نۇر-سۇلتان قالاسىندا وسىمەن جەتىنشى رەت ۇيىمداستىرىلعان فورۋم الاڭىندا الەمنىڭ 25 ەلىنەن كەلگەن عارىش سالاسىنىڭ 650-دەن استام ساراپشىسى باس قوستى.
پرەمەر-مينيستر اسقار ءماميننىڭ قاتىسۋىمەن وتكەن فورۋمنىڭ پلەنارلىق بولىمىندە قازاقستاننىڭ عارىش جۇيەسىنىڭ جەتىستىكتەرى مەن پەرسپەكتيۆالارى اڭگىمە بولدى.
قازاقستاننىڭ عارىش سالاسىنداعى باستى جاڭالىقتاردىڭ ءبىرى رەتىندە عارىش اپپاراتتارىن قۇراستىرۋ-سىناۋ كەشەنى قۇرىلىسىنىڭ اياقتالعانى تۋرالى اكتىگە قول قويىلعانىن ايتۋعا بولادى. تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆتىڭ ايتۋىنشا, بۇل كەشەن وتاندىق عارىش سالاسىن ساپالى جاڭا دەڭگەيگە كوتەرمەك.
«بۇگىنگى كۇنى قازاقستاندا ەكى تەلەكوممۋنيكاتسيالىق سپۋتنيك جۇمىس ىستەيدى. ءبىز وسى سالاداعى مۇمكىندىكتەرىمىزدى ودان ءارى دامىتۋدى كوزدەۋدەمىز. كەشە عانا قۇراستىرۋ-سىناۋ كەشەنىنىڭ قۇرىلىسى اياقتالدى, ياعني 2020 جىلى ءبىز ءوز سپۋتنيگىمىزدىڭ جوباسىن جاساپ, وندىرۋگە كىرىسۋ ارقىلى جاڭا دەڭگەيگە كوتەرىلۋدى جوسپارلاپ وتىرمىز. بۇل قازاقستاننىڭ الەمدىك عارىش قاۋىمداستىعىنىڭ تولىققاندى مۇشەسى رەتىندەگى باستاماسى», - دەپ اتاپ ءوتتى مينيستر.
اسقار جۇماعاليەۆ فورۋمعا قاتىسىپ وتىرعان قازاقستاننىڭ ستراتەگيالىق سەرىكتەستەرىنە, اتاپ ايتقاندا, «روسكوسموس» مك, Airbus, ازيا-تىنىق مۇحيتى عارىش ىنتىماقتاستىعى ۇيىمى, OneWeb, Euroconsult باسشىلىعىنا العىسىن ءبىلدىرىپ, بىرلەسكەن جوبالاردى ودان ءارى جۇزەگە اسىرۋعا دايىن ەكەندىگىن جەتكىزدى.
بۇدان باسقا, اسقار جۇماعاليەۆ الەمدىك عارىش سالاسىنداعى ساراپشىلارمەن ەكىجاقتى كەزدەسۋلەر بارىسىندا ءتيىمدى «عارىشتىق» ىنتىماقتاستىق ماسەلەلەرىن تالقىلادى.
«قازاقستانداعى عارىش كۇندەرى: بايقوڭىر – الەمدىك عارىش ايلاعى» حالىقارالىق فورۋمى 12-13 قاراشا كۇندەرى نۇر-سۇلتان قالاسىندا وتۋدە. نەگىزگى تالقىلاۋلار «بايقوڭىر عارىش ايلاعىن دامىتۋ», «عارىشتان جدز جانە سپۋتنيكتىك ناۆيگاتسيا تەحنولوگيالارى», «سپۋتنيكتىك بايلانىستىڭ بولاشاعى» باعىتتارى بويىنشا وتۋدە. وسى ورايدا, فورۋمنىڭ دۇنيەجۇزىلىك عارىش قىزمەتىنىڭ جەتىستىكتەرىمەن ءبولىسىپ, وزىق تاجىريبەلەرمەن الماسۋدا جانە وتاندىق عارىش سالاسىن ناسيحاتتاۋدا بىرەگەي الاڭعا اينالعانىن ايتىپ وتكەن ءجون.
فورۋمعا مينيسترلىكتىڭ ستراتەگيالىق سەرىكتەستەرى - روسكوسموس, «Airbus Defence and Space» سونداي-اق, وتاندىق جانە شەتەلدىك ۇيىمدار قاتىسۋدا, ولاردىڭ ىشىندە: «م.ۆ. حرۋنيچەۆ اتىنداعى مەملەكەتتىك عارىشتىق عىلىمي-وندىرىستىك ورتالىعى», «م.ف. رەشەتنەۆ اتىنداعى اسج» اق, «ترانستەلەكوم» اق, One Web, SES, «Leica Geosystems, Satrec Initiative», «Eutelsat» ءباا عارىش اگەنتتىگى, ۋكراينانىڭ مەملەكەتتىك عارىش اگەنتتىگى, جاپوندىق اەروعارىشتىق زەرتتەۋلەر اگەنتتىگى, THALES ALENIA SPACE كومپانياسى جانە تاعى باسقالار بار.
