ادەتتە, بۇل ماسەلەلەردى شەشۋ قارجىلاندىرۋ كولەمىنە تىكەلەي بايلانىستى. قازىرگى ۋاقىتتا ايماقتارداعى ءبىلىم بەرۋ ۇيىمدارىن باسقارۋ جۇيەسى ءتيىمدى ەمەس, اۋداندىق دەڭگەيدە بيۋدجەتتىك اكىمشىلەندىرۋ بارلىق تۋىنداعان ماسەلەلەردى تەز ءارى تولىق شەشۋگە مۇمكىندىك بەرمەيدى. بۇل مەكتەپتەردى جوندەۋ, جىلۋمەن قامتاماسىز ەتۋ, ينتەرنەت جانە باسقا دا ماسەلەلەرگە قاتىستى. سوندىقتان پرەزيدەنت ءبىلىم بەرۋدى ءار دەڭگەيىندە قارجىلاندىرۋدى قاراستىرۋ مىندەتىن قويدى.
اۋىلدىق جەرلەردەگى ءبىلىم بەرۋ ءىسى – ەلدەگى ساپالى ادام كاپيتالىن قالىپتاستىرۋ ءۇشىن ەڭ ماڭىزدى ساتتەردىڭ ءبىرى ەكەنىن اتاپ وتكەن ءجون. كۇردەلى ماسەلەلەر تىزىمىندە اۋىلداردا مۇعالىمدەردىڭ جەتىسپەۋشىلىگىنەن ءجيى تۋىندايتىن قيىندىقتار بار. جولداۋ اياسىندا اۋىلداعى بىلىكتى پەداگوگتاردىڭ تاپشىلىعى ماسەلەسىن شەشۋ ءۇشىن «ديپلوممەن – اۋىلعا!» باعدارلاماسىنىڭ جۇمىس اياسىن كەڭەيتۋ جانە وسى باعدارلامانى قارجىلاندىرۋدى 20 ملرد تەڭگەگە دەيىن جەتكىزۋ ۇسىنىلدى.
حالىقتىڭ الەۋمەتتىك وسال توپتارىن قولداۋدىڭ وتە ءساتتى مىسالى – از قامتىلعان جانە كوپ بالالى وتباسىلاردان شىققان دارىندى بالالاردى قولداۋ جونىندەگى جول كارتاسىن جاساۋ. وسىنداي بالالارعا ۇيىرمەلەرگە, ءبىلىم بەرۋ ورتالىقتارىنا, جازعى لاگەرلەرگە بارۋعا مۇمكىندىك بەرىلەدى. سونىمەن قاتار پرەزيدەنت از قامتىلعان بالالار قاتارىنا كىرەتىن بارلىق وقۋشىلار ءۇشىن تۇراقتى نەگىزدە كەپىلدەندىرىلگەن الەۋمەتتىك كومەكتى ەنگىزۋ قاجەت ەكەنىن اتاپ ءوتتى. بۇل الەۋمەتتىك كومەككە تەگىن ىستىق تاماق, وقۋ قۇرالدارىمەن جانە مەكتەپ فورماسىمەن قامتاماسىز ەتۋ كىرەدى.
سونداي-اق ساپالى ءبىلىم بەرۋ جۇيەسى عىلىمنىڭ دامۋىنسىز مۇمكىن ەمەس. قازاقستاندىق عىلىمنىڭ وزىق دامۋىنا نازار تۇراقتى جانە كەشەندى بولۋى ءتيىس. پرەزيدەنت ق.توقاەۆ جولداۋدا اتاپ وتكەندەي, ء«بىزدىڭ عىلىم قانشالىقتى ساپالى جانە ءتيىمدى؟ ۇكىمەت بۇل ماسەلەنى عىلىمي زەرتتەۋلەردىڭ دەڭگەيىن ارتتىرۋ جانە ولاردى ءىس جۇزىندە قولدانۋ تۇرعىسىنان قاراستىرعانى ءجون». وسىعان بايلانىستى وتاندىق عىلىمدى قولداۋدىڭ ناقتى تەتىكتەرىن ازىرلەۋ كونتەكسىندە مەملەكەت باسشىسىنىڭ مەسسەدجىن كەڭەيتۋ جانە جالعاستىرۋ ماڭىزدى.
ءمادينا نۇرعاليەۆا,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ كەڭەسشىسى
