مەملەكەت باسشىسىنىڭ 2018 جىلعى 10 قاڭتارداعى تاپسىرمالارىن ورىنداۋ ماقساتىندا قر ەڭبەك جانە حالىقتى الەۋمەتتىك قورعاۋ مينيسترلىگى ازىرلەگەن ءبىرىنشى زاڭ جوباسى ەڭبەك ءوتىلى مەن الەۋمەتتىك تولەمدەر اراسىنداعى بايلانىستى نىعايتۋعا, سونىمەن قاتار 2020 جىلدان باستاپ ورتاشا الەۋمەتتىك تولەمدەردىڭ ءوسۋىن قامتاماسىز ەتۋگە باعىتتالعان.
قۇجاتتا ەڭبەك ەتۋ قابىلەتىنەن ايىرىلۋ, اسىراۋشىسىنان ايىرىلۋ جانە جۇمىسىنان ايىرىلۋ بويىنشا الەۋمەتتىك تولەمدەردى تاعايىنداۋ كەزىندە قولدانىلاتىن پارامەترلەر قايتا قارالدى. بۇل تولەمدى ورتاشا ەسەپپەن 30% - عا ارتتىرۋعا مۇمكىندىك بەرەدى.
زاڭنىڭ ەكىنشى جوباسى كوپبالالى وتباسىلارعا جاڭا مەملەكەتتىك جاردەماقى ەنگىزۋدى, اتاۋلى الەۋمەتتىك كومەك كورسەتۋ مەحانيزمدەرىن جەتىلدىرۋدى جانە تابىسى از وتباسىلاردان شىققان بالالارعا كەپىلدى الەۋمەتتىك پاكەت ەنگىزۋدى كوزدەيدى.
وسىلايشا, زاڭ جوباسىندا 2020 جىلعى 1 قاڭتاردان باستاپ كامەلەتكە تولماعان 4 جانە ودان دا كوپ بالالارى بار وتباسىلارعا نەمەسە 23 جاسقا دەيىنگى كۇندىزگى وقۋ نىسانىنداعى ستۋدەنتتەرگە مەملەكەتتىك جاردەماقى تولەۋ ۇسىنىلادى. بۇل جاردەماقى وتباسىنىڭ تابىسىنا قاراماستان سارالانعان مولشەردە تاعايىندالادى: 4 بالاعا – 42 496 تەڭگە; 5 بالاعا – 53 127 تەڭگە; 6 بالاعا – 63 757 تەڭگە; 7 بالاعا – 74 388 تەڭگە.
ااك كورسەتۋدىڭ جاڭا تاسىلدەرى مىنالاردى كوزدەيدى: اتاۋلى الەۋمەتتىك كومەكتى توقسان سايىن تاعايىنداۋ, ااك تاعايىنداۋ ءۇشىن قولدانىستاعى شەكتى ولشەم شارتتى ساقتاۋ – وتباسىنىڭ ءاربىر مۇشەسىنە جان باسىنا شاققانداعى ورتاشا تابىس ەڭ تومەن كۇنكورىس دەڭگەيىنەن 70% - دان كەم بولماۋى ءتيىس, وتباسىنىڭ بارلىق مۇشەلەرى ءۇشىن ااك مولشەرىن جان باسىنا شاققانداعى تابىس پەن كەدەيلىك شەگى اراسىنداعى ايىرما رەتىندە ايقىنداۋ, ەڭبەككە قابىلەتتى ازاماتتارعا قويىلاتىن تالاپتاردى كۇشەيتۋ, ولار جۇمىسقا ورنالاسۋدان باس تارتقان جاعدايدا ااك تولەمى بۇكىل وتباسىنا توقتاتىلادى, بۇل پروتسەسستە ۋچاسكەلىك كوميسسيالاردىڭ ءرولىن كۇشەيتە وتىرىپ, وتباسىنىڭ ماتەريالدىق جاعدايىنا تەكسەرۋ جۇرگىزۋ مەرزىمىن 3-تەن 7 كۇنگە دەيىن ۇلعايتۋ.
كەپىلدى الەۋمەتتىك پاكەتتى ۇسىنۋ شەڭبەرىندە 1 جاستان 6 جاسقا دەيىنگى تابىسى از وتباسىلارىنىڭ بالالارىن ازىق-ت ۇلىك جيىنتىعىمەن جانە گيگيەنالىق قۇرالدارمەن, 6 جاستان 18 جاسقا دەيىنگى بالالاردى مەكتەپتەردە ىستىق تاماقپەن, وقۋ قۇرالدارىمەن جانە مەكتەپ فورماسىمەن قامتاماسىز ەتۋ ۇسىنىلادى, سونداي-اق ولارعا مەكتەپكە دەيىنگى جول ءجۇرۋ شىعىندارى وتەلەدى. مەديتسينالىق, ونىڭ ىشىندە ستوماتولوگيالىق كومەك 18 جاسقا دەيىنگى بالالارعا تەگىن مەديتسينالىق كومەكتىڭ كەپىلدىك بەرىلگەن كولەمى جانە مىندەتتى الەۋمەتتىك مەديتسينالىق ساقتاندىرۋ شەڭبەرىندە كورسەتىلەتىن بولادى.
بۇدان باسقا, زاڭ جوباسىندا 2020 جىلعى 1 قاڭتاردان باستاپ ىسكە قوسىلاتىن الەۋمەتتىك قىزمەتتەر پورتالىندا تىركەلگەن ورتاشا باعالار شەگىندە تەحنيكالىق وڭالتۋ قۇرالدارىنىڭ قۇنىن وتەۋ تەتىگىن ەنگىزۋ كوزدەلگەن. بۇل رەتتە مۇگەدەكتىگى بار ادامدار نەعۇرلىم قىمبات تاۋارلار مەن قىزمەتتەردى تاڭداۋ كەزىندە ايىرماشىلىقتى دەربەس تولەۋ مۇمكىندىگىن الادى.
پورتال قۇرۋ توق جانە ارنايى الەۋمەتتىك قىزمەتتەردى ۇسىنۋعا ارنالعان بيزنەس-پروتسەستەردى تاعايىنداۋ ءۇشىن پرواكتيۆتى فورمات ارقىلى 8 ايدان 1-2 اپتاعا دەيىن قىسقارتۋعا مۇمكىندىك بەرەدى. سونداي-اق, پورتال قىزمەتتەر مەن وڭالتۋ قوندىرعىلارىنىڭ ولاردى الۋشىلاردىڭ جەكە قاجەتتىلىكتەرىنە سايكەس كەلمەۋ ماسەلەلەرىن شەشەدى, ويتكەنى مۇگەدەكتىگى بار ادامدار وزدەرىنە قاجەت تاۋار مەن قىزمەت ءتۇرىن ءوز بەتىنشە تاڭداي الادى.
ۇزدىكسىز جەتكىزىلىمدى قامتاماسىز ەتۋ ماقساتىندا 2020 جىلى مۇگەدەكتىگى بار ادامدارعا وڭالتۋ تاۋارلارى مەن قىزمەتتەرى بالاما نەگىزدە – پورتال ارقىلى جانە قولدانىستاعى مەملەكەتتىك ساتىپ الۋ راسىمدەرى جۇيەسى ارقىلى ۇسىنىلاتىن بولادى. پورتال ارقىلى پرواكتيۆتى فورماتقا تولىق كوشۋ 2021 جىلى كوزدەلگەن.
