سونىڭ سالدارىنان بۇل كەزدە اۋا رايىنىڭ كۇرت وزگەرۋى جول ۇستىندەگى 200 ءاۆتوموبيلدىڭ قوزعالىسىن تەجەدى. قار تۇتقىنىنا 125 جۇك ماشيناسى مەن 70 جەڭىل كولىك جانە سالونىندا 15 جولاۋشىسى بار «تاشكەنت – تۇمەن» رەيستىك اۆتوبۋسى تاپ بولدى.
ادامداردى قۇتقارۋعا 15 اۆتوپاترۋل قۇرامى جۇمىلدىرىلدى. سونىڭ ىشىندە ىرعىز بەن ايتەكە بي اۋداندارىنىڭ پوليتسەيلەرى مەن تجد قىزمەتكەرلەرى جانە «قازاۆتوجول» جشس وكىلدەرى دەر ۋاقىتىندا قيمىلداي ءبىلدى. قوسىمشا كومەككە مۇقتاج بولعان 30 ادامعا شۇعىل كومەك بەرىلدى. وزگە جولاۋشىلار جول بويىنداعى سەرۆيستىك ورىندار مەن تاماقتاندىرۋ قوسىندارىنا ورنالاستىرىلدى. مۇنداي كۇردەلى جاعدايدىڭ قالىپتاسۋى كوپتەگەن كولىك يەلەرىنىڭ قىسقى كەزەڭگە ازىرلەنبەۋى, سوعان سايكەس اۆتوموبيلدەرىنىڭ دوڭگەلەكتەرىن اۋىستىرماعانى سەبەپ بولىپتى.
ءسويتىپ قۇتقارۋشىلار قار كەپتەلىسىنەن 190 ءاۆتوموبيلدى سۇيرەپ الىپ شىقتى. كەمپينگتەردە بارلىق جولاۋشىلار مەن جۇرگىزۋشىلەرگە تەگىن تاماق ۇيىمداستىرىلدى. سونىمەن بىرگە وقيعا ورنىندا قالعان كەيبىر ادامدارعا تاماق تاسىلىپ بەرىلدى. وكىنىشكە قاراي, رەيستىك اۆتوبۋستاعى جولاۋشىلاردىڭ ءبىرى, تاجىكستان ازاماتى تۇمەندە اتقارىپ جۇرگەن جۇمىسىنان ەلىنە قايتىپ كەلە جاتقان ساپارىندا قايتىس بولدى. مارقۇمنىڭ ءولىمى جول ۇستىندەگى وقيعادان ەمەس, اعزاسىندا بۇرىننان بار دەرتتەن, ياعني جۇرەك يشەمياسى تالماسىنان بولعان ەكەن. دارىگەرلىك ساراپتاما قورىتىندىسى وسىنداي. ونىڭ ءمايىتىن پاترۋلدىك قىزمەتكەرلەر «قارابۇتاق تراسسالىق مەديتسينالىق قۇتقارۋ بەكەتىنە» جەتكىزدى. ءارى قاراي ونىڭ دەنەسىن تاجىكستانعا جەتكىزۋ جولدارى ۇيىمداستىرىلادى.
دۇيسەنبى كۇنى قالىباي اۋىلى ماڭايىندا قار تۇتقىنىندا قالعان اۆتوموبيلدەر تولىق شىعارىلدى. مۇنداي جاعداي شالقار مەن ىرعىزدىڭ ورتاسىندا دا ورىن العان. مۇندا بەس اۆتوكولىك تابيعاتتىڭ كۇرت قۇبىلىسىنان كوزدەگەن جەرىنە جەتە الماي بوگەلگەن. قۇتقارۋشىلاردىڭ كومەگىمەن اتالعان كولىكتەر ىرعىزعا جەتكىزىلدى. سونداي-اق شالقار مەن تالدىقۇم اراسىندا جەتى جولاۋشىسى بار «ۋاز» اۆتوكولىگى دە تۇرىپ قالعان. بۇل جونىندەگى حابار قۇتقارۋشىلارعا كەشىرەك تيسە دە وقيعانىڭ سوڭى ناتيجەلى اياقتالدى. وقىس وقيعادان ەشكىم زارداپ شەكپەگەن.
اقتوبە وبلىسى
