىلىك تىلەدى.
ونەرپازدار ءبىرىنشى كەزەڭدە ءمادينا ەراليەۆانىڭ رەپەرتۋارىنان ءان ورىنداسا, ەكىنشى كەزەڭدە وزدەرىنىڭ قالاۋى بويىنشا ءبىر ءان ايتتى.
دارىندىلار دوداسىندا باس جۇلدە ماديار جەتكەرگەنگە بۇيىردى. نۇربول تۇرانوۆ ءبىرىنشى, امانجول سلاموۆ, ايتۋعان سەمباەۆ پەن ەرلان ەدىگەەۆ ەكىنشى, دينارا جاكەشوۆا, ءامىر ساريەۆ, اسەل تۇرعانباەۆا ءۇشىنشى ورىنعا قول جەتكىزدى.
بايقاۋدا «اقبايان» نوميناتسياسىمەن ايعانىم تىلەپوۆا ماراپاتتالدى.
قازاقستاننىڭ تۇڭعىش پرەزيدەنتى-ەلباسى ن.ءا.نازارباەۆتىڭ «بولاشاققا باعدار: رۋحاني جاڭعىرۋ» ماقالاسى اياسىندا ۇيىمداستىرىلعان شارانى وبلىستىق حالىق شىعارماشىلىعىن دامىتۋ جانە مادەني پروديۋسەرلىك ورتالىعى مەن قازالى اۋداندىق مادەنيەت جانە تىلدەردى دامىتۋ ءبولىمى بىرلەسىپ وتكىزدى.
