100 • 21 قاراشا، 2019

7 وليمپياداعا، 5 الەم چەمپيوناتىنا، 5 ازيا ويىندارىنا كۋا بولدىم

144 رەتكورسەتىلدى

«ەگەمەندە» اتتاي 24 جىل تابان اۋدارماي ەڭبەك ەتىپپىن. شەراعاڭنان باستاپ، ساۋىتبەك ابدراحمانوۆقا دەيىن 7-8 گازەت باسشىسىمەن قويان-قولتىق جۇمىس ىستەدىم. ەل گازەتىندە وتكەن شيرەك عاسىر ۋاقىت مەنىڭ قاناتىمدى قاتايتىپ، تىنىسىمدى كەڭەيتىپ، قايراتكەرلىك بولمىسىمدى قالىپتاستىرىپ، ەلگە تانىتتى. ەڭبەگىم ەلەنىپ، وردەن-مەدالدارمەن ماراپاتتالدىم، 20 كىتابىم جارىق كوردى. وسى جىلدار ىشىندە قۋانىشتى دا قايعىلى دا ساتتەردى سان مارتە باستان وتكەردىك.

1990 جىلدىڭ 14 ماۋسىمىندا كەشكىلىك تەمىرجولشىلاردىڭ مادە­نيەت سارايىندا ەكولوگياعا ارنالعان ميتينگتىڭ باستالعانى سول ەدى، جەر-انا كۇڭىرەنىپ، تۋلاپ سالا بەردى. تا­ريحتا زايسان ءزىلزالاسى دەپ قارالى ارىپتەرمەن جازىلعان مىڭداعان ادام­داردىڭ جۇرەگىنە سىزات قالدىرعان تابيعات اپاتىنان ءبىرجان ەسىمدى ءسابي قايتىس بولىپ، ونداعان مىڭ ادام ءۇيسىز-كۇيسىز قالدى. سول كەزدە ەلىمىزدىڭ باس باسىلىمىندا ءتورت جىل بويى ءزىلزالا تاقىرىبى گازەت بەتتەرىنەن تۇسپەدى. قۇراستىرمالى اعاش ۇيلەر مەن كىرپىش ۇرلاعانداردى سىن تەزىنە الىپ، سان رەت سىن ماقالالار دا جازدىق. 1990 جىلدىڭ 12 قىركۇيەگىندە وسكەمەندەگى ءۇلبى مەتاللۋرگيا زاۋىتىندا بەريلي تسەحى جارىلىپ، اپاتتى جاعداي تۋدى. 1993 جىلدىڭ كۇزىندە بۇكىل ەلدى شۋلاتقان قاندى وقيعانىڭ كۋاسى بولدىق. ءتورت بىردەي ورىمدەي جاس جىگىتتى وسكەمەندەگى چەشەندەردىڭ ايۋاندىقپەن ولتىرگەنى مىڭداعان جانداردى اشىندىردى. سونداي سىن ساتتەردە دە گازەت بەتىندە ماقالالار جازىپ، حالىقتى سابىرعا شاقىردىق.

سپورت – ماڭگىلىك ءحوببيىم. مىنە، 50 جىلدان استى، سپورت تاقىرىبىنا قالام سىلتەپ كەلەمىن. 1998 جىلى پاريجدە وتكەن الەم كۋبوگى جارىسىنا سۇيىكتى (ول كەزدە باس رەداكتور ءۋاليحان قاليجان) گازەتىم ساپارعا جىبەردى. ال 2000 جىلى سيدنەيدە وتكەن جازعى وليمپيا ويىندارىنا گازەت ءتورت بىردەي ءتىلشىسىن (ەركىن قىدىر، عالىم سۇلەيمەن، رىسبەك سارسەنباي ۇلى جانە مەن) ايشىلىق الىستاعى التىنشى قۇرلىقتان رەپورتاجدار جازۋعا اتتاندىرىپ سالدى. بۇدان كەيىن افينا مەن تۋريندەگى وليمپيادا ويىندارى جانە كورەيا مەن جاپونيادا وتكەن فۋتبولدان الەم چەمپيوناتىنا قاتىسۋىم گازەتتىڭ بەدەلى بولسا كەرەك. ال بەيجىڭدەگى جاز­عى وليمپيا ويىندارىنان سۇيىكتى گازەتىمىزگە سپورت دەسە ىشكەن اسىن جەر­­گە قوياتىن تىلشىلەر كوسەمالى ءسات­تىباي، باقتيار تايجان ۇشەۋمىز جەدەل رەپورتاجدار جونەلتىپ تۇردىق. جالپى، «ەگەمەندە» ەڭبەك ەتكەن جىلدارى 7 وليمپيادا جانە 5  الەم چەمپيوناتى، 5 ازيا جانە ۋنيۆەرسيادا ويىندارىنا بارۋ ماڭدايىما جازىلىپتى.

ءسوز سوڭىندا ءجۇز جىلدىق مەرەيتويىن اتاپ وتكەلى وتىرعان گازەت باسشىلىعىن، تىلشىلەر كورپۋسىن، باسىلىمنىڭ تۇراقتى وقىرماندارىن مەرەيلى مەزەتپەن شىن جۇرەكتەن قۇتتىقتاعىم كەلەدى. «ەگەمەن» ءدايىم ەلدىڭ العىسىنا بولەنە بەرسىن!

 

وڭداسىن ەلۋباي،

گازەت ارداگەرى، «قۇرمەت» وردەنىنىڭ يەگەرى، قازاقستاننىڭ قۇرمەتتى سپورت قايراتكەرى

 

وسكەمەن

 

سوڭعى جاڭالىقتار

قوبىز بىزگە قاي داۋىردەن جەتكەن؟

رۋحانيات • بۇگىن، 11:09

الماتىدا كىتاپ كورمەسى اشىلدى

رۋحانيات • بۇگىن، 10:56

كۇلكى كەرۋەنى № 23

رۋحانيات • بۇگىن، 09:32

جاڭعىرعان جامبىل ءوڭىرى

ايماقتار • بۇگىن، 06:58

باعا QR كودتار ارقىلى بەرىلەدى

مەديتسينا • بۇگىن، 06:53

رۋحاني راۋىشتەگى تارتۋ

ايماقتار • بۇگىن، 06:52

تۇرار تاعدىرىنىڭ تاعىلىمى مول

رۋحانيات • بۇگىن، 06:32

ورىنبور جانە قازاق زيالىلارى

رۋحانيات • بۇگىن، 06:30

ەل ەرتەڭى – جالىندى جاستار

پرەزيدەنت • بۇگىن، 06:16

ۇقساس جاڭالىقتار