قازاقتىڭ اسا كورنەكتى اقىنى, پوەزيا پاديشاسى, عاسىر قۇرداسى سانالاتىن مۇقاعالي ماقاتاەۆتىڭ پوەزياسى, ونىڭ شىعارماشىلىعىنىڭ پوەتيكالىق-لينگۆيستيكالىق ەرەكشەلىگى, ءتىلىنىڭ لەكسيكالىق بايلىعى كەشەندى دايارلاعان اسا زور ەڭبەك.
ۇزاق ۋاقىت بويى ازىرلەنگەن بۇل ەڭبەكتى ۇلكەن لينگۆيست-عالىم, مەملەكەتتىك سىيلىقتىڭ لاۋرەاتى بايىنقول قاليەۆ, مەملەكەت قايراتكەرى, ف.ع.د., پروفەسسور جانسەيىت تۇيمەباەۆ, ف.ع.د., پروفەسسور, ۇعا كوررەسپوندەنت-مۇشەسى شەرۋباي قۇرمانباي ۇلى جانە ف.ع.د., پروفەسسور ءسابيرا يساقوۆالار ىجداعاتتىلىقپەن دايىنداعان. سوزدىكتى دايارلاۋ بارىسىندا اقىننىڭ 5 تومدىق شىعارمالار جيناعى باسشىلىققا الىنعان. اقىن ءتىلىنىڭ سوزدىگىندە 13 348 ءسوز, 5 035 تۇراقتى ءسوز تىركەسى, 282 مىڭ ءسوز جيىلىگى بار ەكەن.
كىتاپتىڭ تانىستىرىلىمىنا قاتىسقان عىلىمي الەۋمەت بۇل ەڭبەكتى ۇلت رۋحانياتىنا قوسىلعان ولجا, قازاق ءتىل ءبىلىمى ءۇشىن وراسان زور جەتىستىك دەپ باعالادى.
