ىنتىماقتىڭ ۇيىتقىسى بولا بەرەيىك
بەيسەنبى, 18 قازان 2012 7:41
زامانا اعىمىمەن اتا-بابالارىمىز تاعدىر تاۋقىمەتىن تارتا رەپرەسسيا جىلدارى جەتىسۋ جەرىنە جەتىپ, تۇراقتاپ قالىپتى. قازاق حالقىنىڭ ءبىزدىڭ بابالارىمىزعا ۇلكەن تۇسىنىستىكپەن قاراپ, ىرگەلەرىنەن جەر ءبولىپ بەرىپ, تىرشىلىك ەتۋلەرىنە مۇمكىندىك تۋعىزعانىنا اتا-بابالارىمىزدىڭ راحمەتتەرىن جاۋدىرىپ وتىرعانىن سان رەت ەستىگەنبىز.
بەيسەنبى, 18 قازان 2012 7:41
زامانا اعىمىمەن اتا-بابالارىمىز تاعدىر تاۋقىمەتىن تارتا رەپرەسسيا جىلدارى جەتىسۋ جەرىنە جەتىپ, تۇراقتاپ قالىپتى. قازاق حالقىنىڭ ءبىزدىڭ بابالارىمىزعا ۇلكەن تۇسىنىستىكپەن قاراپ, ىرگەلەرىنەن جەر ءبولىپ بەرىپ, تىرشىلىك ەتۋلەرىنە مۇمكىندىك تۋعىزعانىنا اتا-بابالارىمىزدىڭ راحمەتتەرىن جاۋدىرىپ وتىرعانىن سان رەت ەستىگەنبىز.
بۇگىنگى ۇرپاقتىڭ, ناقتىلاي ءتۇسسەم, مەنىڭ قانداستارىم – كارىستەردىڭ دە قازاقتارعا ايتارى تەك العىس. سول قامقورلىقتى جەتە ءتۇسىنگەن اتالارىمىز قازاقتارعا ادالدىق تانىتۋمەن شەكتەلمەي, جاقسىلىققا جاقسىلىقپەن جاۋاپ قايتارۋ ءۇشىن جەر تىرمالاپ ەڭبەك ەتكەن. شىنى كەرەك, كوكونىس ونىمدەرى, ونىڭ ىشىندە پياز وسىرۋدە, جالپى سان ءتۇرلى كوكونىستەردەن اششى-تۇششى سالات ءمازىرلەرىن جاساۋدا كارىستەر وتە شەبەر حالىق. ولاردىڭ قولىنان شىققان ءدام وزىندىك ەرەكشەلىگىمەن دارالاناتىنى تاعى انىق. سونىمەن, جەتىسۋ جەرىندە كارىستەر قازاقتارعا ادال ەڭبەكتەرىمەن جاعىپ, ەتەنە ارالاسىپ, قازاقستان اتتى ورتاق ءۇيىمىزدىڭ كەرەگەسى كەڭ, بوساعاسى بەرىك, شاڭىراعى بيىك بولۋىنا قۇددى قارلىعاشتىڭ قاناتىمەن سۋ سەپكەندەي سەپتىگىن تيگىزۋگە تالپىنۋدا. سول ۇردىستەن بۇگىنگى ۇرپاق تا تىنباي ەڭبەك ەتۋدە.
ەلباسىنىڭ جالپىعا ورتاق ەڭبەك قوعامىنا قاراي 20 قادام اتتى ماقالاسىن ءبىز – كارىستەر دە جينالىپ وتىرىپ وقىپ تالقىلاعانىمىزدا, وندا ايتىلعان ماسەلەلەر كوڭىلىمىزدەگى كوپ جايدى ءدوپ باستى. ويتكەنى, مەنىڭ قانداستارىمنىڭ باسىم بولىگى اۋىلداس قازاقتارىمەن بىرگە القاپتاردا ەڭبەك كورىگىن قىزدىرىپ جۇرگەن جاندار عوي. مىنە, كۇزگى جيىن-تەرىن جۇمىستارى دا اياقتالىپ قالدى. ەرتە كوكتەمنەن باستاپ الا جازداي ەتكەن ەڭبەكتىڭ جەمىسىن كورۋدەمىز. بەرەكەسىن بەرسە, بيىل جەتىسۋ وڭىرىندە ءونىم ءتۇسىمى جاقسى بولدى. بىلە بىلسەك, بۇل دا ىنتىماقپەن ىستەلگەن جۇمىستىڭ ناتيجەسى. قازاقتا «ىرىس الدى – ىنتىماق» دەگەن اتالى ءسوز بار. ءوز باسىم وسى دانالىققا باس يەمىن. باۋىرلارىما دا ۇدايى ايتىپ, جاقسى ءسوزدىڭ ءمانىن ۇعىنىپ, جەتە تۇسىنۋلەرىن تالاپ ەتەمىن. ونداعى ويىم – اتالارىمىزدان كەلە جاتقان جاقسى ادەت قازاق باۋىرلارمەن سىيلاسىپ, ىنتىماقتى ۇيىتا ءتۇسۋ. ودان ءبىز ۇتپاساق, ۇتىلمايمىز. ەڭ باستىسى – جاقسىلىققا جاقسىلىق جاساۋدى جالعاستىرا بەرەمىز.
قورىتا ايتقاندا, الماتى وبلىسىندا تۇراتىن 103 ەتنوس وكىلىنە وسى تاتۋلىعىمىزدان تانباي, ىنتىماقتىڭ ۇيىتقىسى بولا بىلسەك, كەيىنگى ۇرپاقتان تەك العىس قانا ەستىپ, شادىمان شاتتىققا بولەنىپ جۇرە بەرەرىمىز حاق. ويتكەنى, ءبىز قازاق حالقىمەن بىرگەمىز, تاعدىرىمىز قازاقستانمەن ورتاق.
ءسوز سوڭىندا ايتارىم, قادىرمەندى مۇسىلمان قاۋىم, سىزدەردى كارىس حالقىنىڭ اتىنان الداعى قۇربان ايت مەيرامىمەن قۇتتىقتايمىن!
ۆلاديمير لي,
الماتى وبلىستىق قازاقستان حالقى اسسامبلەياسى
توراعاسىنىڭ قوعامدىق نەگىزدەگى ورىنباسارى.
الماتى وبلىسى.
