بۇگىنگى تاڭدا برازيليالىق دجيۋ-دجيتسۋ قارقىندى دامىپ كەلە جاتقان سپورت تۇرلەرىنىڭ ءبىرى. سوناۋ XVI عاسىردا جاپونيادان باستاۋ العان ايتۋلى ونەر قازىرگى كەزدە قاناتىن قۇلاشتاپ جايىپ, كۇللى الەمگە كەڭىنەن تارادى. ال ىرگەتاسى كۇن شىعىس ەلىندە قالانعان سپورت تۇرىنە برازيليانىڭ ماماندارى كوپتەگەن وزگەرىستەر ەنگىزىپ, جاڭا بيىككە كوتەردى. ءبىز دە سول باعىتتى ۇستانىپ, وسى ونەردى ءوز مەملەكەتىمىزدە وركەندەتۋ ءۇشىن بارىنشا كۇش سالىپ جاتىرمىز. سول سەكىلدى قازىرگى كەزدە گرەپپلينگتىڭ دە دامۋ بارىسى قۋانتادى دەيدى قازاقستان رەسپۋبليكاسى برازيليالىق دجيۋ-دجيتسۋ مەن گرەپپلينگ فەدەراتسياسىنىڭ ۆيتسە-پرەزيدەنتى اقمارال قاناتباەۆا.
ءيا, سوڭعى جىلدارى وسى سپورت تۇرلەرىن سەرىك ەتكەن قازاقستاننىڭ ورەندەرى حالىقارالىق ارەنادا ەلەۋلى تابىستارعا قول جەتكىزىپ جۇرگەنى بارشاعا ءمالىم. بۇگىنگى تاڭدا وسمانجان قاسىموۆ, دارحان نورتاەۆ, يسلام ماميلوۆ, ناريمان مىڭباەۆ, ەرناز مۇسابەك, مانسۇر حابيبوللا, ازامات باقىتوۆ, انتون امانباەۆ, رۋسلان يسرايلوۆ, ومار مانناروۆ, ءمولدىر مەكەنباەۆا, ماريام ورداباەۆا, ايدا قۇربانوۆا جانە تاعى باسقا حاس شەبەرلەردىڭ ەسىمدەرى كوپشىلىككە جاقسى تانىس. ولاردىڭ الدى الەمدىك دەڭگەيدەگى دودالاردا دارالانسا, وزگەلەرى قۇرلىقتىق جارىستاردا جاسىنداي جارقىراپ ءجۇر. جەرلەستەرىمىزدىڭ وسىنداي وراسان زور تابىسىنا بارشا قازاقستاندىق جانكۇيەر ەرەكشە شاتتانۋدا.
ال سوڭعى جىلدارداعى كورسەتكىشتەرىنە توقتالاتىن بولساق, جۋىردا عانا بىرىككەن ارابتار امىرلىگىنىڭ ء(باا) استاناسى – ءابۋ-دابيدە ۇيىمداستىرىلعان حالىقارالىق تۋرنيردە وتانداستارىمىزدىڭ تاماشا ونەر كورسەتىپ, كوماندالىق ەسەپتە ەكىنشى ورىندى ولجالادى. ال وسىدان بىرەر اي بۇرىن جاپونيانىڭ اشىق چەمپيوناتىنا قاتىسقان قازاقستاننىڭ ورەندەرى سول ساپاردان ءبىر كۇمىس جانە ءبىر قولا جۇلدەمەن ورالدى.
سونىمەن قاتار برازيليالىق دجيۋ-دجيتسۋ مەن گرەپپلينگ شەبەرلەرى ءتۇرلى قايىرىمدىلىق ءىس-شارادان دا قالىس قالىپ جۇرگەن جوق. ءبىر عانا مىسال, ايتۋلى فەدەراتسيانىڭ قامقورلىعىنىڭ ارقاسىندا الماتى قالاسى مەن الماتى وبلىسىندا ورنالاسقان قوس بىردەي بالالار ۇيىندە وسى سپورت تۇرىنە بەيىمدەلگەن ارنايى زال اشىلىپ, قاجەتتى قۇرال-جابدىقتارمەن قامتىماسىز ەتىلدى. جاس جەتكىنشەكتەردىڭ شەبەرلىكتەرىن شىڭداۋ ماقساتىندا ولارعا بىلىكتى باپكەرلەر بەكىتىلدى. بۇل كۇندەرى بالالار ءۇيىنىڭ ءبىر توپ ۇلدارى مەن قىزدارى سول ۇيىرمەلەردە تەگىن دايارلانۋدا.
الماتى قالاسى اكىمدىگىنىڭ قولداۋىمەن ۇيىمداستىرىلىپ وتىرعان ءتۋرنيردىڭ وزىنە توقتالاتىن بولساق, العاشقى كۇنى 4-17 جاس ارالىعىنداعى بالالار مەن جاسوسپىرىمدەر ونەر كورسەتەدى. كەلەسى تاۋلىكتە ەرەسەكتەر مەن ارداگەرلەردىڭ جەكپە-جەكتەرىن تاماشالايمىز. ال ەڭ سوڭعى كۇنى كاسىپقوي سپورتشىلار جارىس كورىگىن قىزدىرادى.
