قوعام • 08 قاراشا، 2019

ىنتىماقتاستىقتىڭ جاڭا قۇرىلىمى

28 رەتكورسەتىلدى

پرەزيدەنت جانىنداعى ورتالىق كوممۋنيكاتسيا قىزمەتىندە «استانا كلۋبىنىڭ» كەلەسى اپتاعا جوسپارلانعان وتىرىسىنا ارنالعان ءباسپاسوز ءماسليحاتى ءوتتى. حالىقارالىق قاتىناستار سالاسىنداعى الەمدىك دەڭگەيدەگى ساياساتكەرلەر، ساراپشىلار مەن ديپلوماتتاردىڭ باسىن قوساتىن اتالعان حالىقارالىق پىكىرتالاس وسىمەن بەسىنشى مارتە وتكىزىلمەك. 

بريفينگكە تۇڭعىش پرەزيدەنت – ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ (اەسي) ديرەكتورى ەرجان سالتىباەۆ، قازاقستان رەسپۋبليكاسى تۇڭعىش پرەزيدەنتى قورىنىڭ حالىقارالىق باعدارلامالار ورتالىعىنىڭ جەتەكشىسى قايرات ابۋسەيىتوۆ، سونداي-اق اەسي ساراپشىسى ەرلان ماديەۆ قاتىستى.

بريفينگتە الداعى شارانىڭ باعدار­لاماسى تانىستىرىلىپ، تالقىلاناتىن تاقىرىپتار تۋرالى ءسوز ەتىلدى. بيىلعى وتىرىستىڭ باستى تاقىرىبى – «ۇلكەن ەۋرازيا: جاھاندىق ىنتىماقتاستىقتىڭ جاڭا قۇرىلىمى جولىندا».

حالىقارالىق دەڭگەيدەگى شاراعا الەمنىڭ 30 ەلىنەن ساراپشىلار قاتىسادى. ولار الەمدىك ءتارتىپتىڭ قازىرگى كەلبەتىن ءسوز ەتىپ، دۇنيەجۇزىلىك ەكونوميكانىڭ احۋالى مەن كۇن ساناپ قارقىن العان تەحنولوگيالىق جارىس ماسەلەلەرىن نازارعا الادى. مەملەكەتتەر جانە ۇكىمەتتەردىڭ بۇرىنعى باسشىلارى، مينيسترلەر، حالىقارالىق ۇيىمداردىڭ باس حاتشىلارى، نوبەل سىيلىعىنىڭ لاۋرەاتتارى مەن گەوساياسات تاقىرىبىنداعى بەدەلدى ماماندار يادرولىق قارۋسىزدانۋ ماسەلەسى مەن ەۋرازيا ەلدەرى ءۇشىن سەرىكتەستىكتىڭ جاڭا فورماتىن قۇرۋ بولاشاعىن دا تالقىلايتىن بولادى. 

جيىندا الەمدىك ەكونوميكا جانە ساياسات ينستيتۋتىنىڭ ديرەكتورى ە.سالتىباەۆ: «ەۋرازيادا گەوساياسي قاراما-قايشىلىقتىڭ كۇشەيۋى بايقالعاندىقتان، ىنتىماقتاستىق پەن كەلىسىمدى رەتتەيتىن جاڭا يدەيالارعا سۇرانىس تۋىندايدى. وسى رەتتە «استانا كلۋبى» ۇلكەن ەۋرازياداعى قاۋىپسىزدىك پەن ىنتىماقتاستىق ماسەلەلەرىن شەشۋدەگى قازاقستاندىق كوزقاراستى العا تارتۋدا ماڭىزدى ءرول اتقارادى. «اس­تانا كلۋبى» اياسىندا وتكىزىلەتىن نە­گىزگى شارالاردىڭ ءبىرى – «ۇلكەن ەۋ­را­زيانى قۇرۋ: سەرىكتەستىكتىڭ جاڭا ۇلگىسى» پلەنارلىق وتىرىسىنا ەلباسى ن.ءا.نازارباەۆ قاتىسادى. اقش-تىڭ ۇلتتىق مۇددەلەر ورتالىعىنىڭ  پرە­زي­دەنتى، «The National Interest» جۋرنا­لىنىڭ باسپاگەرى دميتري سايمس اتال­عان جيىننىڭ مودەراتورى بولادى دەپ كۇتىلۋدە»، دەدى.

بريفينگتە بەيبىتشىلىك سالاسىنداعى نوبەل سىيلىعىنىڭ لاۋرەاتى (2005 ج.)، ماگاتە-ءنىڭ باس ديرەكتورى مۇحاممەد ءال-بارادەي، Goldman Sachs International توراعاسى، ەۋروپالىق كوميسسيا توراعاسى (2004-2014 ج.ج.) جوزە مانۋەل بارروزۋ جانە JP Morgan Chase International باسقارما توراعاسى، حالىقارالىق وتىزدىق توبىنىڭ توراعاسى (G30) دجەيكوب فرەنكەل، سلوۆەنيانىڭ بۇرىنعى پرەزيدەنتى دانيلو تيۋرك، اۋعانستاننىڭ بۇرىنعى پرەزيدەنتى حاميد كارزاي «استانا كلۋبى» وتىرىسىنا كەلەتىنى ءمالىم بولدى. 

 

سوڭعى جاڭالىقتار

ۇقساس جاڭالىقتار