ول ءوز سوزىندە پاراساتتىلىق قاعيدالارىن ناسيحاتتاۋ جانە الدىن الۋ شارالارى تاقىرىبىنا جان-جاقتى توقتالىپ, سىبايلاس جەمقورلىققا قارسى ساياساتتىڭ باسىم باعىتتارىن اشىپ كورسەتتى.
اگەنتتىك قىزمەتىنىڭ ناتيجەلەرى, جاڭا باستامالار مەن كەلەشەككە جوسپارلار ايتىلدى. سىبايلاس جەمقورلىققا قارسى قىزمەتتى مىسالعا الا وتىرىپ اشىق, كاسىبي جانە ءتيىمدى قۇقىق قورعاۋ ورگانىن قۇرۋدىڭ ناقتى قادامدارى ۇسىنىلدى.
وسى ورايدا اليك شپەكباەۆ كادر ساياساتىنىڭ ماڭىزىنا ايرىقشا توقتالدى. دۇرىس جاساقتالعان جۇيەنىڭ باستى قۇرامداس بولىگى رەتىندە مەريتوكراتيا مەن العا قويعان مىندەتتەردى جۇزەگە اسىرۋعا قاجەتتى جاعداي جاساۋ اتاپ كورسەتىلدى.
سىبايلاس جەمقورلىققا قارسى مەكەمەنىڭ باسشىسى قۇقىق قورعاۋ ورگانىن ءتيىمدى باسقارۋدىڭ «پايدالى كەڭەستەرىمەن» ءبولىستى. اتاپ ايتقاندا, ىنتالاندىرۋدى ارتتىرۋ, كورپوراتيۆتىك مادەنيەتتى وزگەرتۋ جانە قاتاردىڭ تازالىعىن قامتاماسىز ەتۋ ماسەلەلەرىنە توقتالدى. تىڭداۋشىلاردىڭ ەرەكشە نازارىن ء«وزىنىڭ جەكە باسىمەن ۇلگى بولۋداعى» رولىنە اۋداردى.
ازاماتتىق قوعاممەن سىنداردى ديالوگتىڭ, حالىقتىڭ مۇقتاجىنا كوڭىل ءبولۋدىڭ ماڭىزدىلىعىن اتاپ ءوتتى. ءار ازاماتتىڭ ماسەلەسىن شەشۋ كەز-كەلگەن مەملەكەتتىك ورگان جۇمىسىنىڭ باسىمدىلىعىنا اينالۋ قاجەت. اگەنتتىك توراعاسى ازاماتتاردى اپتا سايىن, ونىڭ ورىنباسارلارى مەن تەرريتوريالىق دەپارتامەنتتەرىنىڭ باسشىلارى كۇن سايىن قابىلدايدى.
تەك جىل باسىنان بەرى سىبايلاس جەمقورلىققا قارسى قىزمەت پەن «ادالدىق الاڭى» جوبالىق كەڭسەلەرىنىڭ قولداۋىمەن 2 مىڭنان اسا ازاماتتىڭ قۇقىقتارى قالپىنا كەلتىرىلدى.
قۇقىق قورعاۋ جانە سوت ورگاندارىنداعى جەمقورلىق قوعامنىڭ سەنىمىنە سەلكەۋ تۇسىرەدى. سىبايلاس جەمقورلىق دەڭگەيىن تومەندەتۋدە ايتارلىقتاي ناتيجەلەرگە قول جەتكىزگەن بارلىق ەلدەر قۇقىق قورعاۋ ورگاندارىنان باستاعان. بۇل قۇرىلىمدارداعى جاعدايدى جەدەل وزگەرتۋ باسقا سالالاردا دا سىبايلاس جەمقورلىقتى ازايتۋعا ىقپال ەتەتىن مۋلتيپليكاتيۆتىك ناتيجەنى قامتاماسىز ەتەدى.
