جىل سايىن تۇراقتى ءوتىپ تۇراتىن ءداستۇرلى فورۋم ينۆەستيتسيالىق جوبالار كورمەسىنەن باستالدى. ەلىمىز بەن شەتەلدەن كەلگەن كاسىپكەرلەر, ينۆەستيتسيالىق كومپانيا جەتەكشىلەرى, عىلىمي-زەرتتەۋ ينستيتۋتتارى وكىلدەرى كورمەدە وسى باعىتتاعى وبلىس مۇمكىندىگىمەن تانىستى.
وبلىس اكىمى قۋانىشبەك ىسقاقوۆ فورۋمنىڭ وبلىس ەكونوميكاسىنا تيگىزگەن پايداسى جايلى ايتىپ ءوتتى.
– وسىعان دەيىنگى وتكەن فورۋمداردا 130-دان استام مەموراندۋمعا قول قويىلىپ, وبلىس ەكونوميكاسىنا 1 ترلن تەڭگەدەن استام ينۆەستيتسيا تارتىلدى. ال وتكەن جىلعى فورۋم «جاسىل ەكونوميكا» تاقىرىبىنا ارنالىپ, جاڭعىرمالى ەنەرگيا كوزدەرى, ينۆەستيتسيالىق جوبالاردى دامىتۋ جانە «جاسىل تەحنولوگيالاردى» ەنگىزۋ سالاسىنداعى ىنتىماقتاستىق ماسەلەلەرى تالقىلاندى. سونىڭ ناتيجەسىندە قازىر جالاعاش جانە شيەلى اۋداندارىندا كۇن-ەلەكتر ستانسالارى سالىنۋدا, – دەدى وبلىس باسشىسى.
قىزىلوردا وبلىسى ءتيىمدى لوگيستيكالىق جاعدايعا يە ءوڭىردىڭ ءبىرى. سىرداريا وزەنى بۇكىل وبلىستى كوكتەي ءوتىپ جاتىر, تەمىرجول جانە «باتىس ەۋروپا – باتىس قىتاي» حالىقارالىق ماگيسترالىنىڭ 800 شاقىرىمنان استام بولىگى وسى ءوڭىر اۋماعىمەن وتەدى. ينۆەستورلار ءۇشىن كەرەگى دە وسى.
«تالاپ» قولدانبالى زەرتتەۋلەر ورتالىعىنىڭ ديرەكتورى راقىم وشاقباەۆ مودەراتورلىق ەتكەن فورۋمدا شەتەلدىك ديپلوماتيالىق كورپۋس وكىلدەرى, كاسىپكەرلەر, ينۆەستيتسيالىق كومپانيالار باسشىلارى دا پىكىرلەرىن ءبىلدىردى. يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مادجيد سامادزادە سابەر ەكى ەل اراسىنداعى ەكونوميكالىق بايلانىستارعا توقتالدى. سوڭعى جىلدارى يراننىڭ گ ۇلىستان, مازەندەران ايماقتارىمەن قازاقستاننىڭ وڭتۇستىك وڭىرلەرى اراسىندا بارىس-كەلىس, الىس-بەرىس ۇلعايعانىن اتاپ ءوتتى.
نيدەرلاندى كورولدىگىنىڭ توتەنشە جانە وكىلەتتى ەلشىسى اندرە كارستەنس «شەلل» كومپانياسى ەكونوميكالىق بايلانىستىڭ نەگىزىنە اينالعانىن ايتتى. مۇناي-گاز سالاسىنان بولەك اۋىل شارۋاشىلىعى ونىمدەرىن ەكسپورتتاۋدان الدىڭعى قاتارلى مەملەكەت سانالاتىن نيدەرلاندى ينۆەستيتسياسىمەن اقتوبەدە ءىرى جىلىجاي كەشەنى سالىندى. سونداي كەشەننىڭ ءبىرىن الدا قىزىلوردادا سالۋ جوسپارلانۋدا.
قازاقستانداعى كورەيا رەسپۋبليكاسىنىڭ ەلشىسى كيم دە سيك كورەيا مەن ءبىزدىڭ ەل اراسىنداعى «سامال جەل» اتتى ەكونوميكالىق ىنتىماقتاستىق باعدارلاماسى جايلى ايتتى. كولىك جانە لوگيستيكا, قۇرىلىس, ونەركاسىپ, ينفراقۇرىلىمدى دامىتۋ, تاۋ-كەن مەتاللۋرگيا جانە جەر قويناۋىن پايدالانۋ, ساۋدا-ەكونوميكالىق ىنتىماقتاستىق, ەنەرگەتيكا, يننوۆاتسيا, اۋىل شارۋاشىلىعى, قارجى, دەنساۋلىق ساقتاۋ مەن مادەنيەت, تۋريزم جانە ءبىلىم بەرۋ سالالارىن قامتيتىن باعدارلاما شەڭبەرىندە سىر وڭىرىندە اۋرۋحانا سالۋ جوسپاردا بار.
بۇدان بولەك فرانتسيا, گەرمانيا, ماكەدونيا, كانادا, سلوۆەنيا, قحر, رەسەي فەدەراتسياسى ينۆەستورلارى قاتىسقان فورۋمدا وبلىستىڭ ءار سالاداعى مۇمكىندىگى ساراپقا سالىنىپ, وبلىس, قالا اكىمدىكتەرى مەن ينۆەستورلار اراسىندا بىرقاتار مەموراندۋمعا قول قويىلدى.
بيلىك پەن بيزنەستىڭ اراسىنداعى ديالوگ الاڭىنا اينالعان فورۋمدا بايقوڭىر ارنايى ەكونوميكالىق ايماعىن قۇرۋ, اۋىل شارۋاشىلىعىندا فەرمەرلىكتى جانە مال شارۋاشىلىعى كلاستەرىن دامىتۋ, مەملەكەت-جەكەمەنشىك ارىپتەستىكتى دامىتۋ پەرسپەكتيۆالارى تالقىلاندى.
قىزىلوردا
