بولاتبەك بەيىسبەكتىڭ وتباسىندا سەگىز ادام شىعارماشىلىقپەن اينالىسادى. بولاتبەك بەكتاس ۇلى بەيىسبەكوۆ, كۇلاش ايداربەكوۆا, بەرىك بولاتبەك ۇلى بەيىسبەكوۆ, ءمادينا نۇرلانقىزى احمەتوۆا, ۆەنەرا بولاتبەكقىزى بەيىسبەكوۆا, اقبوتا بولاتبەكقىزى بەيىسبەكوۆا, ارايلىم بولاتبەكقىزى بەيىسبەكوۆا جانە نۇراي بەرىكقىزى بەيىسبەك. ۇلكەن شىعارامشىلىق اۋلەتتە قازاقستان سۋرەتشىلەر وداعىنىڭ جەتى مۇشەسى, قازاقستان قولونەرشىلەر وداعىنىڭ بەس مۇشەسى بار. ولاردىڭ ارعى اتا-بابالارى قولونەرىمەن اينالىسقان, وسى كوركەم داستۇردەن باستاۋ الاتىن اۋلەتتىڭ ونەردەگى ءوز جولى, ءوزىنىڭ دارا ءستيلى, وزىندىك قولتاڭباسى قالىپتاسقان.
شارانىڭ اشىلۋ سالتاناتىندا ءسوز العان ۇلتتىق مۋزەي ديرەكتورىنىڭ ورىنباسارى الماز نۇرازحان: «قۇرمەتتى, ونەر سۇيەر قاۋىم! قازاقستاندا اۋلەتپەن ورتاق جۇمىس ىستەيتىندەر ساناۋلى عانا. سونىڭ ءبىرى – بەيىسبەكوۆتەر وتباسى. بۇگىنگى كورمەگە ۇسىنىلعان تۋىندىلار دۇنيەجۇزىنە تانىستىرىلىپ, تۇركيا, نيدەرلاندى, گەرمانيا, ت.ب. ەلدەرگە كورسەتىلىپ, لايىقتى باعاسىن العان. ۇرپاقتان-ۇرپاققا جالعاسقان وتباسىلىق ونەردىڭ ارقاسىندا بۇل ازاماتتار قازاقتىڭ رۋحىن كوتەرىپ, ۇلتتىق ونەردى ناسيحاتتاپ ءجۇر. سىزدەردى مادەنيەت جانە سپورت ءمينيسترى اقتوتى رايىمقۇلوۆانىڭ, ۇلتتىق مۋزەي ديرەكتورى ارىستانبەك مۇحامەدي ۇلىنىڭ اتىنان قۇتتىقتاپ, زور دەنساۋلىق تىلەيمىن. ءوسىپ, ونە بەرىڭىزدەر», - دەدى.
بەيسبەكوۆ بولاتبەك بەكتاس ۇلى - شىعارماشىلىق جەتىستىكتەرىنىڭ ارقاسىندا تۇركىمەنستان, كازان,تۋرتسيا, تاشكەنت, گەرمانيا, قىتايدا وتكەن دۇنيە جۇزىلىك قولونەر شەبەرلەرىنىڭ 50 جىلدىق مەرەيتويىندا, ينديا, ۆەتنامدا جانە الىس-جاقىن شەتەلدەردە كورمە, سيمپوزيۋمدارعا قاتىسىپ, قازاق قولونەرىن ناسيحاتتاۋدا. جارى ايداربەكوۆا كۇلاش وسەرقىزى دا جولداسى ب. بەيسبەكوۆپەن قولونەردىڭ قۇندىلىعىن قارىشتاتىپ كەلەدى. ونەرلى وتباسىندا التى بالانى تاربيەلەگەن التىن قۇرساقتى انا مەن ارداقتى اكەنىڭ ءتورت بالاسى قازاق ونەرىنىڭ جاناشىرلارىنا اينالعان.
قر مادەنيەت قايراتكەرى, مۋزەي ءىسىنىڭ ارداگەرى, قر قولونەرشىلەر وداعىنىڭ كورمە كۋراتورى رىسگۇل بەكتاليەۆا: «ۇلتتىق مۋزەي قاشاندا ۇلت ونەرىن دارىپتەيتىن, ۇلت ونەرىن دۇنيەجۇزىنە پاش ەتەتىن تانىم مەن تاريح, تاعلىم ورداسى. سوندىقتان قولونەر شەبەرلەرىنىڭ, ونەرلى وتباسىنىڭ ءوزىنىڭ قازاقستانداعى العى جولىن ۇلتتىق مۋزەيدەن باستاۋى زاڭدىلىق. قازاقتىڭ ويۋ-ورنەگىن سويلەتسە, ول ارمان-تىلەكتى, باتانى, باقىت, تولىسۋ, كوبەيۋدى بىلدىرەدى. بۇگىنگى كورمەدەن سول عاجاپ ەرەكشەلىكتى تاماشالاي الاسىزدار», - دەدى.
ۇيادا نە كورسەڭ, ۇشقاندا سونى ىلەرسىڭ دەمەكشى, بولاتبەك بەكتاس ۇلىنىڭ وتباسىلىق ونەرى اتا-باباسىنان باستاۋ العان. بۇگىندە بۇل ونەر ۇرپاقتان-ۇرپاققا جالعاسىپ, جانۇياداعى مەكتەپ قابىرعاسىندا جۇرگەن بالالارىنا دەيىن دارىپتى. ءبىر جاعادان باس, ءبىر جەڭنەن قول شىعارىپ, زور ەڭبەكپەن جۇزەگە اسىرعان ونەرلى وتباسىنىڭ وراسان جۇمىسى حالىققا بەرەر ۇلگى-ونەگەسى مول, قايتالانباس تۋىندىلار. ولاردىڭ ارقايسىسى اۆتوردىڭ وزگەگە ۇقساماس, وزىنە ءتان قولتاڭبالىق شەبەرلىكتەرىن ايقىندايتىن بۇيىمدار. ونىڭ ناتيجەسى بۇعان دەيىن وتكىزىلگەن «اسىلمۇرا», «شاڭىراق», «تۋعانجەرگە تاعزىم», «كوكتەم ءۇنى» اتتى وتباسىلىق شىعارماشىلىق كورمەلەرىندە كورىنىس العان.
شارا بارىسىندا اقبوتا بولاتبەكقىزى بەيىسبەكوۆانىڭ اۆتورلىعىمەن قازاق ۇلتتىق كيىم ۇلگىلەرىنىڭ دەفيلەسى كورسەتىلدى.
سونىمەن قاتار نۇر-سۇلتان قالاسى سۋرەتشىلەر وداعىنىڭ توراعاسى يسمايلوۆ ءومىرالى وتباسى مۇشەلەرىن ۇزدىك ونەرلەرى ءۇشىن ماراپاتتاپ, شىعارماشىلىق تابىس تىلەدى.
