القالى جيىنعا قازاقستان رەسپۋبليكاسى پرەزيدەنتىنىڭ كومەكشىسى ماۋلەن اشىمباەۆ, حالىقارالىق تۇركى اكادەمياسىنىڭ پرەزيدەنتى دارحان قىدىرالى, قىرعىز رەسپۋبليكاسى پرەزيدەنتىنىڭ كەڭەسشىسى سۇلتان راەۆ, قىرعىز رەسپۋبليكاسى ءبىلىم جانە عىلىمي ءمينيسترى كانىبەك يساكوۆ, قازاقستان رەسپۋبليكاسىنىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى قايرات نۇرپەيىسوۆ, قىرعىز رەسپۋبليكانىڭ جوگوركۋ كەنەش دەپۋتاتتارى, بەلگىلى مەملەكەت جانە قوعام قايراتكەرلەرى, ەكى ەلدىڭ تانىمال عالىمدارى, اكادەميكتەر, عىلىمي ينستيتۋت باسشىلارى, زيالى قاۋىم وكىلدەرى جانە جۋرناليستەر قاتىستى.
ي.اراباەۆ اتىنداعى قىرعىز مەملەكەتتىك ۋنيۆەرسيتەتىنىڭ باس عيماراتىندا وتكەن فورۋم قازاق-قىرعىز باۋىرلاستىعى مەن تۇلعالار تاعىلىمىن ارقاۋ ەتتى.
جيىن بارىسىندا قازاق-قىرعىز زيالىلارى باۋىرلاس ەلدەر اراسىنداعى ىنتىماقتاستىق, ورتاق رۋحاني قۇندىلىقتار جايىندا وي ءبولىسىپ, جاسالىپ جاتقان ەسەلى ەڭبەكتەرگە وڭ باعا بەردى. سونداي-اق, ادەبيەت, ونەر جانە عىلىم سالاسىنداعى ساباقتاستىقتىڭ ارى قاراي تۇركى الەمى مەن جاھاندىق مادەني بايلانىستاردا الاتىن ورنى تۋرالى پىكىر الىستى.
وسى ورايدا, ءسوز العان قازاقستان رەسپۋبليكاسى پرەزيدەنتىنىڭ كومەكشىسى ماۋلەن اشىمباەۆ وتكەن عاسىرلاردا ەكى ەلدىڭ دوستىعىنىڭ نىعايۋىنا ۇلت زيالىلارىنىڭ زور ۇلەسىن قوسسا, ەگەمەندىك العان جاڭا داۋىردە باۋىرلاس ەلدەردىڭ اراسىنداعى ىنتىماقتاستىقتى قر تۇڭعىش پرەزيدەنتى – ەلباسى ن. نازارباەۆتىڭ باستاماسىمەن «ماڭگىلىك دوستىق» تۋرالى شارتقا قول قويۋ ارقىلى نىعايتا تۇسكەنىن ايتتى. بۇعان قوسا ول زيالى قاۋىم اراسىنداعى ىنتىماقتاستىق پەن مادەني بايلانىس ءداستۇرىنىڭ وسكەلەڭ ۇرپاق ءۇشىن ماڭىزى زور ەكەنىن, ونى جاستارعا كەڭىنەن ناسيحاتتاۋ كەرەك ەكەنىنە توقتالدى.
سونىمەن قاتار, فورۋم اياسىندا حالىقارالىق تۇركى اكادەمياسى باسىپ شىعارعان ءۇش جاڭا كىتاپتىڭ تۇساۋكەسەر ءراسىمى ءوتتى. اتاپ ايتقاندا و.كاراەۆتىڭ «چاگاتايسكي ۋلۋس. گوسۋدارستۆو حايدۋ. موگوليستان» اتتى ەڭبەگى, قازاق تىلىنە العاش رەت تولىق اۋدارىلىپ باسىلعان قىرعىز حالقىنىڭ تاريحي داستانى «ەر ەسىم» جانە ز.ك.كۋرمانوۆتىڭ «كىرگىزسكي فيليال پارتي «الاش»: سوزدانيە, دەياتەلنوست, سۋدبا» اتتى كىتاپتارى كوپشىلىك نازارىنا ۇسىنىلدى.
باسقوسۋدان كەيىن فورۋم دەلەگاتتارى چون-تاش اۋىلىندا ورنالاسقان, حح عاسىردىڭ 30 جىلدارداعى رەپرەسسيا قۇرباندارىنا ارنالىپ سالىنعان «اتا-بەيت» مەموريالدىق كەشەنىنە ارنايى بارىپ, گۇل شوقتارىن قويىپ, تاعزىم ەتتى.
ايتا كەتۋ كەرەك, قازاق-قىرعىز زيالىلارىنىڭ العاشقى باسقوسۋى تۇركى اكادەمياسىنىڭ باستاماسىمەن 2018 جىلدىڭ ءساۋىر ايىندا نۇر-سۇلتان قالاسىندا وتكەن بولاتىن. بۇدان كەيىن تۋىسقان ەكى ەلدىڭ ىنتىماقتاستىعىنا ايرىقشا ىقپال ەتكەن يگى شارا سول جىلعى قازان ايىندا وش قالاسىندا جالعاسىن تاپتى.
سونىمەن قاتار, ۇلى دالانىڭ ماڭگىلىك ميراسى “ماناس” داستانى مەن كورنەكتى عالىم شوقان ءۋاليحانوۆ تاعىلىمىنا ارنالعان ءۇشىنشى فورۋم بيىلعى ماۋسىم ايىندا جەتىسۋ جەرىندە ۇيىمداستىرىلدى.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قىرعىز ەلىنە رەسمي ساپارى قارساڭىندا بىشكەك قالاسىندا وتكەن ءتورتىنشى جيىن ەكى ەلدىڭ بەكەم باۋىرلاستىعى تاقىرىبىنا ارنالدى.
