بيىل قازاقستان رەسپۋبليكاسى جيھاز جانە اعاش وڭدەۋ ءوندىرىس كاسىپورىندارىنىڭ قاۋىمداستىعى ءوزىنىڭ جيىرما جىلدىق مەرەيتويىن اتاپ وتۋدە. جيھاز جانە اعاش وڭدەۋ ونەركاسىبى حالىقتىڭ ءبىرىنشى كەزەكتەگى قاجەتتىلىكتەرىن قاناعاتتاندىرۋعا باعىتتالعان ماڭىزدى سالا بولىپ تابىلادى. بۇگىندە قازاقستاندىق نارىقتا وسى باعىتتا 800-دەن استام ءوندىرىس وشاعى جۇمىس ىستەيدى. سوڭعى 6 جىلدا جۇمىس ىستەپ تۇرعان كاسىپورىندار سانى 1,6 ەسە ارتتى.
جيھاز جاساۋ باعىتىنداعى ءوندىرىس وشاقتارىنىڭ باسىم بولىگى الماتى قالاسى مەن الماتى وبلىسىندا ورنالاسقان, ونىڭ كورسەتكىشى 42,6 % قۇرايدى. سونداي-اق بارشامىز كۇندەلىكتى ومىردە تۇتىناتىن جيھازداردىڭ ەداۋىر بولىگى پاۆلودار وبلىسىندا - 8,6%, نۇر-سۇلتان قالاسى جانە اقمولا وبلىسىندا - 12,3%, قاراعاندى وبلىسىندا - 6,8%, شىعىس قازاقستان وبلىسىندا - 6,1 %, شىمكەنت قالاسى جانە تۇركىستان وبلىسىندا - 8,2% وندىرىلەدى. وتاندىق جيھاز ءوندىرىسىنىڭ كاسىپورىندارى ساپا مەنەدجمەنتى جانە ەكولوگيالىق مەنەدجمەنت جۇيەسىنە ساي, زاماناۋي ديزاين سەرتيفيكاتتارىمەن راستالعان ءونىم شىعارادى.
قازىرگى ۋاقىتتا يندۋستريالىق دامۋ جانە ونەركاسىپتىك قاۋىپسىزدىك كوميتەتى 2019 جىلعى 5 ناۋرىزداعى قازاقستان رەسپۋبليكاسى ۇكىمەتىنىڭ وتىرىسىندا ماقۇلدانعان, 2019 – 2021 جىلدارعا ارنالعان جيھاز ونەركاسىبىن دامىتۋ جونىندەگى جول كارتاسىن ىسكە اسىرۋدا, ونىڭ شەڭبەرىندە مەملەكەتتىك قولداۋ مەن ەكونوميكالىق ىنتالاندىرۋدىڭ بىرقاتار جۇيەلى شارالارى كوزدەلگەن, ولاردىڭ ءبىر بولىگى قازىردىڭ وزىندە جۇزەگە استى.
جول كارتاسىنىڭ نەگىزگى باعىتتارىنا توقتالساق: جۇمىس ىستەپ تۇرعان وندىرىستەردى شيكىزاتپەن قامتاماسىز ەتۋ, تاۋارلاردىڭ زاڭسىز اينالىمىنا قارسى كۇرەس جۇرگىزۋ, مەملەكەتتىك ساتىپ الۋ سالاسىنداعى شارالار جانە قازاقستاندىق قامتۋ ۇلەسىن ارتتىرۋ, تەحنيكالىق رەتتەۋ جانە ەكونوميكالىق ىنتالاندىرۋ شارالارى, سالانى بىلىكتى كادر رەسۋرستارىمەن قامتاماسىز ەتۋ, وتاندىق تاۋار وندىرۋشىلەردىڭ ونىمدەرىن ىشكى نارىقتا دامىتۋ, جۇمىس ىستەپ تۇرعان وندىرىستەردى كەڭەيتۋ جانە جاڭا وندىرىستەردى ىسكە اسىرۋ, ينۆەستيتسيالىق جوبالاردى جولعا قويۋ بولىپ تابىلادى.
جول كارتاسىن ىسكە اسىرۋ اياسىندا جيھاز ونەركاسىبى تاۋارلارىن مەملەكەتتىك ساتىپ الۋدا جەرگىلىكتى قامتۋ بويىنشا نىسانالى ينديكاتورلار ورناتىلدى.
سونىمەن قاتار جيھاز ونەركاسىبىنىڭ تاۋارلارى 2019 جىلعى 1 شىلدەدەن باستاپ مەملەكەتتىك ساتىپ الۋلار الدىن الا بىلىكتىلىك سۇرىپتاۋمەن بايقاۋ تاسىلىمەن وتكىزىلەتىن تاۋارلار, جۇمىستار مەن قىزمەتتەر تىزبەسىنە ەنگىزىلگەن.
مەملەكەتتىك ساتىپ الۋدا الدىن الا بىلىكتىلىك ىرىكتەۋىنەن ءوتۋ كەزىندە يندۋستريالىق سەرتيفيكات بەرۋ بويىنشا تالاپ ەنگىزىلدى.
وتىرۋعا ارنالعان جيھاز جانە وزگە دە جيھاز تۇرلەرى شارتتى شىعارۋعا جول بەرىلمەيتىن تاۋارلار تىزبەسىنە ەنگىزىلگەن, سول ارقىلى سەرتيفيكاتتالماعان جيھاز ونىمدەرىن اكەلۋگە توسقاۋىل قويىلدى.
