جيىن بارىسىندا قمدب يمامدارىمەن كەزدەسكەن مينيستر تاياۋدا وتكەن ءىىى رەسپۋبليكالىق يمامدار فورۋمىندا قابىلدانعان ماڭىزدى قۇجاتتارعا توقتالدى. فورۋم قمدب-نىڭ ۇيىمداستىرۋشىلىق-يدەولوگيالىق قىزمەتىن جاڭا ءبىر بەلەسكە كوتەرىپ, تىڭ رۋحاني سەرپىن بەرگەنىن, سونداي-اق ەلىمىزدىڭ وڭىرلەرىندەگى وبلىستىق جانە قالالىق ورتالىقتاردا يمامدار فورۋمى جالعاسىپ جاتقانىن جەتكىزدى. «اتاپ ايتقاندا, «جەتى رۋحاني قازىق» قازاقستان مۇسىلماندارىنىڭ رۋحاني تۇعىرناماسى – عاسىرلار بويى اتا-بابالارىمىز ۇستانعان ءداستۇرلى ۇلتتىق رۋحاني قۇندىلىقتار مۇراسىن تۇسىندىرۋگە نەگىزدەلگەن. قۇجاتتا «يماندىلىق», «وتانشىلدىق», «بىلىمدىلىك», «اۋىزبىرشىلىك», «ەڭبەكقورلىق», «مادەنيەتتىلىك», «ادىلدىك» سىندى ۇعىمدارعا كەڭىنەن تۇسىنىكتەر بەرىلگەن. بۇگىندە فورۋمدا قابىلدانعان ماڭىزدى قۇجاتتاردى تالقىلاۋ ماقساتىندا قازاقستان وڭىرلەرىندەگى وبلىستىق جانە قالالىق ورتالىقتاردا يمامدار فورۋمى وتكىزىلۋدە. بۇگىنگى مەشىت يمامدارىنىڭ حالىق اراسىنداعى تولاسسىز ۋاعىز-ناسيحاتتارى, بەلسەنە ارالاساتىن قايىرىمدىلىق ءىس-شارالارى, اعارتۋشىلىق ماقساتتاعى اۋقىمدى ىستەرى – قازاقستان مۇسىلماندارىنىڭ رۋحاني سۇرانىسىنا قالتقىسىز قىزمەت ەتۋدىڭ جارقىن كورىنىسىنە اينالۋدا. سونداي-اق قوعامداعى بىرلىك پەن كەلىسىمدى, تاتۋلىق پەن بەيبىتشىلىكتى نىعايتۋعا ايانباي ۇلەس قوسۋدا», دەدى د.اباەۆ.
سونىمەن قاتار ءىس-شارادا مينيستر ازاماتتاردىڭ قايىرىمدىلىعىن ەركىن قابىلداۋ ءۇشىن ورناتىلعان «QIWI» ەلەكتروندى تەرمينالىنىڭ جۇمىسىمەن تانىستى. د.اباەۆ وسى ورايدا: «بۇگىن ءبىز سىزدەرمەن بىرلەسە وتىرىپ, ءالجان انا مەشىتىندە ازاماتتاردىڭ قايىرىمدىلىعىن ەركىن قابىلداۋ ءۇشىن «QIWI» ەلەكتروندى تەرمينالىنىڭ تۇساۋكەسەر راسىمىنە قاتىسىپ وتىرمىز. قازىرگى ۋاقىتتا, قمدب تاراپىنان نۇر-سۇلتان قالاسىنداعى 12 مەشىتكە قايىرىمدىلىقتى قابىلداۋ ماقساتىندا «QIWI» ەلەكتروندى تەرمينالدار ورناتىلدى. مۇنداي تەرمينالداردى بارلىق وبلىستىق, قالالىق ورتالىقتارداعى مەشىتتەرگە ورناتۋ جۇمىستارى جۇرگىزىلۋدە. ءدىني باسقارمانىڭ ەسەپ ايىرىسۋ شوتىنا ازاماتتاردان قولما-قول اقشاسىز تاسىلمەن قايىرىمدىلىقتىڭ ءتۇسۋى قمدب-نىڭ قارجى-شارۋاشىلىق قىزمەتىنىڭ اشىقتىعى مەن جاريالىلىعىنا حالىقتىڭ سەنىمىن تۋدىرىپ, ونىڭ بەدەلىنىڭ ارتۋىنا وڭ سەپتىگىن تيگىزەتىن بولادى», دەدى.
ءوز كەزەگىندە باس ءمۇفتي سەرىكباي قاجى وراز قازىر ەلىمىزدە 58 جەردە ساداقا تەرمينالى ورناتىلعانىن ايتا كەلىپ, «بىرىنشىدەن, بۇل قارجى اشىقتىعىن قامتاماسىز ەتەدى, ەكىنشىدەن, ەسەپ-قيساپ جۇيەسىندەگى جۇمىسىمىزدى جەڭىلدەتەدى, ۇشىنشىدەن, قازىر الەمنىڭ دامىعان مۇسىلمان ەلدەرىندە ۋاقىپ, زەكەت, ت.ب. قايىرىمدىلىق قورلاردىڭ قارجى سالاسى ەلەكتروندى تاسىلگە كوشكەن. ءبىز دە وسىنداي وزىق جۇيەگە كەزەڭ-كەزەڭىمەن كوشۋىمىز كەرەك. بۇگىنگى زامانا ءۇردىسى وسىنداي باستامالاردى تالاپ ەتۋدە», دەدى. باس ءمۇفتيدىڭ ايتۋىنشا, قازىر ادامدار زەكەتى مەن ساداقاسىن سمارتفون ارقىلى بەرۋدى قولايلى سانايدى.
«بۇگىنگىدەي نارىق زامانىندا ۋاقىت دەگەن نارسە – بارىنەن بيىك قۇندىلىققا اينالدى. وسى جاعدايدى ەسكەرىپ, زەكەت قورىنىڭ سمارتفونداعى ارنايى قوسىمشاسىن جاساپ شىقتىق. سول قوسىمشادا كومەككە اسا مۇقتاج ازاماتتار مەن ناۋقاس كىسىلەردىڭ بازاسى بار. كىمگە قارجىلاي كومەكتەسكىڭىز كەلەدى, ءوزىڭىز بىلەسىز. ءسىز بەرگەن كومەك سول ادامنىڭ ەسەپشوتىنا تىكەلەي ءتۇسىپ تۇرادى. ءسىز ونىڭ ەسەپ-قيسابىن سول قوسىمشادان كورىپ وتىراسىز. سوندىقتان مەشىتكە ساداقا تەرمينالىن ورناتۋ ۋاقىت تالابىنان تۋعان باستاما دەپ ايتار ەدىم. ءبىز وسىلايشا ساداقا بەرۋ مادەنيەتىنىڭ زاماناۋي وزىق ءتۇرىن پايدالانۋىمىز كەرەك. بۇل ارقىلى, تاعى دا قايتالاپ ايتامىز, ادام ءوزىنىڭ بەرگەن ساداقاسىن قايدا جۇمسالىپ جاتقانىن كورە الادى ءارى ونى باسقارا الادى», دەدى سەرىكباي قاجى وراز.
