وبلىس ورتالىعىندا جانە كوكسۋ اۋدانىندا تۇرعىندارمەن كەزدەسىپ, الەۋمەتتىك نىسانداردى ارالاعان ۇكىمەت باسشىسىنىڭ ورىنباسارى بەردىبەك ساپارباەۆقا جۇرتشىلىق تاراپىنان تولعاقتى ماسەلەلەر ايتىلىپ, الاڭداتقان سۇراقتار قويىلدى. ماسەلەن, ءوڭىر تۇرعىندارىن اتاۋلى الەۋمەتتىك كومەكتى تاعايىنداۋدىڭ جاڭا جۇيەسى, مىندەتتى مەديتسينالىق ساقتاندىرۋ جارناسى, ءدارى-دارمەكپەن قامتىلۋى, قوعامدىق ءتارتىپ, ءبىلىم بەرۋ مەن دەنساۋلىق ساقتاۋ سالاسىنداعى جەتىستىكتەر مەن شەشىمىن تاباتىن ماسەلەلەر تولعاندىرادى ەكەن. ۆيتسە-پرەمەر ايتىلعان جايلارعا وراي تۇسىنىك بەرىپ, وسى ورايدا اتقارىلىپ جاتقان بىرقاتار شارانى اتاپ ءوتتى.
– مەملەكەت حالىق الدىنداعى مىندەتتەرىن تولىعىمەن ورىنداپ كەلەدى. جالاقى, جاردەماقى, شاكىرتاقى, زەينەتاقى ۋاقتىلى تولەنۋدە. حالىقتىڭ دامۋ كورسەتكىشى 4 پايىزعا ءوسىپ وتىر. جىلدان-جىلعا الەۋمەتتىك سالاعا بولىنەتىن قارجى كولەمى دە ارتۋدا. كوپ بالالى وتباسىنا قولداۋ كورسەتىپ, اتاۋلى الەۋمەتتىك كومەك بەرۋ ماقساتىندا 257 ملرد تەڭگە قارجى ءبولىندى. نەسيەلەردىڭ ايىپپۇلدارىن وتەۋ ءۇشىن دە 147 ملرد تەڭگە قاراستىرىلدى. زامان تالابىنا ساي مامان دايارلاۋ دا وزەكتى ماسەلە. بىزدە 132 جوعارى وقۋ ورنى بار. بۇل 18 ميلليون تۇرعىنى بار حالىق ءۇشىن وتە كوپ. سوندىقتان دا ساپاسىز ءبىلىم بەرەتىن بىرقاتار جوعارى وقۋ ورنىن جابۋ جايىن قاراستىرىپ جاتىرمىز. ال دەنساۋلىق ساقتاۋ سالاسىنا كەلەر بولساق, مەديتسينانى دامىتۋ بويىنشا مەملەكەتتىك باعدارلاما دايىندادىق. وسىعان وراي ءاربىر ەلدى مەكەندە مەديتسينالىق بولىمشە بولۋ كەرەك. بۇگىنگى تاڭدا 5000 دارىگەر جەتىسپەيدى. وسى سىندى ماسەلەلەردى تولىعىمەن شەشىپ, 5 جىلدا بارلىق ەلدى مەكەندى دارىگەرلەرمەن قامتاماسىز ەتپەكپىز. حالىقتىڭ ورتاشا ءومىر ءسۇرۋ ۇزاقتىعىن 2025 جىلعا دەيىن 75 جاسقا جەتكىزۋ دە نىسانالى ءىسىمىزدىڭ ءبىر پاراسى. سونداي-اق تۇرعىنداردى ساپالى, باعاسى تومەن ءدارى-دارمەكپەن قامتۋ دا وزەكتى ماسەلە. وسى ورايدا بارلىق دارىحاناداعى دارىلەردىڭ قۇنى بىردەي بولۋىن جانە باعانىڭ نەگىزسىز وسپەۋىن قامتاماسىز ەتپەكپىز. ءتارتىپ بۇزۋشىلىق, جاستاردىڭ ءوز وزىنە قول سالۋى سىندى ورەسكەل ىستەردىڭ ورىن الماۋى ءۇشىن ءار قالادا تالدىقورعانداعىداي سپورت كەشەندەرى بولۋى كەرەك. بۇل تۇرعىدا مەكتەپتىڭ سپورت زالدارىن دەمالىس كۇنى جالعا بەرۋگە مۇمكىندىك جاسالۋدا. ول ارقىلى مەكتەپ وزىنە قارجى تاپسا, كوپشىلىك سپورتپەن اينالىسىپ, دەنساۋلىعىن نىعايتۋعا مۇمكىندىك الادى. مۇنان بولەك, حالىقتى ەڭبەكپەن قامتاماسىز ەتۋدە جۇمىسپەن قامتۋ ورتالىقتارىنا جاڭاشا تالاپ قويىلۋدا. ەندىگى رەتتە ورتالىق ماماندارى بوس جۇمىس ورىندارىن كۇتىپ وتىرا بەرمەي, ءىرى كاسىپورىن, كاسىپ يەلەرىمەن تىعىز قارىم-قاتىناستا جۇمىس ىستەپ, بوس جۇمىس ورىندارىن انىقتايتىن بولادى, – دەدى جۇرشىلىقپەن كەزدەسۋ بارىسىندا بەردىبەك ساپارباەۆ.
ساپار اياسىندا ۇكىمەت باسشىسىنىڭ ورىنباسارى تالدىقورعان قالاسىندا تۇراتىن كوپ بالالى قالاباەۆتار وتباسىنا باس سۇعىپ, اۋلەتتىڭ جاعدايىمەن تانىستى. وڭىردەگى كوپ بالالى انالارعا جاسالىپ وتىرعان قامقورلىق جايىنا توقتالعان وبلىس اكىمى اماندىق باتالوۆ قوناقتاردى قالا ماڭىندا سالىنىپ, قولدانىسقا بەرىلىپ جاتقان كوتتەدج قالاشىعىن دا ارالاپ كورۋگە شاقىردى. قازىر مۇندا الەۋمەتتىك باعدارلاما بويىنشا جەڭىلدىككە يە بولعان 100 وتباسى قونىستانعان.
سونىمەن قاتار ۇكىمەت دەلەگاتسياسى تالدىقورعانداعى جاستار ورتالىعىندا, №27 جالپى ءبىلىم بەرەتىن مەكتەپتە, كوپسالالىق اۋرۋحانادا بەلسەندى جاستار مەن ءبىلىم بەرۋ, دەنساۋلىق ساقتاۋ سالاسى قىزمەتكەرلەرىمەن كەزدەستى. ال كوكسۋ اۋدانىنا جاساعان ساپارىندا اۋماقتاعى قانت ءوندىرىسىنىڭ دامۋىنا ۇلەس قوسىپ وتىرعان «كوكسۋ» قانت زاۋىتىنىڭ ءوندىرىسىن كورىپ, بالپىق بي كەنتى مەن مامبەت اۋىلىنىڭ تىنىس-تىرشىلىگىمەن تانىستى.
الماتى وبلىسى
