ۇلتتىق سۇلۋلىق ءتاجىن كيگەن ءمادينا باتىق قازىر 120 مەملەكەتتەن كەلگەن سۇلۋلارمەن بىرگە «الەم ارۋى» ديرەكتسياسى ۇيىمداستىرىپ جاتقان ءتۇرلى شارالارعا قاتىسىپ, قوسىمشا اتالىمدار بويىنشا قارىم-قابىلەتىن كورسەتە باستادى. دۇنيەجۇزىلىك جارىستىڭ اقتىق سىنى 14 جەلتوقساندا وتەدى.
قازىردىڭ وزىندە كارى ەۋروپادان جاقسى جاڭالىقتار جەتىپ جاتىر. ءمادينا الدىن الا وتكىزىلگەن بايقاۋدىڭ ۇزدىك توپ-10 مودەلدەرى جارىسىندا العاشقى وندىقتىڭ قاتارىندا سالتانات قۇرىپ جاتىر. وسىلايشا, مۇنداي ارالىق ناتيجەلەر ءبىزدىڭ سۇلۋىمىزدى بايقاۋدىڭ باستاپقى كەزەڭدەرىندە-اق دارالادى. دەمەك, اتالعان اتالىمدا قازاق قىزىنىڭ توپ جارۋدان ءۇمىتى ۇلعايدى. بۇل جارىستىڭ قورىتىندىسى «الەم ارۋىنىڭ» سوڭعى ساتتەرىندە جاريا بولادى. ال ءاربىر اتالىم بويىنشا جيناعان بالدار قىزداردى كۇللى الەمنىڭ كوركەمى ەكەندىگىن ايعاقتايتىن تاجگە تەزىرەك جاقىنداتا بەرمەك.
سونىمەن فينالدىق شوۋ باستالعانعا دەيىن ءمادينا دا الەمنىڭ ءار تۇكپىرىنەن كەلگەن سۇلۋلارمەن بىرگە ءتۇرلى دايىندىقتارعا, قايىرىمدىلىق جوبالارىنا, سپورتتىق شارالارعا, فوتوسەسسيالارعا, ەڭ ۇزدىك ۇلتتىق كيىم مەن تالانتتار بايقاۋىنا قاتىسا بەرمەك.
سونداي-اق سۇلۋلاردىڭ سۇلۋلارى لوندوننىڭ كورىكتى, تاريحي جەرلەرىندە ۇيىمداستىرىلعان كوشە ءسانى فوتوسەسسيالارىنا قاتىسىپ ۇلگەرگەن.
سول سياقتى ونلاين-داۋىس بەرۋدىڭ باستالۋىنا دا ساناۋلى كۇندەر قالدى. ال كەرەكۋلىك قىزىمىزعا وتانداستارىنىڭ قولداۋى دا وسى كەزدە قاجەت بولماق.
ال قازاقستاننىڭ سۇلۋلىق ءتاجىن كيگەن قىز ساۋىردەن بەرى ءوزىنىڭ اعىلشىن تىلىنەن ءبىلىمىن جەتىلدىرىپ, دەنە ءبىتىمىن جاقسارتا ءتۇسۋى ءتيىس بولاتىن.
الەمدىك سايىسقا جولداما العان سۇلۋ تۋرالى «قازاقستان ارۋى» جوباسىنىڭ ءتۇسىرۋ توبى «قازاقستان تۋرالى ادەمىلىكپەن» اتتى تۇساۋكەسەر ءفيلمىن جاساعان ەدى. «قازاقستان ارۋىن» «الەم ارۋى-2019» بايقاۋىندا بۇكىل دۇنياعا تانىستىراتىن كارتينادا ۇلى دالامىزدىڭ ەڭ كورىكتى جەرلەرى, قاسيەتتى مەكەندەرى, ەلىمىزدىڭ عاجايىپ ولكەلەرى مەن تابيعات تاماشاسى دا قوسا سالتانات قۇراتىن بولادى.
قازاقستان ارۋىن تانىستىراتىن تۇساۋكەسەر فيلم ەلىمىزدىڭ ءتۇرلى تابيعاتىن, اسقار تاۋلارى مەن بارقىت قۇم دالاسىن قامتي كەلە, ۇلى جىبەك جولى بويىمەن ءجۇرىپ وتىرىپ, 20 جىلدا اسەم قالاعا اينالعان ەلىمىزدىڭ استاناسىندا مارەگە جەتەدى. وسىلايشا قازىر جيىرماعا تولعان ءمادينا باتىق شيرەك عاسىرعا دا جەتپەيتىن ارالىقتا مەگاپوليس شاھارعا اينالعان نۇر-سۇلتان قالاسى, قازاقستان تۋرالى ادەمىلىكپەن اڭگىمەسىن اياقتايدى.
الماتى
