«وقۋشىلار جالپى توپتاردا قۇرداستارىمەن تەڭ دارەجەدە ءبىلىم الادى. كۇن سايىن بالاعا قاجەتتى جەكە كومەك كورسەتىلەدى», دەدى «بولاشاق» كورپوراتيۆتىك قورى كەڭەسىنىڭ ءتورايىمى دينارا ءشايجۇنىسوۆا.
№88 مەكتەپ-ليتسەيىنىڭ ينكليۋزيۆتى كابينەتى «شەۆرون» كومپانياسىنىڭ دەمەۋشىلىك قاراجاتى ەسەبىنەن قارجىلاندىرىلدى. بۇل اتالعان قوردىڭ ء«ار بالا مەكتەپكە لايىقتى» جوباسى اياسىنداعى التىنشى كابينەتى.
«شەۆرون» كومپانياسىنىڭ قازاقستانمەن سەرىكتەستىگىنە 26 جىل تولىپ وتىر. ياعني كومپانيانىڭ ەلىمىزدە جۇمىس ىستەي باستاعان كۇندەرىنەن بەرى, – دەدى كومپانيا وكىلى جانار قوشپانوۆا – ەلىمىزدىڭ مەديتسينالىق مەكەمەلەرىن قولداۋعا, حالىقارالىق ستاندارتتاردى ەنگىزۋگە, جەرگىلىكتى مامانداردى ۇزدىك حالىقارالىق تاجىريبەلەرمەن تانىستىرۋعا قولداۋ كورسەتىلدى. بۇل – ەلدىڭ الەۋمەتتىك-ەكونوميكالىق دامۋىنا قوسىپ جاتقان ۇلەسىمىز».
پرەمەر-ءمينيستردىڭ ورىنباسارى بەردىبەك ساپارباەۆ الەۋمەتتىك جوبالاردى ىسكە اسىرۋدا, اتاپ ايتقاندا, ەرەكشە قاجەتتىلىكتەرى بار بالالاردى قولداۋعا باعىتتالعان مەملەكەتتىڭ, قوعامدىق ۇيىمدار مەن شەتەلدىك كاسىپورىنداردىڭ ءوزارا تىعىز بايلانىسىنىڭ ماڭىزدىلىعىن اتاپ ءوتتى.
ەلوردا اكىمى التاي كولگىنوۆ وقۋشىلارمەن كەزدەسۋ بارىسىندا جاڭادان اشىلعان مەكتەپتىڭ العاشقى وقۋشىلارىنا «سىزدەر وقيتىن مەكتەپ جەتەكشى مەكتەپتەردىڭ ءبىرى. ءبىلىم الۋ ءۇشىن ەڭبەك ەتىڭىزدەر, ال ءبىز ءوز تاراپىمىزدان بارلىق جاعدايدى جاسايمىز, «شەۆرون» كومپانياسىنا قولداۋ كورسەتكەنى ءۇشىن العىس بىلدىرەمىن», – دەدى. سونداي-اق قالا اكىمى ينكليۋزيۆتى كابينەتتەردىڭ قالانىڭ باسقا مەكتەپتەرىندە دە اشىلاتىنىن جەتكىزدى.
اتا-انالار دا العىسىن ءبىلدىرىپ, اتالعان ينكليۋزيۆتى كابينەتتەردىڭ ماڭىزدىلىعىن اتاپ ءوتتى. سونداي-اق №88 مەكتەپ-ليتسەيىندە گيدروپونيكا كابينەتى اشىلدى. تەحنولوگيا كومەگىمەن مەكتەپ وقۋشىلارى وزدەرى وسىمدىك وسىرە الادى. سونىمەن قاتار وقۋشىلار فيزيكا مەن حيميا پاندەرى بويىنشا تاجىريبە جاساي الاتىن زەرتحانا كابينەتى اشىلدى.
مۇعالىمدەرمەن اڭگىمە بارىسىندا ۆيتسە-پرەمەر ەلباسى مەن پرەزيدەنتتىڭ تاپسىرماسى بويىنشا پەداگوگتاردىڭ مارتەبەسىن ارتتىرۋدا ناقتى شارالار قابىلدانعانىن ايتتى.
«مەملەكەت ءبىلىم بەرۋ سالاسىن دامىتۋعا جانە بالالاردى قولداۋعا ەرەكشە كوڭىل بولەدى. بۇكىل ەل بويىنشا جاڭا زاماناۋي مەكتەپتەر سالىنىپ جاتىر, مۇعالىمدەردىڭ جالاقىسى ارتىپ, جۇمىس جاعدايى جاقسارۋدا. ۇرپاقتىڭ ءبىلىمدى, ساۋاتتى جانە تاربيەلى بولىپ ءوسۋى ءۇشىن بارىنشا كۇش سالۋىمىز كەرەك», – دەدى بەردىبەك ساپارباەۆ.
