وليمپيادانى نۇر-سۇلتان قالاسىنىڭ اكىمدىگى مەن «استانا Innovations» اق ۇيىمداستىردى. كونكۋرسقا ەلىمىزدىڭ تۇكپىر-تۇكپىرىنەن 500-دەن استام وقۋشىنى قۇراعان 140 كوماندا قاتىستى.
«يننوۆاتسيالىق ءبىلىم وليمپياداسى جىل سايىن وزىندىك ءرولىن ايقىنداي تۇسەدى. ال كەلەسى جىلدان باستاپ حالىقارالىق كونكۋرسقا اينالادى», دەيدى «استانا Innovations» اق باسقارما توراعاسى ارىستان قازجانوۆ.
بۇل ءىس-شارا عىلىمي جانە تەحنيكالىق ءبىلىمنىڭ دامۋىنا زور اسەر ەتەدى. بارلىعى 4 نوميناتسيا بويىنشا 36 جەڭىمپاز كوماندا ايقىندالدى: 3D ۇلگىلەۋ, ينجەنەرلىك ماتەماتيكا, باعدارلامالاۋ جانە جوبالىق روبوتوتەحنيكا.
ەلوردالىق №38 جانە №73 مەكتەپتەرى, سونداي-اق دارىن ممي (قاراعاندى قالاسى) ەڭ كوپ نوميناتسيالارعا يە بولدى.
جەڭىمپازدار 3D پرينتەر, نوۋتبۋك, درون, روبوتوتەحنيكا جيىنتىقتارى, ساۋىقتىرۋ لاگەرىنە جولداما سەكىلدى ءتۇرلى جۇلدەلەرگە يە بولدى.
ايتا كەتەيىك, STEM – تەحنيكالىق ءبىلىم بەرۋ سالاسىنداعى سوڭعى جەتىستىكتەردى قامتىعان يننوۆاتسيالىق وليمپيادا. قازاقستاندا STEM زەرتحانالارى بىلتىردان باستاپ اشىلا باستادى. ولاردىڭ العاشقىسى ەلورداداعى №41 مەكتەپكە ورناتىلدى. ال بۇگىندە ەلىمىزدە 90-نان استام STEM زەرتحانا جۇمىس ىستەپ تۇر.
