وكىنىشكە قاراي قازىرگى كەزدە جەمقورلىققا جول بەرسە دە, قىزمەت بابىن تەرىس پايدالانسا دا جايلى ورىنتاقتا وتىرا بەرەتىن باسشىلار بار. بۇلاي دەيتىنىمىز, جامبىل وبلىسىندا كەزىندە ءتۇرلى زاڭبۇزۋشىلىققا جول بەرگەن كەيبىر ازاماتتاردىڭ باسشىلىق لاۋازىمعا قايتا تاعايىندالىپ, جۇمىسىن ءارى قاراي جالعاستىرا بەرۋى دەر ەدىك. مۇنداي جاعداي جامبىل ءوڭىرىنىڭ بىرقاتار اۋدانىندا دا كەزدەسەدى.
تاياۋدا قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى جوعارىدا كورسەتىلگەن زاڭنامالاردىڭ ساقتالۋىنا مونيتورينگ جۇرگىزگەن. مونيتورينگ جۇمىسىنا 2000-نان اسا ادام قامتىلىپ, ناتيجەسىندە تاراز قالاسى, بايزاق, جامبىل, تالاس, سارىسۋ جانە قورداي اۋداندارىنىڭ كەيبىر ازاماتتىق مەكەمەلەرىنىڭ باسشىلىق قىزمەتتەرىندە سىبايلاس جەمقورلىق بويىنشا قىلمىس جاساعان 11 تۇلعانىڭ قىزمەت اتقارىپ وتىرعاندىعى انىقتالعان. ونىڭ ىشىندە مەكتەپ ديرەكتورلارى, جۇمىسپەن قامتۋ ورتالىعى, مادەنيەت ءۇيى جانە باسقا دا مەملەكەتتىك ۇيىمداردىڭ بىلدەي باسشىلارى بار ەكەن. سوندا بۇل باسشىلاردى قىزمەتكە تاعايىنداعان جاۋاپتى تۇلعالاردىڭ نە سەبەپتى مۇنداي كەلەڭسىزدىككە جول بەرگەنىن ءتۇسىنۋ قيىن.
ماسەلەن, 2018 جىلعى 3 قاڭتاردا سىبايلاستىق جاساعان تۇلعا قورداي اۋدانىنىڭ حالىقتى جۇمىسپەن قامتۋ ورتالىعى ديرەكتورىنىڭ ورىنباسارى لاۋازىمىنا تاعايىندالىپتى. الايدا, اتالعان ازامات 2014 جىلى سوتتىڭ ۇكىمىمەن «پارا الۋ» بابى بويىنشا كىنالى دەپ تانىلعان ەكەن. سول سياقتى 2012 جىلى سىبايلاس جەمقورلىق جاساعان تۇلعا 2018 جىلى جامبىل اۋدانى «تازا مەكەن» مەملەكەتتىك كاسىپورنى ديرەكتورىنىڭ ورىنباسارى بولىپ تاعايىندالعان. ال 2012 جىلى «اۋداندىق مادەنيەت ءۇيى» كوممۋنالدىق مەملەكەتتىك قازىنالىق كاسىپورنى ديرەكتورىنىڭ ورىنباسارى لاۋازىمىنا سىبايلاس جەمقورلىق جاساعان تۇلعا تاعايىندالعان.
بىراق ول 2009 جىلى «قىزمەت وكىلەتتىگىن تەرىس پايدالانۋ» جانە «قىزمەتتىك جالعاندىق جاساۋ» باپتارى بويىنشا كىنالى دەپ تانىلعان بولىپ شىقتى. «ناقتى مىسالدار نەگىزىندە مەملەكەتتىك ورگاندار مەن مەكەمە باسشىلارى ءتيىستى شەكتەۋلەرگە قاراماستان, ونىڭ نورمالارىن ورەسكەل بۇزىپ كەلگەندىگىن كورۋىمىزگە بولادى. دەپارتامەنتتىڭ مونيتورينگى بارىسىندا انىقتالعان فاكتىلەر بويىنشا ءمان-جايلاردى زەردەلەپ, ءتيىستى شارالار قابىلداۋ جونىندە مەملەكەتتىك ورگاندارعا ۇسىنىستار جولدانعان بولاتىن. دەپارتامەنت بۇل باعىتتاعى باقىلاۋدى كۇشەيتەدى», دەيدى سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنت ديرەكتورى راۆيل تولەباەۆ.
بۇل مىسالداردىڭ ءبارى دە سىبايلاستىقپەن كۇرەستە سىلبىرلىقتىڭ بار ەكەنىن كورسەتەدى. الايدا قوعامداعى ءاربىر ازامات ءۇشىن جەمقورلىق ىندەت, ال ونى جويۋ مىندەت بولعانى دۇرىس-اق. ايتپەسە سىبايلاس جەمقورلىقتىڭ مەملەكەتتىڭ دامۋىنا كەدەرگى كەلتىرىپ, جولىنا كەسە كولدەنەڭ تۇراتىنى دا راس.
جامبىل وبلىسى
