وتكەن عاسىر تاريحىنان سىر شەرتەتىن كورمەدە ىسمەر شەبەرلەر مەن ونەرلى ۇستالاردىڭ قولىنان شىققان قۇرساۋلى كەسە, شىنى اياققاپ, كۇمىستەن سوعىلعان زەرگەرلىك بۇيىمدارعا, ايبالتا, شوقپار سياقتى قارۋ-جاراقتارعا, ءۇش ىشەكتى دومبىرا, اساتاياق, داۋىلپاز سياقتى قازاق ەلىنىڭ مۋزىكالىق مۇراسىن الەمگە تانىتقان اسپاپتارعا, سۇيەكپەن اشەكەيلەنگەن ساندىق, كىرشومبال, تۇمارشا, بويتۇمار, توعىزقۇمالاق جانە تاعى باسقا تۇرمىستىق زاتتارعا ورىن بەرىلگەن.
ۇلى اقىن اباي قۇنانباي ۇلىنىڭ 1885 جىلى ن.ي.دولگوپولوۆ ارقىلى تاريحي-ولكەتانۋ مۋزەيىنە وتكىزگەن تاريحي جادىگەرلەرى, ابايدىڭ ءىنىسى ءارى شاكىرتى شاكارىم قۇدايبەردى ۇلىنىڭ ۇلگىسىندەگى كيمەشەك جانە ويۋ-ورنەك, ودان بولەك ابايدىڭ اينالاسىنا قاتىستى جانە ەتنوگرافيالىق ماڭىزعا يە جادىگەرلەر جيناقتالعان تۇردە العاش رەت كوپشىلىك نازارىنا ۇسىنىلىپ وتىر.
اتالعان كورمەنىڭ اشىلۋىنا قاتىسقان قالامىزداعى زيالى قاۋىم وكىلدەرى مەن مادەنيەت جانە ونەر وشاقتارىنىڭ قىزمەتكەرلەرى, ستۋدەنتتەر مەن وقۋشىلار, ادەبيەت پەن ونەرگە قىزىعۋشىلىق تانىتقان جاسوسپىرىمدەر قالالىق مادەنيەت سارايىنىڭ ءانشىسى ب.سلامقۇلوۆتىڭ ورىنداۋىنداعى ابايدىڭ «كوزىمنىڭ قاراسى» ءانىن تىڭداپ, شەجىرەشى اقساقالداردىڭ رۋحاني-تانىمدىق اڭگىمەسىنە قۇلاق ءتۇردى.
قۋات قيىقباي,
ابايدىڭ «جيدەباي-ءبورىلى» قورىق-مۋزەيىنىڭ اعا عىلىمي قىزمەتكەرى
