ب. نۇرىمبەتوۆتىڭ ايتۋىنشا, شەتەلدىك جۇمىس كۇشىن تارتاتىن كاسىپورىندارعا تەكسەرۋ جۇرگىزگەننەن كەيىن, قازاقستاندىق جانە شەتەلدىك مامانداردىڭ اراسىندا ەڭبەكاقى تولەۋ مەن ەڭبەك جاعدايلارىنداعى سايكەسسىزدىك پروبلەماسى انىقتالدى. وسىعان بايلانىستى ەڭبەك جانە حالىقتى الەۋمەتتىك قورعاۋ مينيسترلىگى قر زاڭناماسىنا بىرقاتار تۇزەتۋلەر دايىندادى.
«ەگەر شەتەلدىك جۇمىس كۇشىن تارتاتىن كومپانيا ەلىمىزدىڭ زاڭناماسىن ساقتاماۋعا جۇيەلى تۇردە جول بەرسە, وندا ونى كۇشەيتۋ قاجەت. سوندىقتان بۇگىندە ماجىلىستە تەڭ تۇرمىس جاعدايلارىن جاساۋ بويىنشا جۇمىس بەرۋشىلەرگە قوسىمشا مىندەتتەمە مەن جاۋاپكەرشىلىك جۇكتەلەتىن زاڭ جوباسى قارالۋدا. بۇل بۇعان دەيىن زاڭنامادا بولماعان», — دەدى ب. نۇرىمبەتوۆ.
قر ەحاقم جىل سايىنعى نەگىزدە شەتەلدىك جۇمىس كۇشىن تارتاتىن كاسىپورىنداردى تەكسەرۋ جونىندە ۇسىنىس بىلدىرۋدە.
«بۇگىنگى تاڭدا, قولدانىستاعى زاڭناماعا سايكەس, مەملەكەتتىك ەڭبەك ينسپەكتورى كاسىپورىنداردى جىل سايىن جوسپارلى تۇردە تەكسەرە المايدى, تەك بەس جىلدا ءبىر رەت تەكسەرەدى. سوندىقتان شەتەلدىك جۇمىس كۇشىن تارتاتىن كومپانيالار ءۇشىن ءبىز تەكسەرۋ كريتەريلەرى بويىنشا ەڭبەك ينسپەكتسياسىنا جىل سايىن پروفيلاكتيكالىق نەگىزدە وسى كاسىپورىنداردى تەكسەرىپ وتىرۋىنا مۇمكىندىك بەرۋ تۋرالى ۇسىنىستار ەنگىزەمىز», — دەدى مينيستر.
سونىمەن بىرگە ءوڭىر اكىمدىكتەرىنە ەڭبەك نارىعىن جان-جاقتى زەرتتەگەننەن كەيىن شەتەلدىك جۇمىس كۇشىن (شجك) تارتۋعا كۆوتا قالىپتاستىرۋ جانە شجك تارتاتىن جۇمىس بەرۋشىلەردىڭ جەرگىلىكتى كادرلارمەن قامتۋىن ارتتىرۋدى قامتاماسىز ەتۋ ۇسىنىلدى.
«بۇگىنگى تاڭدا ەلىمىزدە 50 مىڭ شەتەلدىك مامانعا جۇمىس ىستەۋگە رۇقسات ەتىلگەن. قازىر كەلەسى جىلعا كۆوتا دايىنداپ جاتىرمىز. ەڭبەك جانە حالىقتى الەۋمەتتىك قورعاۋ مينيسترلىگى ۇكىمەتكە وسى كۆوتانى ەكى ەسەگە جۋىق ازايتۋدى ۇسىنۋعا نيەتتى», — دەدى ب. نۇرىمبەتوۆ.
سونداي-اق, ەحاقم ءتورتىنشى سانات — جۇمىسشى ماماندىقتارى بويىنشا شەتەلدىك مامانداردى تارتۋعا قويىلاتىن تالاپتاردى قاتاڭداتۋدى جوسپارلاپ وتىر.
«ياعني, ءبىز ەرەجەلەردە جەرگىلىكتى اتقارۋشى ورگاندارعا ەڭبەك نارىعىن مۇقيات زەرتتەگەننەن كەيىن كۆوتالار بويىنشا ۇسىنىستاردى قالىپتاستىرۋعا قويىلاتىن تالاپتاردى بەلگىلەيمىز. ەگەر ەڭبەك نارىعىندا بىزدە وسى ماماندىقتار مەن كاسىپتەردىڭ ماماندارى بولسا, وندا بۇل رۇقساتتار بەرىلمەيدى. ءبىز ءۇشىنشى جانە ءتورتىنشى ساناتتارعا رۇقسات مەرزىمى اياقتالعاننان كەيىن شەتەلدىك مامانداردى قازاقستاندىق ازاماتقا اۋىستىرۋ ءۇشىن زاڭنامادا بۇرىننان بار ەرەجەلەردى قايتارۋ ماسەلەسىن پىسىقتاپ جاتىرمىز», — دەدى مينيستر.
