قازاقستان دەلەگاتسياسىن سىرتقى ىستەر ءمينيسترىنىڭ ورىنباسارى رومان ۆاسيلەنكو, ال بەلگيا دەلەگاتسياسىن سىرتقى ىستەر مينيسترلىگى ەكىجاقتى ىنتىماقتاستىق ديرەكتسياسىنىڭ باس ديرەكتورى انيك ۆان كالستەر باسقاردى.
ديپلوماتتار ساياسي, ەكونوميكالىق, مادەني جانە گۋمانيتارلىق ىنتىماقتاستىقتىڭ كەڭاۋقىمدى ماسەلەلەرىن, سونداي-اق حالىقارالىق كۇن ءتارتىبىن جان-جاقتى تالقىلادى.
اتاپ ايتقاندا, قازىرگى زامانعى جاھاندىق سىن-تەگەۋرىندەردى ەڭسەرۋدىڭ جولدارىن تالقىلاي وتىرىپ, ر. ۆاسيلەنكو قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ جاھاندىق دەڭگەيدە, ەۋرازيا جانە حالىقارالىق ەكونوميكالىق ۇيىمدار دەڭگەيىندە ء«ۇش ديالوگتى» قۇرۋ باستاماسى تۋرالى ايتتى.
سونداي-اق قازاقستاندىق ديپلومات سۇحباتتاسۋشىنى ەلىمىزدە زاڭنىڭ ۇستەمدىگىن قامتاماسىز ەتۋگە باعىتتالعان ينستيتۋتسيونالدىق رەفورمالاردى جۇزەگە اسىرۋ بارىسى تۋرالى, مەملەكەت باسشىسىنىڭ «كونسترۋكتيۆتى قوعامدىق ديالوگ – قازاقستاننىڭ تۇراقتىلىعى مەن گۇلدەنۋىنىڭ نەگىزى» اتتى جولداۋىنىڭ نەگىزگى باسىمدىقتارى مەن باعىتتارى,«نۇرلى جول» باعدارلاماسىن جۇزەگە اسىرۋ, جۇرگىزىلىپ جاتقان الەۋمەتتىك-ەكونوميكالىق رەفورمالار جانە قازاقستاننىڭ سوت جۇيەسى مەن قۇقىق قورعاۋ ورگاندارىن رەفورمالاۋ تۋرالى حاباردار ەتتى.
ءوز كەزەگىندە, ا. ۆان كالستەر 2017 جىلى شىلدەدە نۇر-سۇلتانعا جاساعان سوڭعى ساپارىنان باستاپ قازاقستان-بەلگيا قاتىناستارىنىڭ بارلىق باعىتتارداعى دامۋىنىڭ وڭ ءۇردىسىن قاناعاتتانعاندىقپەن اتاپ ءوتتى. سونىڭ ىشىندە, 2018 جىلعى قازاندا قازاقستاننىڭ تۇڭعىش پرەزيدەنتى - ەلباسى ن. نازارباەۆتىڭ بەلگيالىقتاردىڭ كورولى فيليپپەن وتكەن كەزدەسۋى ەكىجاقتى ارىپتەستىككە جاڭا سەرپىن بەردى.
ەكونوميكالىق ديپلوماتيا شەڭبەرىندە تاراپتار ءوسىمنىڭ وڭ ديناميكاسىن راستادى جانە ەنەرگەتيكا, اۋىل شارۋاشىلىعى, مەديتسينالىق قالدىقتاردى وڭدەۋ جانە وزگە سالالارداعى تابىستى ءوزارا ارەكەتتەسۋدى اتاپ ءوتتى. قازاقستاندا «John Cockerill», «Carmeuse», «Orfit» سياقتى جانە باسقا بەلگيالىق كومپانيالارمەن بىرلەسكەن جوبالار ىسكە قوسىلدى. بەلگيا قازاقستان ەكونوميكاسىنداعى ەڭ ءىرى ينۆەستورلاردىڭ ءبىرى بولىپ تابىلادى – بەلگيا كومپانيالارى قازاقستانعا 7 ملرد. اقش دولل. استام تىكەلەي ينۆەستيتسيا سالدى. ا. ۆان كالستەر ۆاللونيانىڭ ەكسپورتقا جانە شەتەلدىك ينۆەستيتسيالارعا ىقپالداسۋ «AWEX» اگەنتتىگىنىڭ جانە فلاندريانىڭ ينۆەستيتسيالاردى تارتۋ جانە ەكسپورتقا ىقپالداسۋ «FIT» اگەنتتىگىنىڭ باسشىلىعىمەن بەلگيا كاسىپورىندارىنىڭ قازاقستانعا ەكى جىلدا ءبىر رەت ۇيىمداستىرىلاتىن ىسكەرلىك ميسسيانىڭ تيىمدىلىگىن ەرەكشە اتاپ ءوتتى. قازاقستانعا جاساعان ەكونوميكالىق ساپارلاردىڭ ءساتتى تاجىريبەسىن ەسكەرە وتىرىپ, بەلگيا تاراپى وسىنداي ميسسيالاردى جىل سايىن وتكىزۋ ماسەلەسىن قاراستىرۋدا.
قازاقستاننىڭ ينۆەستيتسيالىق احۋالىن تالقىلاي وتىرىپ, ر. ۆاسيلەنكو پرەمەر-ءمينيستردىڭ توراعالىعىمەن وتەتىن ۇيلەستىرۋ كەڭەسى, شەتەلدىك ينۆەستيتسيالاردى تارتۋ مەن قولداۋدىڭ ءۇش دەڭگەيلى جۇيەسى, «KazakhInvest» قىزمەتى تۋرالى ايتتى. قازاقستان دەلەگاتسياسى «استانا» حالىقارالىق قارجى ورتالىعىنىڭ نەگىزىندە ىسكەرلىك بايلانىستاردى دامىتۋ پەرسپەكتيۆالارىنا ەرەكشە نازار اۋداردى.
سونىمەن قاتار, ۇستانىمداردى ۇيلەستىرۋ جانە قازىرگى زاماننىڭ وزەكتى ماسەلەلەرىن شەشۋ ءۇشىن حالىقارالىق جانە ايماقتىق ۇيىمدار شەڭبەرىندەگى ءوزارا ءىس-ارەكەتتىڭ ماسەلەلەرى قاراستىرىلدى. ا.ۆان كالستەر قازاقستاننىڭ بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەسى رەتىندەگى ماڭىزدى ءرولىن, قازاقستاننىڭ حالىقارالىق قاۋىپسىزدىككە قوسقان ۇلەسىن اتاپ ءوتتى. 2019 جىلدىڭ 1 قاڭتارىندا بەلگيا بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى ميسسياسىنا كىرىستى جانە 2020 جىلعى اقپاندا كەڭەستىڭ توراعالىعىنا دايىندالۋدا.
ەۋروپالىق وداقپەن ىنتىماقتاستىق اياسىندا تاراپتار كەڭەيتىلگەن سەرىكتەستىك پەن ىنتىماقتاستىق تۋرالى كەلىسىمنىڭ كۇشىنە ەنۋىنىڭ جانە 2019 جىلدىڭ ماۋسىم ايىندا قابىلدانعان ەۋروپالىق وداقتىڭ ورتالىق ازيا بويىنشا جاڭا ستراتەگياسىن ىس جۇزىندە ىسكە اسىرۋدىڭ ماڭىزدىلىعىن اتاپ وتتى.
كەزدەسۋ بارىسىندا اۋعانستاندى قالپىنا كەلتىرۋگە جاردەمدەسۋ سالاسىنداعى ىنتىماقتاستىق تۋرالى جان-جاقتى پىكىر الماسۋ بولدى. بەلگيا تاراپى قازاقستاننىڭ اۋعانستانعا گۋمانيتارلىق, تەحنيكالىق جانە ءبىلىم بەرۋ كومەگىن كورسەتۋ ارقىلى جاساعان كۇش-جىگەرىن جانە ۇلەسىن جوعارى باعالادى. ر. ۆاسيلەنكو ءوز ارىپتەستەرىن قازاقستاننىڭ اۋعانستانداعى بەيبىتشىلىك پەن قاۋىپسىزدىكتى قالپىنا كەلتىرۋ جونىندەگى باستامالارى تۋرالى, سونداي-اق اۋعان قىزدارىنا قازاقستان مەن وزبەكستاندا ءبىلىم بەرۋ باعدارلاماسىنىڭ ىسكە قوسىلۋى تۋرالى حابارلادى. اتالعان باعدارلامانىڭ يناۋگۋراتسيا ءراسىمى وسى كۇنى بريۋسسەلدە ءوتتى.
حالىقارالىق قاۋىپسىزدىك ماسەلەلەرى بويىنشا ىنتىماقتاستىق تاقىرىبى بەلگيا تاراپىن ەرەكشە قىزىقتىردى. قازاقستاندىق ديپلومات قازاقستان ازاماتتارىن سيريا مەن يراكتىڭ جاۋىنگەرلىك ىس-قيمىلدار ايماقتارىنان قايتارۋ بويىنشا «جۋسان» وپەراتسياسى تۋرالى جان-جاقتى ايتىپ بەردى. تاراپتار قازاقستان مەن بەلگيانىڭ تيىستى قىزمەتتەرى اراسىندا تاجىريبە الماسۋعا نيەت بىلدىردى.
كەزدەسۋ قورىتىندىلارى بويىنشا تاراپتار قازاقستان-بەلگيا قاتىناستارىن بارلىق سالادا ودان ءارى ساپالى دامىتۋ جانە كەڭەيتۋ ءۇشىن بىرلەسكەن كۇش-جىگەرلەردى جۇمساۋعا دايىن ەكەنىن راستادى.
