ءانشىنىڭ تالانتىنا قىزىعۋشىلار ءبىزدىڭ ەلىمىزدە عانا ەمەس شەتەلدەردە دە كوپ. بۇل - ءارتىستىڭ شىعارماشىلىعى بەلگىلى ءبىر مادەني شەڭبەردەن تىس امبەباپ جانە ءار ءتۇرلى ۇلت پەن ۇلىستاردىڭ جۇرەگىنەن ورىن العانىنىڭ كورىنىسى. ايتۋلى شاراعا بيلەتتەر 13 قىركۇيەكتە ساتىلا باستاعان, جانە 1,5 اي ىشىندە ءارتىستىڭ جانكۇيەرلەرى بارلىق 7000 بيلەتتى ساتىپ العان. كوپشىلىكتىڭ وتىنىشىنە وراي, Ticketmaster.com سايتىندا ديماشتىڭ الداعى كونتسەرتىنە فان-ايماق پەن شەتكى قاتارلاردان تاعى 2000 بيلەت ساتىلىمى اشىلعان.
تارتىمدى شوۋ باعدارلاماسى مەن ءارتىستىڭ كورەرمەنىن ەلىتەر ساحنالىق وبرازدارىن قازاقستاندىق جاس ماماندار توبى دايىنداعان.
«Arnau tour ENVOY» - 2019 جىلدىڭ جازىندا نۇر-سۇلتان قالاسىندا وتكەن «ARNAU» كونتسەرتىنىڭ جاڭارعان نۇسقاسى. جاڭا باعدارلامادا ۇزدىك ساتتەر توپتاستىرىلىپ, جاڭا ءان, جاڭا نومىرلەرمەن تولىقتىرىلدى. امەريكالىق كورەرمەندەر ARNAU باعدارلاماسىنىڭ ۇزدىك پىكىرگە يە بولعان جانە بۇكىل الەمدەگى جانكۇيەرلەر قولداعان كەيبىر نومىرلەرىن جاڭا نۇسقادا كورە الادى.
ديماش الەمدەگى تىڭدارمانعا قازاق مۋزىكاسىنىڭ بەينەسى, ەلشىسى, بۇكىل الەمگە ەلىمىزدىڭ مادەنيەتىن پاش ەتەتىن تۇلعا رەتىندە تانىلدى.
ايتا كەتەيىك, ديماشتىڭ لوندوندا وتكەن جەكە كونتسەرتىنە الەمنىڭ 45 ەلىنەن 4600 كورەرمەن جينالعان.
