100 • 21 قاراشا، 2019

«ەڭبەكشى قازاقتىڭ» 1000-شى سانى

41 رەتكورسەتىلدى

«ەڭبەكشىل قازاق» گازەتى 1925 جىلدىڭ 7 قاراشاسىنان باستاپ «ەڭبەكشى قازاق» دەگەن جاڭا اتپەن شىعا باستاعانى كوپشىلىككە ءمالىم. ارادا ءدال ەكى جىل وتكەندە، ياعني 1927 جىلى 7 قاراشا كۇنى گازەتتىڭ 1000-شى سانى (№ 272) جارىق كورىپتى.

مەرەكەلىك ءنومىردى شىعار­عاندار – مىرجاقىپ دۋلاتوۆ، بەيىمبەت مايلين، عابباس توع­جانوۆ قاتارلى الاش ارىس­تارى. باسىلىمنىڭ ماڭداي­شاسىندا «جەر ءجۇزىنىڭ ەڭبەك­شىلەرى بىرىگىڭدەر!» دەگەن زا­­ما­ناۋي ۇران تۇر. گازەت قۇ­­رىل­تايشىسى: «قازاقستان ولكە­لىك پارتيا كوميتەتى، ول­كە­لىك كەڭەس كوميتەتى مەن كاسىپشىلەر كەڭەسى، سىرداريا گۋبەرنيالىق اتقارۋ كوميتەتى مەن گۋبەرنيالىق پارتيا كو­ميتەتى» دەلىنىپتى. باسىلىم كۇن سايىن سەگىز بەتتەن شىعىپ تۇرىپتى. باعاسى – 5 تيىن.

مەرەكەلىك ساننىڭ ءبىرىن­شى بەتىنە ادەتتەگىدەي ولكە­لىك پارتيا كوميتەتىنىڭ قۇت­تىقتاۋ حاتى جاريالانىپتى. وندا: «بۇگىن «ەڭبەكشى قازاق» مىڭعا جەتتى. گازەتكە مىڭ سان، مىڭ جاس. گازەت تاپ جىرشىسى، قاي تاپتىڭ جوعىن جوقتاسا، سول تاپتىڭ ءسوزىن سويلەيدى، جىرىن جىرلايدى، قامىن جەيدى، جۇرتشىلىعىن باستايدى. «ەڭبەكشى قازاق» سونداي گازەت بولىپ قازاق جۇرت­شىلىعىن باستاپ وتىر. قازاق ەڭبەكشىلەرىنىڭ جوعىن جوقتاپ، تىلەگىن تىلەپ، ءسوزىن سويلەپ وتىر. قازاق ەڭبەكشىلەرىنە پارتيا جولىن، ۇكىمەت جولىن ۇعىندىرىپ، ءتۇسىندىرىپ وتىر. جاقسىنى ۇلگى، جاماندى جەكسۇرىن قىلىپ وتىر. «ەڭبەكشى قازاق» ارقىلى ءبىزدىڭ پارتيا، ۇكىمەت قازاق ەڭبەكشىلەرىمەن كۇندە سويلەسىپ، كۇندە ارالاسىپ وتىر. ارينە، بۇدان بىلاي دا «ەڭبەكشى قازاق» وسى جولىنان تايمايدى. جاڭا جۇرتشىلىق جاس جۇرتشىلىقتىڭ تىرەگى بولادى» دەلىنگەن ەكەن.

سونىمەن قاتار ءبىرىنشى بەتكە ««ەڭبەكشى قازاقتىڭ» باسقارماسىنا، جازۋشىلارىنا، جۇمىسكەرلەرىنە، اۋىل تىلشىلەرىنە» دەگەن رەسمي ماتىنمەن ۇكىمەتتىڭ دە قۇتتىقتاۋى بەرىلىپتى. وندا بى­لاي دەپ جازىلىپتى: «قا­زاقستان ۇكىمەتى «ەڭبەكشى قازاقتىڭ» مىڭ سانى شىققان كۇنى باسقارماعا، جازۋشىلارىنا، جۇمىسكەرلەرىنە، اۋىل تىلشىلەرىنە قۇتتى بولسىن ايتادى. جۇمىسكەر – قارا شارۋا ءباسپاسوزى – وكتابىر توڭكەرىسى ارقاسىندا جىلدان-جىلعا، حالىقتىڭ شارۋا، مادەنيەت جۇزىندەگى تىلەگى وسكەن سايىن، قازاقستاننىڭ ۇلت ءباسپاسوزى دە ءوسىپ كۇشەيىپ كەلەدى.

«ەڭبەكشى قازاق» قازاق­ستان جۇمىسكەر-ديقان ۇكى­مە­تىنىڭ تۇڭعىش ولكەلىك گا­زە­تى بولىپ 6 جىلدان بەرى قالىڭ قازاق ەڭبەكشىلەرىمەن تىلدەسىپ، مۇڭداسىپ كەلەدى. قازاق رەسپۋبليكاسىنىڭ قا­راڭعى تۇكپىرلەرىنە شەيىن تاراپ، مادەنيەت ساۋلەسىن شاشىپ، اۋىلدى كەڭەستەندىرۋ جولىنا قىزمەت قىلىپ، جاڭا تۇرمىس ورناتۋعا كۇشتى قۇرال بولىپ كەلەدى.

«ەڭبەكشى قازاق» مىڭ سانى شىعۋ قارساڭىندا قالىڭ بۇقارانىڭ گازەتى بولۋعا جارادى. قالىڭ بۇقارا كەزىندە بەدەلى كوتەرىلدى. اۋىل بەل­سەن­دىلەرىن وزىنە ءتىلشى قى­لىپ الىپ، اۋىل تۇرمىسىن ايناعا تۇسكەندەي انىق كورسەتتى.

قازاقستان ۇكىمەتى قىز­مەتتەرىڭ ءاردايىم جەمىس­تى، بەرەكەلى بولۋىنا تىلەكتەس».

حات سوڭىنا قازاقستان ورتالىق اتقارۋ كوميتەتى القاسىنىڭ ورىنباسارى بە­گىم­بەت ۇلى ىبىرايىم، كو­­ميس­سارلار كەڭەسىنىڭ اعاسى نۇر­ماق ۇلى نىعىمەت، قا­زاق­ستان ورتالىق اتقا­رۋ كو­ميتەتىنىڭ حاتشىسى ارال­باي­ ۇلى ايدار دەپ قول قويىپتى.

گازەت بەتىندەگى تاعى ءبىر جۇرەكجاردى لەبىز قازاق كسر ورتالىق اتقارۋ كوميتەتىنىڭ توراعاسى ەلتاي ەرنازاروۆتىڭ ۇكىم سيپاتتى تىلەگى:

  1. «ەڭبەكشى قازاق» بۇ­دان بىلاي دا قازاق ەڭبەك­شى­لەرىنىڭ جاڭا جۇرتشىلىعىن پارتيانىڭ تۋرا جولىمەن باس­تاسىن. جاڭا جۇرت­شى­لىققا كەدەرگى بولاتىن، كە­سىرى تيە­تىندەرمەن تىنباي ايان­باي كۇرەسسىن!
  2. قازاق اراسىندا ءالى ەسكى سالت كۇشتى. قازاق جۇرتشى­لىعى ەسكى سالتپەن كۇرەسىپ وتىر. بۇل جونىندە «ەڭبەكشى قازاق» جۇرتشىلىعى قور­عاۋ­شى بولسىن، باستاۋشى بولسىن!
  3. اۋىلدا ىستەلمەي جاتقان ىستەر كوپ، تولىپ جاتقان كەم­شى­لىكتەر بار. گازەت ەل ايناسى. «ەڭبەكشى قازاق» سول اۋىل­دىڭ جاقسى جاعىن دا، جامان جاعىن دا جازا ءبىلسىن. جۇرتشىلىق سىنىنا بەرسىن. «ەڭبەكشى قازاقتىڭ» مىڭ سانىنا مەنىڭ تىلەگىم وسى.

سول سياقتى ءبىرىنشى بەتتىڭ وڭ جاق بۇرىشىنا جاقان دەگەن اۆتوردىڭ «ەڭبەكشى قازاق» گازەتىنىڭ مەرەكەلىك سانىنا شاشۋىم دەگەن لەپپەن «1000 جۇلدىز» اتتى توعىز شۋماق ولەڭى جاريالانىپتى.

سوڭعى جاڭالىقتار

كۇلكى كەرۋەنى № 21

رۋحانيات • كەشە

شاعامان باتىر

تاريح • كەشە

361 ليفت اۋىستىرىلادى

ايماقتار • كەشە

«ءتسۋناميدى» سۇلاتىپ سالدى

كاسىپقوي بوكس • كەشە

استىڭ ءدامىن كەلتىرگەن

ايماقتار • كەشە

سايرايدى بۇلبۇل...

رۋحانيات • كەشە

باعا QR كودتار ارقىلى بەرىلەدى

ايماقتار • 08 جەلتوقسان، 2019

«جەلتوقسانشى» جەتكىنشەك ەسكە الىندى

رۋحانيات • 08 جەلتوقسان، 2019

ۇقساس جاڭالىقتار