بيىل قىسقى كەزەڭدە حالىقارالىق جانە رەسپۋبليكالىق جولداردىڭ 24,9 مىڭ شاقىرىمى كۇتىپ ۇستالادى دەپ جوسپارلانۋدا. جولداردىڭ 21,1 مىڭ شاقىرىمى «قازاقاۆتودور» كومپانياسىنىڭ بالانسىندا. ال 3,4 مىڭ شاقىرىم جول وسى نىسانداردا قايتا جاڭارتۋ جۇمىستارىن جۇرگىزىپ جاتقان مەردىگەرلىك ۇيىمداردىڭ كۇتىمىنە الىناتىن بولادى.سونىمەن قاتار جولداردىڭ 422 شاقىرىمى كۇردەلى جوندەۋ جۇمىستارى ءجۇرىپ جاتقان اۋىسپالى نىساندارعا جاتادى.
قىسقى كەزەڭگە دايىندىق جۇمىستارى بيىلعى مامىردا باستالعان بولاتىن. شىلدە جانە تامىز ايلارىنىڭ ارالىعىندا جول شارۋاشىلىعى نىساندارىنىڭ قىسقى كەزەڭدەگى جۇمىسقا ازىرلىگى تەكسەرىلدى.
بۇگىنگى تاڭدا وندىرىستىك بازالاردى, قازاندىقتاردى, جىلىنۋ پۋنكتتەرى مەن قويمالاردى جوندەۋ جۇمىستارى اياقتالۋعا جاقىن. مۇنىمەن قوسا, تەحنيكانى قىسقى كەزەڭگە دايىنداۋ جۇمىستارى جالعاسىپ جاتىر. قىسقى كەزەڭدە جۇمىس ىستەيتىن تەحنيكانىڭ جالپى سانى 1085 بولسا, ولاردىڭ 123-ءى بىرلىگى جوندەلۋدە. تەحنيكا دايىندىعى 91%-دان اسادى.
جولداردى قىسقى كەزەڭگە دايىنداۋ شارالارىنىڭ ماڭىزدى بولىگى كوكتايعاق سياقتى قۇبىلىستارعا جەدەل دەن قويۋعا قاجەتتى ماتەريالداردى دايىنداۋعا بايلانىستى بولادى. تايعاققا قارسى ماتەريالدار دوڭدەرى, بۇرىلىستارى جانە ەڭىستەرى بار اسا قاۋىپتى جولدارعا شىعارىلادى. كاسىپورىننىڭ كۇشىمەن ەڭىستەر مەن رەزەرۆتەردى اعاشتار مەن بۇتالاردان, جول جيەكتەرىن شوپتەن تازارتۋ جۇمىستارى جۇرگىزىلدى. جولشىلار ۋاقىتشا «تايعاق جول», «جىلدامدىقتى شەكتەۋ» سياقتى بەلگىلەردى, سونداي-اق قاردان قورعاۋ قالقاندارىن دايىندادى. وڭىرلەردىڭ كليماتتىق جاعدايلارىنا سايكەس سۋ وتكىزگىش قۇبىرلاردىڭ تەسىكتەرىن جابۋ جۇمىستارى جۇرگىزىلىپ جاتىر.
