ەلباسىنىڭ سارابدال ساياساتىنىڭ ارقاسىندا قازاقستان ورتالىق ازيا ءوڭىرى مەن تمد-دا الدىڭعى ورىنعا شىقتى. الەۋمەتتىك-باعدارلى ەكونوميكالىق باعىتتاعى باستامالارىمىز زاماناۋي, قارقىندى دامۋشى مەملەكەت قۇرۋدى قامتاماسىز ەتتى.
وسىدان 22 جىل بۇرىن ەلباسى ەل دامۋىنىڭ داڭعىل جولىن بايىپتايتىن ۇزاق مەرزىمدى «قازاقستان-2030» ستراتەگيالىق باعدارلاماسىن ۇسىنعانى ءمالىم. سالماقتى قۇجاتتا وتكەن جولىمىز باعامدالىپ, بولاشاق ەنشىسىندەگى ىرگەلى ىستەر مەجەلەندى. 1997 جىلى وسى باعدارلامانى جاريا ەتكەندە ەلباسىمىز: ء«بىز نەنى قۇرعىمىز كەلەدى, تاڭداعان ماقساتىمىزعا جەتكىزەتىن دامۋىمىزدىڭ تراەكتورياسى, ماگيسترالى قانداي بولۋى ءتيىس, سونى انىق ءبىلۋىمىز جانە ايقىن ءتۇسىنۋىمىز كەرەك» دەگەن ەدى. ايتقانى اينىماي كەلدى. قازاقستان حالقى ايانباي ەڭبەك ەتىپ, ەلدىك الەۋمەتتىك-ەكونوميكالىق دامۋى كوش باستاپ كەلەدى. زامانا سىن-قاتەرىن ەسكەرگەن «قازاقستان-2050» ستراتەگيالىق باعدارلاماسى جاڭا بەلەسىمىزدى انىقتادى.
قوعام مەن الەمدىك دامۋدىڭ جاڭعىرۋمەن ەلىمىزدە تابيعي ساباقتاستىقتاعى بيلىك تانسفورماتسياسى ءجۇردى. ەلباسى نۇرسۇلتان نازارباەۆ 19 ناۋرىزدا پرەزيدەنتتىك وكىلەتتىگىن ءوز ەركىمەن توقتاتىپ, اقوردا ەلدىك مىنبەرىنە وسىعان دەيىن تالاي ساياسي سىننان وتكەن حالىقارالىق دەڭگەيدەگى قايراتكەر ق.ك.توقاەۆ كوتەرىلدى. Nur Otan پارتياسىنىڭ كەزەكتەن تىس وتكەن XIX سەزىندە وسى تۇلعا الداعى پرەزيدەنت سايلاۋىنا تۇسەتىنى ءمالىم ەتىلدى. سەنىم مەن جەڭىس تارازىنىڭ باسىن تەڭ قىلدى. بۇل كورەگەندىكتى بارشا حالىق مويىندادى.
2019 جىلعى 2 قىركۇيەكتە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا ءوزىنىڭ العاشقى «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىن جاريالادى.
ەرتەڭگى باعىتىن, جۇرەتىن جولىن, ءوسۋ جولىنداعى مۇراتىن انىق بىلگەن ەلدەردىڭ قانداي جەڭىستەرگە جەتكەنىن تاريحتان بىلەمىز. ءبىزدىڭ ەلىمىز تاۋەلسىزدىگىنە ەندى قول جەتكىزىپ جاتقاندا الداعى 30 جىلىن ويلاسا, ەندى ءجۇرىسىن دۇرىستاپ, تىنىسىن جوندەپ العاندا سىندارلى مۇراتتاردى العا قويدى. سىندارلى مۇرات دەگەن – حالىقتىڭ جاعدايى, ول – ەلدىڭ ورلەۋى, ول – جارقىن ءومىردىڭ ساباقتاستىعى.
مەملەكەت باسشىسى قازىرگى ۋاقىتتا بىزگە تاۋەلسىزدىكتىڭ جەتىستىكتەرىن ەسەلەپ, ەلىمىزدى دامۋدىڭ جاڭا ساپالى كەزەڭىنە شىعارۋ مۇمكىندىگى بەرىلىپ وتىرعانىن باسا ايتتى.
ء«بىز بۇعان ەلباسى ساياساتىنىڭ ساباقتاستىعىن ساقتاپ, جۇيەلى رەفورمالار جۇرگىزۋ ارقىلى قول جەتكىزە الامىز. وزدەرىڭىزگە بەلگىلى, وسىنىڭ ءبارى مەنىڭ سايلاۋالدى باعدارلامامنىڭ نەگىزى بولدى. قازىر مەملەكەتتىك ورگاندار ونى جۇزەگە اسىرۋ ءۇشىن ءتيىستى جۇمىستار جۇرگىزۋدە. مەن حالىققا بەرگەن ۋادەلەرىمدى مىندەتتى تۇردە ورىندايمىن», دەدى پرەزيدەنت قاسىم-جومارت توقاەۆ.
ەلباسى نۇرسۇلتان نازارباەۆ قاسيەتتى وتانىمىزدى دامىتۋ جولىندا ەلدەگى تۇراقتىلىق پەن بەيبىتشىلىكتى تەمىرقازىق ەتىپ الدى. اسىرەسە ەلىمىزدى ەۋروپا تورىنە شىعارۋدا تۇڭعىش پرەزيدەنت ەڭبەگى ەرەن. بۇگىندە قازاقستان ەۋرازيا كەڭىستىگىندەگى ستراتەگيالىق قۋاتى كۇشتى, ماڭىزى زور مەملەكەت رەتىندە مويىندالىپ وتىر. دالەلمەن ايتساق, ازيادا الاۋىن جاعۋىمىز, ەقىۇ-عا توراعالىق ەتىپ, حالىقارالىق سامميت وتكىزۋىمىز, يسلام ىنتىماقتاستىق ۇيىمى مەن شانحاي ىنتىماقتاستىعى ۇيىمىنا توراعالىق ەتۋىمىز, الەمدىك ءدىن قايراتكەرلەرى سەزىن تۇراقتى ۇيىمداستىرۋىمىز, حالىقارالىق ەحرو-2017 كورمەسىن ۇيىمداستىرۋىمىز – ءبارى دە زور ماقتانىش, ايرىقشا ابىروي.
وسى كۇنگە دەيىنگى جەتىستىكتەرىمىز قازاقستاننىڭ بولاشاعىن جاڭاشا مەجەلەۋگە مۇمكىندىك بەرىپ وتىر. كەلەسى كەزەڭدە, ياعني 2050 جىلعا دەيىنگى ستراتەگيادا يننوۆاتسيا, وندىرىستىك-ەكونوميكالىق سەرپىن تەمىرقازىق ەتىپ الىنادى. بۇيىرسا, تاياۋ بولاشاقتا حالقىمىزدىڭ ءومىر ءسۇرۋ ساپاسى ورتاشا ەۋروپالىق دەڭگەيگە سايكەسپەك. ەلباسى مۇنى سەنىممەن ايتتى, حالىق ەلدىك ىسكە ءبىر كىسىدەي جۇمىلدى.
ەلى قادىرلەگەن, الەم ارداقتاعان ەلباسى نۇرسۇلتان نازارباەۆ بار قاجىر-قايراتىن, پاراسات-پايىمىن مەملەكەتىمىزدىڭ يگىلىگىنە جۇمساپ, ۋاقىت كوشىنەن العا وزىپ, كەلەر ۇرپاققا جارقىن ءومىردىڭ نەگىزىن قالاپ جۇرگەنىن حالىقارالىق قىراعى ساراپشىلار مەن ساياساتكەرلەر جازىپ, باعالاپ كەلەدى.
مەملەكەت باسشىسى نۇرسۇلتان نازارباەۆ 1992 جىلى جەلتوقسان ايىندا وتكەن قازاقستان حالقى فورۋمىندا ەلىمىزدەگى بىرلىك پەن كەلىسىمنىڭ ۇيىتقىسى – قازاقستان حالقى اسسامبلەياسىن قۇرۋ تۋرالى باستاما كوتەردى. بۇگىندە اسسامبلەيا قىزمەتى ەلباسى ءۇمىتىن اقتاعانى ەلدەگى بەرەكە-بىرلىكتەن كورىنەدى. ءار ەتنوس وكىلدەرى ءبىر ءۇيدىڭ بالاسىنداي, ءبىر قولدىڭ سالاسىنداي تىرشىلىك ەتىپ, جاسامپازدىق تۋىن جوعارى كوتەردى. بۇل رەتتە وسى نازىك سالانى عىلىمي-ادىستەمەلىك جاعىنان قولداۋ ءۇشىن رەسپۋبليكادا تۇڭعىش رەت ارنايى كافەدرا ەۋرازيا ۇلتتىق ۋنيۆەرسيتەتىندە اشىلدى. قازىر رەسپۋبليكا بويىنشا وسىنداي كافەدرالاردىڭ سانى 30-عا جۋىقتادى. قحا كافەدرالارى بىرلىك پەن باياندىلىقتى ساراپتايتىن عىلىمي-تاجىريبە الاڭدارىنا اينالدى.
استانا ەكونوميكالىق فورۋمى – ەۋرازيا كەڭىستىگىندە جىل سايىن وتەتىن سالماقتى شارا ەكەنى بەلگىلى. وسى جيىنعا الەمدىك ەكونوميكالىق قاۋىمداستىق وكىلدەرى, قازىرگى جانە بۇرىنعى مەملەكەتتەر باسشىلارى, نوبەل سىيلىعىنىڭ لاۋرەاتتارى, عىلىم الەمىنىڭ عۇلامالارى مەن ءىرى كاسىپكەرلەر كەلەدى. ەلباسى وسىدان 8 جىل بۇرىن ەل تاۋەلسىزدىگىنىڭ 20 جىلدىعى سالتاناتىندا استانا ەكونوميكالىق فورۋمىنىڭ نەگىزىندە «G-global» سۇحبات الاڭىن قۇرۋدى ۇسىندى. بۇگىندە وسى سۇحبات الاڭى الەمنىڭ 128 ەلىنەن 10 مىڭنان استام قاتىسۋشىنى بىرىكتىرسە, قازاقستانداعى وسى شارانىڭ بەل ورتاسىندا ەلباسى نەگىزىن قالاعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى عالىمدارى مەن ءبىلىم الۋشىلارى جۇرگەنىن ماقتانىشپەن ايتامىز. كەلىسىم مەن كەشىرىم, ۇيلەسىم مەن تولەرانتتىلىق ارقاۋىن ماقسات ەتكەن ەلباسى قىتاي, رەسەي, تاجىكستان, وزبەكستان پرەزيدەنتتەرىمەن بىرلەسىپ, ۇزاق مەرزىمدى بەيبىتشىلىك پەن بىرلىكتەگى ءوڭىر قۇرۋ تۋرالى دەكلاراتسياعا قول قويدى. شانحاي ىنتىماقتاستىعى ۇيىمىنا مۇشە مەملەكەتتەردىڭ ءاربىر بەرەكە-بىرلىك قادامى دا – تۇڭعىش پرەزيدەنت نۇرسۇلتان نازارباەۆ نازارىندا.
ەلباسىنىڭ «جالپىعا ورتاق ەڭبەك قوعامىنا قاراي 20 قادام», «بولاشاققا باعدار: رۋحاني جاڭعىرۋ» اتتى باعدارلامالىق ماقالالارى – كەشە دە, بۇگىن دە, بولاشاقتا دا ماڭىزىن جويمايتىن ءىزاشار تۇعىرناما. بۇل تۇلعا ەڭبەك ارقىلى ناتيجەگە جەتۋدىڭ جولىن, جۇيەسىن كورسەتتى. مىسالى, وسىدان تۋىنداعان «جۇمىسپەن قامتۋدىڭ جول كارتاسى-2020» باعدارلاماسى, ونىڭ بەس جىلعا ۇزارتىلۋى, «الەۋمەتتىك بەس باستاما» حالىققا بەرەرى ولشەۋسىز دەپ بىلەمىز.
ەلباسى تاريحتى سارالاپ, قازاق ەلىنىڭ مەملەكەتشىل مۇراتى – «ماڭگىلىك ەل» دەپ ەرەكشە ايتقاندا دا, ەلدىك بەرەكە-بىرلىكتى, وڭىرلىك دوستىق جانە ەكونوميكالىق قارىم-قاتىناستى, دۇنيەجۇزىلىك ءورىس پەن ورلەۋدى كوزدەگەنىن ۇمىتپاعان ابزال. بۇل رەتتە ايتقان: «باق تا, تاق تا تالاسقانعا بۇيىرمايدى, حالىقتىق ىستە جاراسقانعا بۇيىرادى» دەگەن ءسوزى بۇگىن دە, بولاشاقتا دا الەمدى, ەلدى ۇيىستىرادى دەپ ەسەپتەيمىز.
ال « ۇلى دالانىڭ جەتى قىرى» اتتى تۇجىرىمدامالىق ماقالاسى – ۇلتتىق ابىروي باستاۋىن نۇسقايتىن, ەلدى ونەگە ورىسىنە باستايتىن جول, جاڭعىرعان قازاقستاننىڭ باياندى باعدارى. ەلباسىنىڭ بۇل ماقالاسىن ستراتەگيالىق ماڭىزى بار جانە عىلىمي مەتودولوگيالىق ماقالا دەپ ءتۇسىنۋىمىز كەرەك. بۇل كەزدەيسوق شىعا قالعان ماقالا ەمەس, بۇل ەلباسىنىڭ جۇيەلى, ماقساتتى قىزمەتىنىڭ جالعاسى. ويتكەنى بۇدان بۇرىن ەلباسى «مادەني مۇرا» باعدارلاماسىن ۇسىنعان بولاتىن, سودان كەيىن «حالىق: تاريح تولقىنىندا», «بولاشاققا باعدار: رۋحاني جاڭعىرۋ» باعدارلامالارى ۇسىنىلدى. مىنە, وسىلاي جۇيەمەن كەلە جاتقان باعدارلاما. سوندىقتان دا ەلباسىنىڭ بۇل ەڭبەگىن وسى ۇلكەن ءىستىڭ جالعاسى دەپ ءبىلۋىمىز كەرەك.
ءاربىر مەملەكەتتىڭ, ءاربىر وبلىستىڭ, ءاربىر قالانىڭ تاريحىندا جاۋاپتى كەزەڭدەر بولادى. 2018 جىلى 19 ماۋسىمدا ەلباسى جارلىعىمەن بۇرىنعى وڭتۇستىك قازاقستان وبلىسى تۇركىستان وبلىسى بولىپ تۇرلەنىپ, ونىڭ ورتالىعى رەتىندە تۇركىستان قالاسى بەكىتىلدى. ەلباسىنىڭ بۇل شەشىمى – تۇركىستاننىڭ قايتا تۇلەپ, ەلىمىزدىڭ ءوسىپ-وركەندەۋىنە ۇلەس قوساتىن جاڭا ورتالىققا اينالۋىنا جول اشتى. وبلىس ورتالىعى اتانعان تۇركىستان قالاسى ەندىگى جەردە ەلىمىزدىڭ عانا ەمەس, بۇكىل ورتالىق ازيانىڭ, تۇتاس تۇركى الەمىنىڭ بەلگىلى ساۋدا-ەكونوميكالىق جانە رۋحاني-مادەني ورتالىقتارىنىڭ ءبىرى بولارى ءسوزسىز.
ءار قازاقتىڭ جۇرەگىندە ماقتانىش سەزىمىن ۇيالاتقان تۇركىستان تەك بىزگە عانا ەمەس, كۇللى تۇركى جۇرتشىلىعىنا قاسيەتتى ءارى قادىرلى مەكەن. اقىن ماعجان جۇماباەۆ «تۇركىستان – ەكى دۇنيە ەسىگى عوي, تۇركىستان – ەر تۇرىكتىڭ بەسىگى عوي» دەپ بەكەر جىرلاعان جوق. حالقىمىزدا ء«مادينادا – مۇحاممەد, تۇركىستاندا – قوجا-احمەت» دەگەن ءسوز بار. وسىنداي سان الۋان فاكتورلار تۇركىستاندى تۇتاس ءتۇبى ءبىر تۇركى جۇرتىنىڭ رۋحاني ورتالىعىنا اينالدىردى.
نۇرسۇلتان نازارباەۆ جارلىققا جاريا تۇردە قول قويۋ راسىمىندە سويلەگەن سوزىندە: «وبلىس ورتالىعى عاسىرلار بويى قازاق حاندىعىنىڭ جانە بۇكىل تۇركى الەمىنىڭ ساياسي ءارى رۋحاني ورتالىعى بولعان تۇركىستان قالاسىنا كوشىرىلەدى», دەدى. دارا شەشىم. دارا شەشىمدى دارا تۇلعالار عانا قابىلدايدى. دارا تۇلعانى زامان تۋدىراتىنىن تاريح ارقاشان ەسىمىزگە سالىپ وتىرادى. ال تاريحي تۇلعانى ءوز زامانىنداعى ءتۇرلى شەشۋشى وقيعالاردان مۇلدە ءبولىپ قاراۋعا بولمايدى.
تۇركىستان شىن مانىندە ەكى عاسىر بويى قازاق حاندىعىنىڭ استاناسى بولعان, تاريحى تەرەڭدە جاتقان شاھار. ناقتىراق ايتقاندا, قازاق ەلىنىڭ رۋحاني جۇرەگى, قازاقتىڭ كوپتەگەن اياۋلى پەرزەنتتەرى ماڭگىگە جاي تاپقان قاسيەتتى مەكەن. بۇل قالادا ۇلتىمىزدىڭ تاعدىرى تالقىلانىپ, ءتۇرلى شەشىم قابىلدانعان. قازاقتىڭ نەبىر ۇلى تۇلعالارى دۇنيەگە كەلگەن. وسىندا جەرلەنگەن 164 ايگىلى تۇلعانىڭ 21-ءى ەل باسقارعان حان, 30-دان استامى قول باستاعان باتىر, اۋقىمدى ءسوز باستاعان بي ەكەنىن ەسكەرسەك, ەلباسى شەشىمىنىڭ دۇرىستىعىنا تاعى دا كوز جەتكىزەمىز.
قاشاندا تىندىرىمدى ىستەر مەن تياناقتى ناتيجەلەردى باستى ماقسات ەتىپ ۇستانعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ستۋدەنتتەر سانىنىڭ ارتۋىنا بايلانىستى جاڭا جاتاقحانا سالاتىن بولادى. بەس قاباتتى 2467 ورىنعا ارنالعان ءۇش زاماناۋي ستۋدەنتتەر ءۇيى احمەت بايتۇرسىن ۇلى مەن كەنەن ءازىرباي ۇلى كوشەلەرىنىڭ قيىلىسىنان بوي كوتەرمەك. بۇل ەلباسىنىڭ بەس الەۋمەتتىك باستاماسى نەگىزىندە جۇزەگە اسقالى وتىر. ولاي دەيتىنىمىز, نۇرسۇلتان نازارباەۆ پارلامەنت پالاتالارىنىڭ بىرلەسكەن وتىرىسىندا ستۋدەنتتەردى جاتاقحانامەن قامتۋدى تولىقتاي شەشۋدى تاپسىرعان بولاتىن.
ء«بىز الەمدىك ستاندارتتارعا ساي ءبىلىم بەرۋ جۇيەسىن قالىپتاستىرا وتىرىپ, ستۋدەنتتەردىڭ ءبىلىم الۋىنا جانە تۇراتىن جەرىنە جاعداي جاساۋعا ءتيىستى نازار اۋدارۋىمىز قاجەت. 2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرامىن. بۇل الداعى جىلداردا وسە تۇسەتىن سۇرانىستى ەسكەرگەننىڭ وزىندە جاتاقحانا تاپشىلىعىن ءبىرجولا شەشەدى», دەدى ەلباسى.
بۇل ءبىلىم سالاسىنىڭ باسشىلارىن عانا ەمەس, ەلىمىزدەگى بارلىق ستۋدەنت-جاستاردى جانە ولاردىڭ اتا-انالارىن قاتتى قۋانتتى. دەمەك, 2019-2020 جىل جوعارى وقۋ ورنىمىز ءۇشىن تابىستى جىل دەۋگە نەگىز بار. قازىرگى تاڭدا بولاشاقتا سالىناتىن جاتاقحانالاردان بولەك, باس عيمارات پەن وقۋ-زەرتحانالىق عيماراتى اراسىنان زاماناۋي سپورت-ساۋىقتىرۋ ورتالىعىنىڭ قۇرىلىسى باستالىپ كەتتى.
الدىمىزداعى باستى ماقسات – ەلىمىزدەگى قولعا الىپ وتىرعان جاڭا رەفورمالارعا بايلانىستى ۋنيۆەرسيتەتىمىزدەگى ءبىلىم بەرۋ مەن عىلىمي جۇمىستاردى الەمدىك ستاندارتتارعا ساي جەتىلدىرۋ, وقۋ-ادىستەمەلىك باعدارلامالاردى جاڭارتۋ, جاقسارتۋ. قازىرگى يننوۆاتسيالىق تالاپتارعا ساي ساپالى ماماندار دايارلاۋ جۇمىستارى جان-جاقتى جالعاسىن تابادى. فاكۋلتەتتەر مەن كافەدرالاردىڭ ماتەريالدىق-تەحنيكالىق بازاسىن نىعايتىپ, ەلىمىزگە قاجەتتى ساپالى ماماندار دايارلاپ بەرۋ ءۇشىن ءبىلىم بەرۋدىڭ تەرەڭدەتىلگەن وقۋ-ادىستەمەلىك جۇيەلەرى مەن عىلىمي-زەرتتەۋ جۇمىستارىنىڭ جاڭا باعدارلامالارىن قالىپتاستىرۋ باستى ستراتەگيالىق باعىت-باعدارىمىز بولىپ قالا بەرمەكشى.
جالپى, تاۋەلسىزدىك دەگەندە ەل ساناسىندا وركەندى حالقىمىز بەن تۇڭعىش پرەزيدەنتىمىز تۋرالى تانىم-تۇسىنىك جاڭعىرۋى ءتيىس. قازاقستان مەملەكەتىنىڭ ىرگەتاسىن قالاۋشى – تۇڭعىش پرەزيدەنت, ەلباسىنىڭ بولمىسىندا ۇلتىمىزدىڭ اسىل مۇراتتارى مەن الەمدىك جانە ۇلتتىق وركەنيەت جەتىستىكتەرى توعىسقان. ول قازاقستان حالقى ءۇشىن كۇن-ءتۇن دەمەي جانىن شۇبەرەككە ءتۇيىپ, سول كەمەلدىككە ابىرويمەن جەتكەن جاسامپاز تۇلعا.
تاريحي قايراتكەردىڭ قاداۋ-قاداۋ ەكونوميكالىق, الەۋمەتتىك, مادەني رەفورمالارىنا الەم ءوز باعاسىن بەرىپ ۇلگەردى, ال قوعامنىڭ بار جىگىنە سەرپىن بەرگەن «رۋحاني جاڭعىرۋ» جانە « ۇلى دالانىڭ جەتى قىرى» باعدارلامالىق ەڭبەكتەرى ەل رۋحىن اسقاقتاتىپ, ەل تاۋەلسىزدىگىنىڭ جاڭا مۇمكىندىكتەرىن ايقىندادى.
ازاتتىقتىڭ ەلەڭ-الاڭىنداعى ورداباسىداعى جيىننان كەيىنگى تۇركىستاننىڭ تۇلەۋىمەن جالعاسىپ, بايتاق جەرىمىزدىڭ بار يگىلىگى جاڭا ەلوردامەن ەسەلەنىپ ەلباسى فەنومەنىنىڭ باياندى ەكەنىن كورسەتتى. بۇل – جاقسىلىق پەن جاراسىمدىقتىڭ ۇندەسۋى. بۇل – تاريح تولقىنىنداعى بىلىك پەن بيلىكتىڭ, ءداستۇر مەن جاسامپازدىقتىڭ ۇيلەسىمى.
قورىتا ايتقاندا, تۇڭعىش پرەزيدەنت كۇنى – قازاقستان حالقىنىڭ مارتەبەلى مەرەكەسى. بۇل – تاريحي تاڭداۋ كۇنى, بارشا وتانداستارىمىزدىڭ ەلباسى توڭىرەگىنە توپتاسۋ كۇنى.
«ەرى جوق بولسا, ەل – جەتىم, ەلى باعالاماسا, ەر – جەتىم» دەيدى حالىق دانالىعى. تاۋبە, بىزدە ەلىن ورگە سۇيرەيتىن ەر دە, ازاماتىن قۇرمەت تۇتاتىن ەل دە بار.
مۇنى دۇنيە ءجۇزى ساراپشىلارى ايتادى, ءبىز وعان ماقتانامىز, قۋانامىز.
ەلدىك ماقتانىش, الەمدىك مەرەي باياندى بولعاي!
ەرلان سىدىقوۆ,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, ۇعا اكادەميگى
