رۋحانيات • 29 قاراشا، 2019

ەلباسى جانە مادەنيەت

ۇلتتىق مۋزەيدە تۇڭعىش پرەزيدەنت – ەلباسى كىتاپحاناسىنىڭ ۇسىنۋىمەن ەگەمەندىكتىڭ نەگىزىن قالاۋعا، ۇيلەسىمدى قوعام قۇرۋ مەن ۇلت تاريحىنىڭ جاڭا كەزەڭىندەگى ەلباسى ءرولىن ايقىندايتىن جاڭاشا كورمە اشىلدى. قازاقستان رەسپۋبليكاسىنىڭ تۇڭعىش پرەزيدەنتى كۇنىنە ارنالعان «ەلباسى جانە مادەنيەت» كورمەسىندە كىتاپحانانىڭ مۇراعاتتىق ماتەريالدار جيناعى ءارتۇرلى جانرداعى 170-تەن استام قۇجاتتى ەل نازارىنا ۇسىندى.

ايا ءومىرتاي

سالتاناتتى جيىننىڭ اشىلۋىنا يگور روگوۆ، قۋانىش سۇلتانوۆ، دارحان مىڭباي، ازات پەرۋاشەۆ سىندى بىرقاتار قوعام قايراتكەرى، زيالى قاۋىم وكىلدەرى قاتىستى.

العاش بولىپ ءسوز العان قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى ءامىرحان راقىمجانوۆ جارقىن بولاشاققا ۇمتىلۋ ءۇشىن بۇكىل قوعامدى جۇمىلدىرۋعا كۇش سالعان تۇلعا تۋرالى تولعانا سويلەدى.

– ءبىز سىزدەردى ەلباسىنىڭ زور ەڭبەگىنە ارنالعان بۇگىنگى كورمەدەن ەرەكشە اسەر الادى دەپ سەنەمىز. بۇگىندە قازاقستان بويىنشا ءار وبلىس، ءار اۋدان، ۋنيۆەرسيتەت، مەكتەپتەردە تۇڭعىش پرەزيدەنت كۇنىنە ارنالعان ءتۇرلى شارا ۇيىمداستىرىلۋدا. سونىڭ ىشىندەگى بۇگىنگى كورمە ماڭىزدى شارالاردىڭ ءبىرى بولىپ تابىلادى. سەبەبى ەلباسىنىڭ ءبىلىم، دەنساۋلىق ساقتاۋ سالاسى، جان-جاقتى سالالار بويىنشا جاساعان ەڭبەكتەرىن وزدەرىڭىز بىلەسىزدەر. ال مادەنيەت سالاسىندا جاساعان ەڭبەگىن وسى كورمەدەن كورە الاسىزدار، – دەدى ول.

مادەنيەت سالاسىنىڭ تاريحي دامۋ كەزەڭدەرى قازاقستان رەسپۋبليكاسىنىڭ 2030 جانە 2050 جىلدارعا دەيىنگى دامۋ ستراتەگياسىندا، قازاقستان حالقىنا جىل سايىنعى جولداۋلارىندا، «مادەني مۇرا» مەملەكەتتىك باعدارلاماسىندا ايقىن كورسەتىلگەن. ەلباسىنىڭ «بولاشاققا باعدار: رۋحاني جاڭعىرتۋ» باعدارلامالىق ماقالاسى الداعى ونجىلدىقتاعى كۇن ءتارتىبىن انىقتاي وتىرىپ، پراگماتيكالىق ۇستانىمىمەن قوعامنىڭ بارلىق سالاسىنداعى ۇزدىكسىز ترانسفورماتسيا ۇدەرىسى مەن ماڭىزدى ءارى جۇيەلى رەفورمالار قالىپتاستىرا ءبىلدى.

وسى ورايدا ۇلتتىق مۋزەي ديرەكتورى ارىستانبەك مۇحامەدي ۇلى ەلباسىنا ارنالعان ۇلكەن كورمە اشۋ ۇلتتىق مۋزەي ءۇشىن ۇلكەن مارتەبە ەكەنىن اتاپ ءوتتى. – قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسىنا ۇلتتىق مۋزەيدە قۇندى ەكسپوناتتار جيناقتالعان مازمۇندى كورمە ۇيىمداستىرعانى ءۇشىن العىس بىلدىرەمىن. بۇل كورمە ەلباسىمىز ن.ءا.نازارباەۆتىڭ ەلىمىزدىڭ مادەنيەتى سالاسىندا اتقارعان ەرەن ەڭبەگىنە ارنالعان. تۇڭعىش پرەزيدەنتىمىز ءتول تاريحىمىزدى، ۇلتتىق قۇندىلىقتارىمىزدى ساقتاۋ، قاسيەتتى وڭىرلەرىمىزدى قالپىنا كەلتىرۋ، ەرەكشە مادەنيەتىمىز، ادەبيەتىمىز، ءتىلىمىز بەن ءدىنىمىز، ءبىلىم جولى، ت.ب. سالالار بويىنشا كوپتەگەن جۇمىستار اتقارعانى بارشاڭىزعا بەلگىلى. بۇگىنگى كورمەدەن ەلباسىنىڭ ماڭىزدى قادامدارى مەن مازمۇنى تەرەڭ ەستەلىكتەرىن تاماشالاي الاسىزدار»، دەدى ارىستانبەك مۇحامەدي ۇلى.

ەلباسىنىڭ مادەنيەت سالاسىنداعى اتقارعان تولىمدى ىستەرى كورمە ماتەريالدارىندا تاۋەلسىزدىك جىلدارىنداعى مادەنيەت سالاسىنداعى مەملەكەتتىڭ ساياساتى تاريحي-مادەني ماڭىزى بار ەسكەرتكىشتەردى قورعاۋ، مۋزەيلەر، تەاترلار، ارحيۆتەر، كىتاپحانالار، ساۋلەت ونەرى، كينو ونەرى، ادەبيەت، قازاقستان رەسپۋبليكاسىنىڭ بەينەلەۋ جانە قولدانبالى ونەرى سىندى تاقىرىپتىق باعىتتارمەن بەرىلدى. اتالعان كورمە 2020 جىلعى 5 قاڭتارعا دەيىن جالعاسادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز